क्रिकेटच्या पंढरीत उपांत्य फेरीचा रणसंग्राम! पारसी जिमखाना व कर्नाटक स्पोर्टींग असोसिएशनची दणदणीत आगेकूच हर्ष साळुंकेची १४२ धावांची खेळीही व्यर्थ

क्रिकेटच्या पंढरीत उपांत्य फेरीचा रणसंग्राम!

पारसी जिमखाना व कर्नाटक स्पोर्टींग असोसिएशनची दणदणीत आगेकूच 

हर्ष साळुंकेची १४२ धावांची खेळीही व्यर्थ

 

मुंबई : शिवाजी पार्कच्या ऐतिहासिक मैदानावर सुरू असलेल्या ‘कै. विजय मांजरेकर - कै. रमाकांत देसाई टी-२० क्रिकेट स्पर्धेत’ चौकार-षटकारांचा अक्षरशः पाऊस पडत असून उपांत्य फेरीचे चित्र स्पष्ट झाले आहे! दमदार कामगिरी करत पारसी जिमखाना आणि कर्नाटक स्पोर्टींग असोसिएशन यांनी सलग दोन सामने जिंकत उपांत्य फेरीत धडक मारली; मात्र स्पर्धेतील सर्वाधिक १४२ धावांची तुफानी खेळी करणाऱ्या हर्ष साळुंकेचा पराक्रमही मुंबई पोलीस संघाला विजय मिळवून देऊ शकला नाही.

 

हर्ष साळुंकेची विक्रमी खेळी फोल! नॅशनल क्रिकेट क्लबचा धडाकेबाज धाव पाठलाग

पहिल्या फेरीत मुंबई पोलीस संघाने ६ बाद २५६ धावा उभारल्या. यात हर्ष साळुंके (१४२) याने स्पर्धेतील सर्वोच्च धावसंख्या नोंदवत एकहाती डाव सावरला, तर सुनील पाटील (४१) यांनी साथ दिली. गोलंदाजीत प्रवेश पाल (२/२८) चमकला.
मात्र, नॅशनल क्रिकेट क्लबने तितक्याच आक्रमक शैलीत ५ बाद २५९ धावा करत सामना जिंकला. हार्दिक तामोरे (५९), वेदांत पाटील (६७), आदित्य श्रीवास्तव (३५) आणि सिद्धार्थ आक्रे (नाबाद ५८) यांच्या सलग फटकेबाजीने शानदार विजय मिळवला.

 

कर्नाटक स्पोर्टींगचा सर्वांगीण दमदार खेळ; वैभव माळीचे ५ बळी, गौरीश जाधवची नाबाद ७८

यजमान एसपीजीला पराभवाचा धक्का देणाऱ्या कर्नाटक स्पोर्टींग असोसिएशनने दुसऱ्या सामन्यातही वर्चस्व राखले. प्रथम फलंदाजी करताना संघाने ५ बाद २०९ धावा केल्या. गौरीश जाधव (नाबाद ७८), तनुश कोटीयन (३८), मकरंद पाटील (३२) आणि विश्वजीत जगदाळे (नाबाद ३०) यांनी धावांचा भक्कम पाया रचला. प्रत्युत्तरात नॅशनल क्रिकेट संघ केवळ १५.१ षटकांत ११८ धावांत गडगडला. साईराज पाटील (३८) याने झुंज दिली, पण वैभव माळी (५/१६) याच्या भेदक गोलंदाजीसमोर संपूर्ण संघ कोसळला.

 

पारसी जिमखान्याची विजयी धाव पाठलाग; हर्ष आघावच्या नाबाद ५७ धावा निर्णायक

डी. वाय. पाटील स्पोर्ट्स अकादमीने प्रथम फलंदाजी करताना ६ बाद २२० धावा केल्या. सोहिल गोडे (७७), सुरज शिंदे (७७) आणि हर्षल जाधव (३३) यांनी आक्रमक फलंदाजी केली. झैद पाटणकर (२/४०) याने पारसीसाठी गोलंदाजीत कामगिरी बजावली. प्रत्युत्तरात पारसी जिमखानाने ५ बाद २२२ धावा करत अवघ्या ४ चेंडू राखून विजय मिळवला. हर्ष आघाव (नाबाद ५७), सुमेर झवेरी (४६), आयुष वर्तक (४२), जय जैन (३२) आणि वेदांत मुरकर (३०) यांच्या एकत्रित फलंदाजीने संघाला उपांत्य फेरीत पोहोचवले.

 

इतर निकाल; मिनाद मांजरेकर, वरुण जोईजोडे यांची गोलंदाजीत चमक

एमआयजी क्लबने ६ बाद १८९ धावा करताना शिष शेट्टी (७१) आणि नमन झवार (५०) चमकले. प्रत्युत्तरात न्यू हिंद स्पोर्टींग संघ केवळ ८८ धावांत गारद झाला. गोलंदाजीत मिनाद मांजरेकर (४/१६) आणि वरुण जोईजोडे (२/१५) यांनी शानदार कामगिरी केली. सिंध क्रिकेट संघने १९३ धावा करताना अवैस खान (६३) याने दमदार खेळी केली, तर शमस मुलानी (४/४०) गोलंदाजीत यशस्वी ठरला. मात्र, पारसी जिमखानाने ६ बाद १९४ धावा करत विजय मिळवला. वेदांत मुरकर (५२), जय जैन (५४) आणि आयुष वर्तक (नाबाद ३३) यांनी निर्णायक खेळी केली.

 

स्पर्धेची रंगत शिगेला! उपांत्य फेरीत थरारक लढतींची उत्सुकता

सलग दमदार कामगिरीमुळे पारसी जिमखाना आणि कर्नाटक स्पोर्टींग असोसिएशन यांनी उपांत्य फेरीत प्रवेश करत विजेतेपदासाठी जोरदार दावेदारी केली आहे. हर्ष साळुंकेचे १४२, गौरीश जाधवची ७८, वैभव माळीचे ५ बळी आणि हर्ष आघावची ५७* या कामगिरींनी स्पर्धेची रंगत कमालीची वाढवली आहे.

 

क्रिकेटप्रेमींसाठी पर्वणी! शिवाजी पार्कवर आता उपांत्य फेरीचा थरार रंगणार

शिवाजी पार्कवर आता उपांत्य फेरीतील सामने अधिकच रंगतदार होणार असून, चौकार-षटकारांचा वर्षाव आणि चुरशीच्या लढतींसाठी क्रिकेटप्रेमींनी सज्ज व्हावे!