महाराष्ट्र ऑलिंपिक संघटनेच्या अध्यक्षपदी मुरलीधर मोहोळ यांची एकमताने निवड! कार्यकारिणी व सर्वसाधारण सभेत ऐतिहासिक निर्णय क्रीडा क्षेत्रासाठी नव्या पर्वाची सुरुवात नवे नेतृत्व, नवी दिशा!

 

महाराष्ट्र ऑलिंपिक संघटनेच्या अध्यक्षपदी मुरलीधर मोहोळ यांची एकमताने निवड!

कार्यकारिणी व सर्वसाधारण सभेत ऐतिहासिक निर्णय 

क्रीडा क्षेत्रासाठी नव्या पर्वाची सुरुवात

नवे नेतृत्व, नवी दिशा!

 

पुणे : पुण्यातील बालेवाडी क्रीडा संकुलात पार पडलेल्या महाराष्ट्र ऑलिंपिक संघटनेच्या बैठकीत क्रीडाक्षेत्रासाठी मोठा ऐतिहासिक निर्णय घेण्यात आला. केंद्रीय राज्यमंत्री मुरलीधर मोहोळ यांची संघटनेच्या अध्यक्षपदी एकमताने निवड करण्यात आली असून, या निवडीमुळे राज्यातील क्रीडा व्यवस्थापनाला नवी दिशा आणि नवे नेतृत्व लाभले आहे. कार्यकारिणी आणि सर्वसाधारण या दोन्ही सभांमध्ये एकमुखी निर्णय घेतला गेला, हीच या निवडीची विशेष ठरली.

 

बैठकीचा पार्श्वभूमी : दु:खातून उभारी

गत नोव्हेंबरमध्ये झालेल्या बैठकीनंतर संघटनेचे अध्यक्ष आणि उपमुख्यमंत्री स्व. अजितदादा पवार यांच्या आकस्मिक निधनानंतर निर्माण झालेल्या शून्यतेच्या पार्श्वभूमीवर ही महत्त्वाची बैठक आयोजित करण्यात आली होती. प्रारंभी माजी आमदार संदीप जोशी यांची अध्यक्षस्थानी निवड करण्यात आली. यावेळी मनोज कोटक, मनोज भोरे, स्मिता यादव यांच्यासह अनेक पदाधिकारी उपस्थित होते.

 

श्रद्धांजलीचा क्षण : क्रीडाक्षेत्रातील दिग्गजांना अभिवादन

बैठकीची सुरुवात स्व. अजितदादा पवार यांना श्रद्धांजली अर्पण करून झाली. महासचिव संजय शेटे यांनी दादांच्या कार्याचा गौरव करताना ऑलिंपिक भवन उभारणी, खेळाडू सन्मान योजना यांसारख्या उपक्रमांची माहिती दिली. याच वेळी सुरेश कलमाडी, एन. रामचंद्रन, शैलेन्द्र शर्मा, तसेच गानसम्राज्ञी आशाताई भोसले आणि शालनताई भोंडवे यांनाही श्रद्धांजली वाहण्यात आली.

 

शासकीय अर्थसहाय्याचा मुद्दा : क्रीडेला बळ देण्याचा निर्धार

संघटनेला आर्थिक स्त्रोतांची कमतरता भासत असल्याने मुख्यमंत्री देवेंद्र फडणवीस यांच्याकडे शासकीय मदतीसाठी प्रस्ताव सादर करण्याचा निर्णय घेण्यात आला. संजय शेटे यांनी इतर राज्यांप्रमाणे महाराष्ट्रातही क्रीडा संघटनांना आर्थिक पाठबळ मिळावे, अशी अपेक्षा व्यक्त केली. उपाध्यक्ष मनोज कोटक यांनी CSR माध्यमातून समग्र धोरण तयार करण्याचा सल्ला दिला.

 

‘मिशन लक्ष्यवेध’वर टीका : सुधारणा आवश्यक

शासनाच्या ‘मिशन लक्ष्यवेध’ उपक्रमातील त्रुटींवर संदीप भोंडवे यांनी लक्ष वेधले. अनेक संघटनांनी या योजनेवर आक्षेप घेत शासन क्रीडा संघटनांना विश्वासात घेत नसल्याची खंत व्यक्त केली. यावर संदीप जोशी यांनी समिती स्थापन करून क्रीडा आयुक्तांशी चर्चा करण्याचे निर्देश दिले.

 

२०२९ राष्ट्रीय क्रीडा स्पर्धा : महाराष्ट्र सज्ज!

२०२९ मध्ये महाराष्ट्रात ४० वी राष्ट्रीय क्रीडा स्पर्धा आयोजित करण्याच्या दिशेने पावले उचलली जात आहेत. खासदार असताना मुरलीधर मोहोळ यांनी मांडलेल्या या प्रस्तावाला मुख्यमंत्री देवेंद्र फडणवीस यांनी मान्यता दिली आहे. महासचिव संजय शेटे यांनी सांगितले की, महाराष्ट्राने मागील तीन स्पर्धांमध्ये अव्वल स्थान पटकावले असून ही परंपरा कायम ठेवण्यासाठी नियोजनबद्ध तयारी आवश्यक आहे.

 

राज्य ऑलिंपिक स्पर्धा : नियमित आयोजनाची मागणी

राज्यातील ऑलिंपिक स्पर्धा नियमितपणे आयोजित करण्याची मागणी सर्व क्रीडा संघटनांनी केली. याबाबतचा प्रस्ताव जानेवारी महिन्यातच सादर करण्यात आला असून पुढील कार्यवाहीची प्रतीक्षा असल्याचे संजय शेटे यांनी स्पष्ट केले.

 

इतर महत्त्वाचे निर्णय : व्यापक चर्चा

एकूण २५ विषयांवर सखोल चर्चा झाली. यामध्ये क्रीडा निर्णय प्रक्रियेत संघटनांचा सहभाग, ऑलिंपिक डे आयोजन, २०२७ मेघालय राष्ट्रीय स्पर्धा, बालेवाडी येथे खेळाडूंसाठी निवास व्यवस्था, तसेच ५ टक्के आरक्षण आणि ब्लॉकचेन तंत्रज्ञान यांसारख्या विषयांचा समावेश होता.

 

परंपरा आणि प्रगतीचा संगम

बैठकीच्या प्रारंभी छत्रपती शिवाजी महाराज यांच्या पुतळ्याचे पूजन करण्यात आले. त्यानंतर खाशाबा जाधव यांच्या प्रतिमेलाही अभिवादन करण्यात आले. स्वागत समारंभात सोपान कटके, डॉ. राकेश तिवारी, स्मिता शिरोळे, लिना कांबळी, शैलेश टिळक यांनी सहभाग घेतला. प्रास्ताविक व आभार प्रदर्शन संजय शेटे यांनी केले.

 

मुरलीधर मोहोळ यांच्या नेतृत्वाखाली महाराष्ट्र ऑलिंपिक संघटना आता नवी उंची गाठण्याच्या दिशेने सज्ज झाली असून, राज्यातील क्रीडा क्षेत्रासाठी हा निर्णय परिवर्तनाचा टर्निंग पॉइंट ठरणार आहे!