विश्वनाथ स्पोर्ट्स मीटमध्ये क्रिकेटचा थरार शिगेला! वाडिया, डीवायपीएटीयू, कीस्टोन स्कूल व एमआयटी एसओसीचे दमदार विजय; सुपर ओव्हरने रंगत दुणावली मैदानावर धावा, विकेट्स आणि उत्कंठा शिगेला

 

विश्वनाथ स्पोर्ट्स मीटमध्ये क्रिकेटचा थरार शिगेला!

वाडिया, डीवायपीएटीयू, कीस्टोन स्कूल व एमआयटी एसओसीचे दमदार विजय; सुपर ओव्हरने रंगत दुणावली

मैदानावर धावा, विकेट्स आणि उत्कंठा शिगेला

 

लोणी काळभोर : येथे सुरू असलेल्या आठव्या विश्वनाथ स्पोर्ट्स मीट (व्हीएसएम–२०२६) अंतर्गत क्रिकेट स्पर्धेने रविवारी अक्षरशः रंगत पकडली. थरारक सुपर ओव्हर, कमी धावसंख्येचा यशस्वी बचाव आणि एकतर्फी विजय अशा सर्वच रंगांनी सजलेल्या या दिवसात एमईएस वाडिया, डीवाय शेतकी व तांत्रिक विद्यापीठ (डीवायपीएटीयू), कीस्टोन स्कूल ऑफ इंजिनिअरिंग आणि एमआयटी स्कूल ऑफ कम्प्युटिंग (एसओसी) संघांनी प्रभावी कामगिरी करत प्रेक्षकांना खिळवून ठेवले.

वाडियाचा लढवय्या विजय – कमी धावांतही अचूक गोलंदाजीचा चमत्कार

एमआयटी एडीटी विद्यापीठ मैदानावर झालेल्या सामन्यात एमईएस वाडिया, पुणे संघाने कमी धावसंख्येचा यशस्वी बचाव करत पाटकर वर्धे कॉलेज, मुंबई संघावर २१ धावांनी विजय मिळवला. वाडियाने १८ षटकांत ७ बाद ११९ धावा केल्या. हर्षवर्धन पाटील (२५ चेंडूत २९), प्रथमेश कुवर (२२ चेंडूत २७) आणि कर्णधार अभि जाधव (२४ चेंडूत नाबाद २४) यांनी संघाची धावसंख्या सावरली. प्रत्युत्तरात पाटकर वर्धे कॉलेज १५.५ षटकांत ९८ धावांत गारद झाले. हर्षवर्धन गलांडे (३/१५) आणि सिद्धांत अग्वान (३/२५) यांनी अचूक गोलंदाजी करत विजयावर शिक्कामोर्तब केले.

डीवायपीएटीयूचा वादळी पाठलाग – सलामीवीरांची अर्धशतकी आतषबाजी

उरुळीकांचन येथील निकम स्टेडियमवर झालेल्या सामन्यात डीवायपीएटीयू संघाने एमआयटी एसबीएसआर वर १० गडी राखून दणदणीत विजय मिळवला. एमआयटी एसबीएसआरने १६ षटकांत ७ बाद ११० धावा केल्या. प्रत्युत्तरात डीवायपीएटीयूच्या सलामीवीरांनी सामन्यावर वर्चस्व गाजवले. पार्थ गणबावले (१८ चेंडूत नाबाद ५१) आणि कर्णधार रोहित पवार (२९ चेंडूत नाबाद ५१) यांनी अवघ्या ७.३ षटकांत एकही विकेट न गमावता सामना संपवला.

सुपर ओव्हरचा थरार – मोहन कदम ठरला नायक

एमआयटी एडीटी मैदानावर झालेला कीस्टोन स्कूल ऑफ इंजिनिअरिंग विरुद्ध डीवाय आंतरराष्ट्रीय विद्यापीठ (पीआययू) सामना स्पर्धेतील सर्वाधिक नाट्यमय ठरला. दोन्ही संघांनी प्रत्येकी १०२ धावा केल्याने सामना बरोबरीत सुटला. त्यानंतरच्या सुपर ओव्हरमध्ये कीस्टोन स्कूल ऑफ इंजिनिअरिंग संघाने बाजी मारली. कर्णधार मोहन कदम याने सुपर ओव्हरमध्ये केवळ ३ धावा देत गोलंदाजीत कमाल केली आणि नंतर फलंदाजीत निर्णायक चौकार लगावत विजय निश्चित केला.

एसओसीचा संयमित विजय – सुजल पडवळची झुंजार खेळी

दुसऱ्या फेरीतील चुरशीच्या सामन्यात एमआयटी एसओसी संघाने क्राइस्ट कॉलेज वर १५ धावांनी रोमांचक विजय मिळवला. एमआयटी एसओसीने १६ षटकांत ९ बाद १३५ धावा केल्या. सुजल पडवळ (२७ चेंडूत ४७) याने आक्रमक खेळी करत डावाला धार दिली. प्रत्युत्तरात क्राइस्ट कॉलेजने १०२ धावांची सलामी भागीदारी करत सामना रंगतदार केला; मात्र सिद्धांत सोलट (२/२४) यांच्या अचूक डेथ बॉलिंगमुळे सामना एसओसीच्या बाजूने झुकला.

संक्षिप्त धावफलक

एमईएस वाडिया, पुणे १८ षटकांत ७ बाद ११९ (हर्षवर्धन पाटील २९ – २५ चेंडू, प्रथमेश कुवर २७ – २२ चेंडू, अभि जाधव २४ – २४ चेंडू*) वि.वि. पाटकर वर्धे कॉलेज, मुंबई १५.५ षटकांत सर्वबाद ९८ (शिवम घोष २८ – २४ चेंडू; हर्षवर्धन गलांडे ३/१५, सिद्धांत अग्वान ३/२५) निकाल : एमईएस वाडिया २१ धावांनी विजयी

एमआयटी एसबीएसआर १६ षटकांत ७ बाद ११० वि.वि. डीवायपीएटीयू ७.३ षटकांत बिनबाद ११५ (पार्थ गणबावले ५१ – १८ चेंडू, रोहित पवार ५१ – २९ चेंडू**) निकाल : डीवायपीएटीयू १० गडी राखून विजयी

कीस्टोन स्कूल ऑफ इंजिनिअरिंग १५.५ षटकांत सर्वबाद १०२ वि.वि. डीवायपीआययू १७.३ षटकांत सर्वबाद १०२ सुपर ओव्हर : कीस्टोन ५/१ वि.वि. डीवायपीआययू ३/२ निकाल : कीस्टोन स्कूल विजयी

एमआयटी एसओसी १६ षटकांत ९ बाद १३५ (सुजल पडवळ ४७ – २७ चेंडू) वि.वि. क्राइस्ट कॉलेज १६ षटकांत ४ बाद १२० (शेल्डन जोसेफ ५६ – ४६ चेंडू) निकाल : एमआयटी एसओसी १५ धावांनी विजयी