पंचांच्या शिट्टीला आता नियमांची धार!
राज्य कबड्डी पंच परीक्षेत मुंबई उपनगरातील पंचांची कसोटी;
शुभांगी पाटील, आत्माराम चव्हाण यांचे मार्गदर्शन
राज्य कबड्डी पंच परीक्षेत पंचांची कसोटी!
मुंबई उपनगरातील पंचांचा उत्स्फूर्त प्रतिसाद
मुंबई : कबड्डीच्या मैदानावर अचूक आणि
निर्भीड निर्णय देणाऱ्या पंचांची फळी अधिक सक्षम करण्याच्या उद्देशाने घेण्यात
आलेल्या महाराष्ट्र राज्य कबड्डी पंच परीक्षेला मुंबई उपनगरातील पंचांचा
उत्स्फूर्त प्रतिसाद मिळाला. महाराष्ट्र राज्य कबड्डी असोसिएशनच्या मान्यतेने मुंबई
उपनगर कबड्डी असोसिएशनच्या वतीने यशवंत चांदजी सावंत विद्यामंदिर येथे
ही राज्य कबड्डी पंच परीक्षा घेण्यात आली. नियमांचे सखोल ज्ञान, मैदानावरील निर्णयक्षमता आणि पंच म्हणून आवश्यक कौशल्यांची या परीक्षेत
कसोटी लागली.
शुभांगी पाटील यांची परीक्षक म्हणून उपस्थिती
या
परीक्षेसाठी मुंबई शहर कबड्डी असोसिएशनच्या खजिनदार तसेच प्रो-कबड्डी पंच
शुभांगी पाटील परीक्षक म्हणून उपस्थित होत्या. त्यांनी परीक्षार्थी पंचांच्या
कामगिरीचे परीक्षण केले. पंचांनी नियमांची अचूक जाण आणि मैदानावरील प्रसंगावधान
यांना अधिक धार देण्याच्या दृष्टीने ही परीक्षा महत्त्वपूर्ण ठरली.
आत्माराम चव्हाण यांच्याकडून नियमांची उजळणी
प्रो-कबड्डी पंच आत्माराम चव्हाण यांनी
परीक्षार्थी पंचांची कबड्डीच्या नियमांवर सविस्तर उजळणी घेतली. सामन्यातील विविध
प्रसंग, नियमांचा योग्य वापर आणि निर्णय घेताना आवश्यक असलेली
अचूकता याबाबत त्यांनी पंचांना मार्गदर्शन केले. त्यांच्या मार्गदर्शनामुळे
परीक्षार्थी पंचांना नियमांच्या बारकाव्यांची पुन्हा एकदा प्रभावीपणे उजळणी करता
आली.
नयनाताई तावडे यांचे मोलाचे सहकार्य
पंच
परीक्षेसाठी शाळेचे वर्ग तसेच क्रीडांगण विनामूल्य उपलब्ध करून दिल्याबद्दल मुंबई
उपनगर कबड्डी असोसिएशनचे कार्याध्यक्ष सुधाकर घाग यांनी शाळेच्या संचालिका व
समाजसेविका नयनाताई शाम तावडे यांचे आभार मानले. कबड्डीच्या विकासासाठी
शैक्षणिक संस्थांनी पुढाकार घेऊन क्रीडा उपक्रमांना सहकार्य करणे ही निश्चितच
सकारात्मक बाब असल्याचे यावेळी अधोरेखित झाले.
पदाधिकाऱ्यांची उपस्थिती
यावेळी
प्रमुख कार्यवाह राजेश पडेलकर, कार्यकारिणी सदस्य सतीश चव्हाण, सुनील
खोपकर, मनोज मोकळ तसेच नवनिर्वाचित
पंच समितीचे सदस्य उपस्थित होते. परीक्षेच्या आयोजनासाठी संघटनेच्या पदाधिकारी व
पंच समितीने घेतलेल्या परिश्रमामुळे परीक्षा सुरळीतपणे पार पडली.
सक्षम पंचांशिवाय कबड्डीचा दर्जा उंचावणार नाही!
कबड्डीचा
खेळ अधिक दर्जेदार आणि शिस्तबद्ध करण्यासाठी सक्षम, प्रशिक्षित आणि नियमांचे सखोल ज्ञान असलेल्या पंचांची फळी निर्माण होणे
अत्यावश्यक आहे. अशा
परीक्षांमुळे पंचांना नियमांचे सखोल ज्ञान मिळते आणि त्यांच्या निर्णयक्षमतेसह पंच
म्हणून आवश्यक कौशल्यांमध्ये निश्चितच भर पडते, असा विश्वास नयनाताई शाम तावडे यांनी व्यक्त केला.
Post a Comment
0 Comments