हर्ष आघवच्या वादळी नाबाद ९२ धावांनी बँक ऑफ बडोदाचा बँक शिल्डवर कब्जा! आरबीआयवर ६ विकेट्सनी दणदणीत विजय ‘प्लेअर ऑफ द टूर्नामेंट’ किताबही हर्ष आघवच्या नावावर अंतिम लढतीत चौकार-षटकारांचा पाऊस; बँक ऑफ बडोदाची विजयी पताका!

 

हर्ष आघवच्या वादळी नाबाद ९२ धावांनी बँक ऑफ बडोदाचा बँक शिल्डवर कब्जा!

आरबीआयवर ६ विकेट्सनी दणदणीत विजय

‘प्लेअर ऑफ द टूर्नामेंट’ किताबही हर्ष आघवच्या नावावर

अंतिम लढतीत चौकार-षटकारांचा पाऊस

बँक ऑफ बडोदाची विजयी पताका!

मुंबई : मुंबई पोलीस जिमखाना मैदानावर रंगलेल्या ६४ व्या सर बेनेगल रामा राव आरबीआय बँक शिल्ड टी-२० क्रिकेट स्पर्धेच्या अंतिम सामन्यात हर्ष आघव याने झंझावाती नाबाद खेळी करत क्रिकेटप्रेमींना अक्षरशः मंत्रमुग्ध केले. त्याच्या तुफानी फलंदाजीच्या जोरावर बँक ऑफ बडोदाने यजमान रिझर्व्ह बँक ऑफ इंडिया रिक्रिएशन क्लबवर ६ विकेट्सनी शानदार विजय मिळवत प्रतिष्ठेच्या विजेतेपदावर आपले नाव कोरले.

 

हर्ष आघवचा धडाका – ४१ चेंडूत ९२ धावांची वादळी खेळी!

१५८ धावांच्या आव्हानाचा पाठलाग करताना हर्ष आघव याने अवघ्या ४१ चेंडूत नाबाद ९२ धावा फटकावत अंतिम सामन्याचे चित्रच बदलून टाकले. त्याच्या या तडाखेबंद खेळीत ६ चौकार आणि तब्बल ८ षटकारांचा समावेश होता. सुरुवातीपासूनच आक्रमक भूमिका घेत त्याने आरबीआयच्या गोलंदाजांवर जोरदार हल्ला चढवला. त्याला नुतन गोयल (२१ धावा) याची चांगली साथ लाभली. आरबीआयकडून अनुज गिरी (२/२५) याने झुंजार गोलंदाजी केली.

 

अमेय दांडेकरची झुंज; आरबीआयची १५७ धावांपर्यंत मजल!

तत्पूर्वी नाणेफेक जिंकून प्रथम फलंदाजी करणाऱ्या आरबीआय रिक्रिएशन क्लबने २० षटकांत ८ बाद १५७ धावा उभारल्या. संघाकडून अमेय दांडेकर (४० धावा) याने सर्वाधिक योगदान दिले. त्याचबरोबर साईराज नायर (नाबाद २३ धावा), तेजस कल्याणकर (२२ धावा) आणि गणेश मसूरकर (२१ धावा) यांनीही उपयुक्त खेळी करत संघाला सन्मानजनक धावसंख्येपर्यंत पोहोचवले. बँक ऑफ बडोदाकडून इरफान उमैर (२/२३) याने अचूक मारा करत महत्त्वपूर्ण बळी मिळवले.

 

बडोदाचा नियंत्रित पाठलाग; विजेतेपदावर शिक्कामोर्तब!

आक्रमक फलंदाजी आणि संयमी नियोजन यांच्या जोरावर बँक ऑफ बडोदाने १७.५ षटकांत ४ बाद १५८ धावा करत अंतिम सामन्यावर निर्विवाद वर्चस्व गाजवले. विशेषतः हर्ष आघवच्या खेळीने संपूर्ण सामना एकहाती फिरवला आणि बडोदाच्या विजयावर शिक्कामोर्तब केले.

 

 ‘प्लेअर ऑफ द टूर्नामेंट’ किताबही हर्ष आघवच्याच नावावर!

संपूर्ण स्पर्धेत सातत्यपूर्ण आणि सामनाविजयी कामगिरी करणाऱ्या हर्ष आघव याला प्रतिष्ठेचा ‘प्लेअर ऑफ द टूर्नामेंट’ पुरस्कार देऊन गौरविण्यात आले. प्रमुख पाहुणे पुनीत पंचोली, मुख्य महाव्यवस्थापक, आरबीआय तसेच भारताचे माजी क्रिकेटपटू समीर दिघे यांच्या हस्ते विजेत्या संघाला ट्रॉफी आणि पुरस्कार प्रदान करण्यात आले.

 

क्रिकेटचा जल्लोष; बँक शिल्ड स्पर्धेचा शानदार समारोप!

उत्कृष्ट फलंदाजी, भेदक गोलंदाजी आणि थरारक सामन्यांनी सजलेल्या या स्पर्धेचा शानदार समारोप झाला. हर्ष आघव, अमेय दांडेकर, अनुज गिरी आणि इरफान उमैर यांसारख्या खेळाडूंनी आपल्या दमदार कामगिरीने स्पर्धेची रंगत अधिकच वाढवली आणि क्रिकेटप्रेमींना अविस्मरणीय क्षणांची मेजवानी दिली.