पै. विशाल सुनील जाधव ठरला ‘कोपरी केसरी’चा मानकरी! विरारच्या जंगी कुस्ती मैदानात श्री गणेश आखाड्याचा दबदबा अटीतटीच्या लढतीत विशालची विजयी झेप कोपरीत कुस्तीचा जल्लोष, विशालचा दणदणीत विजय!

 

पै. विशाल सुनील जाधव ठरला ‘कोपरी केसरी’चा मानकरी!

विरारच्या जंगी कुस्ती मैदानात श्री गणेश आखाड्याचा दबदबा अटीतटीच्या लढतीत विशालची विजयी झेप

कोपरीत कुस्तीचा जल्लोष, विशालचा दणदणीत विजय!

 

ठाणे : विरारच्या कुस्तीप्रेमींच्या साक्षीने रंगलेल्या जंगी मैदानात पै. विशाल सुनील जाधव याने अफलातून खेळ सादर करत ‘कोपरी केसरी’चा मानाचा किताब पटकावला! अटीतटीच्या, रोमांचक आणि तोडीस तोड झालेल्या अंतिम लढतीत शेवटच्या क्षणी बाजी मारत विशालने संपूर्ण मैदान दणाणून सोडले.

 

भव्य आयोजन : यात्रेत कुस्तीचा थरार

दिनांक २५ मार्च रोजी सत्यनारायण प्रतिष्ठान ग्रामस्थ मंडळ, कोपरे विरार (पूर्व) यांच्या सुवर्णमहोत्सवी वर्षानिमित्त भव्य यात्रा आयोजित करण्यात आली होती. या यात्रेत पालघर जिल्हा कुस्तीगीर संघाच्या मान्यतेने आणि संघाचे सचिव तसेच मिरा-भाईंदर महानगरपालिकेचे अग्निशामन अधिकारी श्री. सदानंद पाटील यांच्या उत्कृष्ट नियोजनातून कुस्त्यांच्या भव्य मैदानाचे आयोजन करण्यात आले.

 

राज्यातील मल्लांची उपस्थिती; रंगल्या चुरशीच्या लढती

या मैदानासाठी ठाणे, कल्याण-डोंबिवली, मुंबई उपनगर, भाईंदर अशा विविध भागांतील नामांकित मल्लांनी सहभाग घेतला. प्रत्येक कुस्ती चुरशीची ठरत होती. पैलवानांनी आपले कसब पणाला लावत रोख बक्षिसे व पारितोषिके जिंकत आपल्या तालमीचा लौकिक वाढवला.

 

श्री गणेश आखाड्याची चमकदार कामगिरी (सलग कामगिरी)

पै. विशाल सुनील जाधव – अंतिम फेरीतील अटीतटीच्या लढतीत विजय मिळवत ‘कोपरी केसरी’ किताब पटकावला; पै. प्रतीक बोबडे – चटकदार कुस्त्या जिंकत प्रेक्षकांची दाद मिळवली; पै. विपीन गौतम – आक्रमक खेळाने विजय मिळवत मैदान गाजवले; पै. ओम जाधव – प्रेक्षणीय लढत देत सामना बरोबरीत सोडवला; पै. अनिकेत यादव – दमदार झुंज देत कुस्ती अनिर्णित ठेवली.

 

आखाड्यात उत्साहाचे वातावरण

विशालच्या या शानदार कामगिरीमुळे श्री गणेश आखाड्यात आनंदाचे वातावरण निर्माण झाले असून, त्याच्या यशाबद्दल सर्व स्तरातून अभिनंदनाचा वर्षाव होत आहे.

 

शिक्षण, सराव आणि मार्गदर्शनाची ताकद

पै. विशाल सुनील जाधव सध्या अभिनव कॉलेजच्या कला शाखेच्या शेवटच्या वर्षात शिक्षण घेत असून, तो जानता राजा कुस्ती केंद्र, लोणीकंद येथे नियमित सराव करीत आहे. त्याला आखाड्याचे सर्वेसर्वा श्री. वसंतराव पाटील आणि कुस्ती प्रशिक्षक पै. वैभव माने यांचे मोलाचे मार्गदर्शन लाभले आहे.

 

कोपरीच्या मातीवर झळकलेला विशालचा हा विजय केवळ किताबापुरता मर्यादित नसून, आगामी मोठ्या स्पर्धांसाठी त्याच्या दमदार दावेदारीची नांदी ठरली आहे!