शुभम शिंदेची दमदार खेळी ऑटोमोटिव्ह मॅन्युफॅक्चरर्सचा दणदणीत विजय! डॉ. बाबासाहेब आंबेडकर ट्रॉफी आरसीएफ टी-२० क्रिकेट स्पर्धा २०२६ मध्ये गोलंदाजी-फलंदाजीचा अफलातून संगम

 

शुभम शिंदेची दमदार खेळी

ऑटोमोटिव्ह मॅन्युफॅक्चरर्सचा दणदणीत विजय!

डॉ. बाबासाहेब आंबेडकर ट्रॉफी आरसीएफ टी-२० क्रिकेट स्पर्धा २०२६ मध्ये गोलंदाजी-फलंदाजीचा अफलातून संगम

 

मुंबई : चौकार-षटकारांची आतषबाजी, अचूक गोलंदाजीचा मारा आणि झंझावाती फलंदाजीचा संगम आरसीएफच्या मैदानावर क्रिकेटचा खरा थरार पाहायला मिळाला! ऑटोमोटिव्ह मॅन्युफॅक्चरर्स संघाने दमदार कामगिरी करत डॉ. बालाभाई नानावटी हॉस्पिटल संघावर ७ विकेट राखून दणदणीत विजय मिळवला. या विजयाचा खरा शिल्पकार ठरला तो म्हणजे शुभम शिंदे, ज्याने नाबाद अर्धशतक ठोकत संघाला सहज विजय मिळवून दिला.

 

आशय दुबे–हाशिमचा भेदक मारा; नानावटीचा डाव कोसळला

“आम्ही सुरुवातीपासूनच आक्रमक गोलंदाजीवर भर दिला,” असे सांगणाऱ्या आशय दुबे – ३/८ आणि सय्यद मोहम्मद हाशिम – ३/१५ यांनी अचूक माऱ्याने प्रतिस्पर्ध्यांची कंबर मोडली. त्यांच्या प्रभावी गोलंदाजीसमोर डॉ. बालाभाई नानावटी हॉस्पिटल संघाचा डाव १८.३ षटकांत १०७ धावांवर आटोपला. फलंदाजीत फरहान काझी – २० धावा याने एकाकी झुंज देण्याचा प्रयत्न केला, मात्र इतर फलंदाज अपयशी ठरले.

 

शुभम शिंदेचा तुफानी अर्धशतक; १२.४ षटकांतच विजय

“मी शेवटपर्यंत राहून सामना संपवायचा ठरवला होता,” असे आत्मविश्वासाने सांगणाऱ्या शुभम शिंदे – ३२ चेंडूत नाबाद ५१ धावा (५ चौकार, ३ षटकार) याने शानदार खेळी साकारली. त्याला राज वाघेला २९ धावा याची भक्कम साथ लाभली. ऑटोमोटिव्ह मॅन्युफॅक्चरर्सने १२.४ षटकांत ३ बाद ११२ धावा करत सहज विजय मिळवला. उत्कृष्ट गोलंदाजीसाठी आशय दुबे याला सामनावीर घोषित करण्यात आले.

 

रुद्र दंडायचे ९३ धावा व्यर्थ; जैन इरिगेशनचा रोमांचक विजय

दुसऱ्या सामन्यात “मी संघासाठी मोठी खेळी केली, पण विजय हुकला,” अशी भावना व्यक्त करणाऱ्या रुद्र दंडाय ५८ चेंडूत ९३ धावा (१० चौकार, ३ षटकार) याची तुफानी खेळी निष्फळ ठरली. सेंट्रल रेल्वे एसएने २० षटकांत ७ बाद १४१ धावा केल्या, ज्यात हर्षल वाघमारे – २/२१ यांनी प्रभावी गोलंदाजी केली. लक्ष्याचा पाठलाग करताना जैन इरिगेशन संघाने संयमी आणि नियोजनबद्ध खेळ करत १८.१ षटकांत ६ बाद १४५ धावा करत ४ विकेट राखून विजय मिळवला. फलंदाजीत आदित्य पाबळकर – ३९ धावा, हृषिकेश गोरे – ३४ धावा, विलोहित देसाई – २७ धावा यांनी महत्त्वाचे योगदान दिले, तर गोलंदाजीत विनीत ढाका – २/१६ आणि सलील आगरकर – २/३३ यांनी लढा दिला.

 

स्पर्धेचा रंग चढतोय; पुढील सामन्यांकडे सर्वांचे लक्ष!

या सामन्यांमुळे स्पर्धेतील चुरस अधिकच वाढली असून, प्रत्येक संघ विजयासाठी झुंज देताना दिसत आहे. शुभम शिंदेसारख्या खेळाडूंच्या चमकदार कामगिरीमुळे स्पर्धा अधिक रंगतदार बनत आहे. क्रिकेटप्रेमींसाठी ही स्पर्धा म्हणजे एक उत्सवच ठरत आहे!

 

हि स्पर्धा यशस्वी करण्यासाठी आरसीएफचे अनिल कापडने, सचिन काकडेकर, योगेश (राजू) पाटील यांच्यासह आरसीएफचे क्रीडा पदाधिकारी व कार्यकर्ते जोरदार मेहनत घेत आहेत.