सालार जंग टी-ट्वेन्टी क्रिकेट स्पर्धा इस्लाम जिमखाना उपांत्य फेरीत मुस्लिम युनायटेडवर 24 धावांनी विजय

 

सालार जंग टी-ट्वेन्टी क्रिकेट स्पर्धा

इस्लाम जिमखाना उपांत्य फेरीत

मुस्लिम युनायटेडवर 24 धावांनी विजय

 

मुंबई: धावांचा पाऊस पडलेल्या थरारक सामन्यात इस्लाम जिमखान्याने मुस्लिम युनायटेडवर 24 धावांनी विजय मिळवत सालार जंग टी-ट्वेन्टी क्रिकेट स्पर्धेच्या उपांत्य फेरीत प्रवेश केला.

 

इस्लाम जिमखाना मैदानावर खेळल्या गेलेल्या या सामन्यात मुस्लिम युनायटेडने नाणेफेक जिंकून इस्लाम जिमखान्याला प्रथम फलंदाजीसाठी आमंत्रित केले. प्रतिस्पर्ध्यांच्या या निर्णयाचा पुरेपूर फायदा घेत इस्लाम जिमखान्याने 20 षटकांत 4 बाद 221 धावांचा डोंगर उभारला.

 

अयाज खानचा तडाखेबंद खेळ

इस्लाम जिमखान्याच्या डावाची सुरुवात दमदार झाली. प्रणव शेट्टी (28 चेंडूत 43) आणि सुफियान शेख (32 चेंडूत 38) यांनी संघाला चांगली गती दिली. त्यानंतर अयाज खानने 32 चेंडूत 8 चौकार आणि 3 षटकारांसह नाबाद 65 धावा फटकावत संघाला भक्कम स्थितीत नेले. सुजीत नायक (7 चेंडूत 13) आणि विनायक घोत्रे (24 चेंडूत 23) यांनीही चांगले योगदान दिले.

 

मुस्लिम युनायटेडकडून दीपक शेट्टी (1/31), ध्रुविल मतकर (1/28) आणि सौद मन्सुरी (1/37) यांनी प्रत्येकी एक विकेट घेतली.

 

मुस्लिम युनायटेडची लढत अपुरी पडली

222 धावांचा पाठलाग करताना मुस्लिम युनायटेडची सुरुवात खराब झाली. मात्र, रोहन भाटकर (50 चेंडूत 46) आणि मोईन खान (39 चेंडूत 66; 9 चौकार, 6 षटकार) यांनी जोरदार प्रतिकार केला. मात्र, मधली फळी ढासळल्याने संघाचा डाव 19.4 षटकांत 197 धावांवर आटोपला.

 

इस्लाम जिमखान्याकडून सिद्धार्थ राऊत (3/32) आणि सर्फराज पाटील (3/32) यांनी महत्त्वपूर्ण विकेट घेतल्या. त्यांना हितेश कदम (1/34) आणि सुजित नायक (1/23) यांनी चांगली साथ दिली.

 

या विजयासह इस्लाम जिमखान्याने उपांत्य फेरीत धडक मारली असून, आता पुढील सामन्यात त्यांच्याकडून दमदार कामगिरीची अपेक्षा आहे!