ठाण्याने कबड्डीत रणशिंग फुंकले! असलम इनामदार व पूजा झेपले यांच्या नेतृत्वाखाली राज्य स्पर्धेसाठी संघ सज्ज नाशिकमध्ये रंगणाऱ्या ७३व्या राज्य अजिंक्यपद निवड चाचणी कबड्डीसाठी ठाण्याचे दमदार पुरुष व महिला संघ जाहीर ठाण्याचे दोन्ही संघ सज्ज!

 

ठाण्याने कबड्डीत रणशिंग फुंकले!

असलम इनामदार व पूजा झेपले यांच्या नेतृत्वाखाली राज्य स्पर्धेसाठी संघ सज्ज

नाशिकमध्ये रंगणाऱ्या ७३व्या राज्य अजिंक्यपद निवड चाचणी कबड्डीसाठी ठाण्याचे दमदार पुरुष व महिला संघ जाहीर

ठाण्याचे दोन्ही संघ सज्ज!

ठाणे : ठाणे जिल्ह्याने कबड्डी विश्वात पुन्हा एकदा आपली ताकद दाखवण्याची तयारी पूर्ण केली असून, नाशिक येथे दि. ०२ एप्रिल २०२६ पासून होणाऱ्या ७३व्या राज्य अजिंक्यपद निवड चाचणी कबड्डी स्पर्धेसाठी आपले पुरुष व महिला संघ जाहीर केले आहेत. “कर्णधार कोण?” या चर्चेला अखेर पूर्णविराम देत पुरुष संघाचे नेतृत्व असलम इनामदार (जय बजरंग-वाशिंद) यांच्याकडे, तर महिला संघाची धुरा पूजा झेपले (जाधव) (ओम् वर्तकनगर) हिच्याकडे सोपविण्यात आली आहे. सध्या दोन्ही संघ ठाणे (प.) येथील दादोजी कोंडदेव क्रीडा संकुलात कसून सराव करत असून, विजेतेपदावर डोळा ठेवून मैदानात उतरणार आहेत.

 

पुरुष संघ : अनुभव आणि आक्रमणाचा संगम

“या वेळी ठाणे जिंकणारच!” असा आत्मविश्वास व्यक्त करत पुरुष संघात असलम इनामदार (संघनायक), अतुल देसले, मंगेश सोनवणे, अजय पाटील, तुषार भोईर, सुरज दुंदले, वैभव पाटील, विघ्नेश चौधरी, रोहन तुपारी, शुभम शिर्के, परेश म्हात्रे, अरिहंत पाटील, हर्ष भोईर, सुजल म्हात्रे या दमदार खेळाडूंचा समावेश करण्यात आला आहे. या संघाचे मार्गदर्शन प्रशिक्षक दीपक म्हात्रे, सहाय्यक प्रशिक्षक मंदार तावडे करत असून व्यवस्थापनाची जबाबदारी दशरथ शिंदे सांभाळत आहेत. आक्रमक चढाया आणि भक्कम पकडीच्या जोरावर हा संघ प्रतिस्पर्ध्यांना कडवी झुंज देण्यासाठी सज्ज आहे.

 

महिला संघ : दमदार नेतृत्व आणि संतुलित संघरचना

“आम्हीही कुठे कमी नाही!” असा संदेश देत महिला संघात पूजा झेपले (जाधव) (संघनायिका) हिच्या नेतृत्वाखाली देवयानी पाटील, निधी राजोळे, तेजस्वी जाधव (पाटेकर), ऐश्वर्या राऊत, वैष्णवी साळुंखे, पूर्वा इंगवले, रेखा पाटील (चिकणे), प्राजक्ता पुजारी, माधुरी गवंडी, समृद्धी मायंगडे, तारा देसाई, वैष्णवी चव्हाण, ऐश्वर्या पाटील या प्रतिभावान खेळाडूंचा समावेश आहे. या संघाला प्रशिक्षक निलेश सावंत, सहाय्यक प्रशिक्षिका सौ. अनिता पाटील (मयेकर) यांचे मार्गदर्शन लाभत असून व्यवस्थापक मनोज शिंदे संघाची धुरा सांभाळत आहेत.

 

सराव, रणनीती आणि विजेतेपदाचा निर्धार

दोन्ही संघ सध्या दादोजी कोंडदेव क्रीडा संकुलात जोरदार सराव करत असून चढाई, पकड आणि संघभावनेवर विशेष भर देण्यात येत आहे. “या वेळी ठाण्याचा झेंडा राज्यभर फडकवायचाच!” असा निर्धार खेळाडूंनी व्यक्त केला आहे. अनुभवी आणि नवोदित खेळाडूंच्या योग्य संगमामुळे ठाण्याचे दोन्ही संघ या स्पर्धेत विजेतेपदासाठी प्रबळ दावेदार ठरणार आहेत, यात शंका नाही!