शिवनेरी कबड्डी स्पर्धा २०२६ रिजनल स्पोर्ट्स बोर्डची विजयी भरारी; तिसऱ्या फेरीत धडक! माटुंगा वर्कशॉपचा ४२-१० असा धुव्वा; पुढील लढत बीपीटीशी पश्चिम रेल्वे, बीपीटी आणि मध्य रेल्वेचेही दमदार विजय महिला व कुमार गटांतही रंगतदार सामने

शिवनेरी कबड्डी स्पर्धा २०२६

रिजनल स्पोर्ट्स बोर्डची विजयी भरारी; तिसऱ्या फेरीत धडक!

माटुंगा वर्कशॉपचा ४२-१० असा धुव्वा; पुढील लढत बीपीटीशी

पश्चिम रेल्वे, बीपीटी आणि मध्य रेल्वेचेही दमदार विजय

महिला व कुमार गटांतही रंगतदार सामने

मुंबई : प्रतिस्पर्ध्यांना सावरण्याची संधीही न देता आक्रमक चढाया आणि भक्कम पकडींच्या जोरावर रिजनल स्पोर्ट्स बोर्डाने माटुंगा वर्कशॉपचा ४२-१० असा धुव्वा उडवत शिवनेरी कबड्डी महोत्सवाच्या व्यावसायिक गटाच्या तिसऱ्या फेरीत दिमाखात प्रवेश केला. अजिंक्य कापरेच्या पल्लेदार चढाया आणि साई केरूडच्या पोलादी पकडींनी रिजनलच्या विजयाचा पाया रचला. आता तिसऱ्या फेरीत रिजनल स्पोर्ट्स बोर्डासमोर बीपीटीचे आव्हान असेल. दुसरीकडे, बीपीटी, पश्चिम रेल्वे आणि मध्य रेल्वेनेही आपापल्या प्रतिस्पर्ध्यांना नमवत आगेकूच केली. कुमार आणि महिला गटांतही मोठ्या विजयांची नोंद झाल्याने शिवनेरीच्या मैदानावरील चुरस अधिकच वाढली.

 

अजिंक्यच्या चढाया, साईच्या पकडी; रिजनलचा दणदणीत विजय!

व्यावसायिक गटाच्या दुसऱ्या फेरीत रिजनल स्पोर्ट्स बोर्डाने माटुंगा वर्कशॉपवर ४२-१० अशी ३२ गुणांची मात केली. रिजनलकडून अजिंक्य कापरेने पल्लेदार चढायांनी गुणांची लयलूट केली, तर साई केरूडने अचूक आणि भक्कम पकडींनी प्रतिस्पर्ध्यांच्या चढाया रोखल्या. दोन्ही बाजूंनी प्रभावी खेळाची जोड मिळाल्याने रिजनलने सामन्यावर सुरुवातीपासून वर्चस्व राखले. या विजयासह रिजनलने तिसरी फेरी गाठली असून, आता त्यांचा सामना बीपीटीशी होणार आहे.

 

बीपीटीची मुंबई पोलिसांवर २५ गुणांनी मात

दुसऱ्या फेरीतील आणखी एका लढतीत बीपीटीने मुंबई पोलिसांचा ४५-२० असा २५ गुणांनी पराभव केला. बीपीटीकडून अनुराग सिंगने चढाईत, तर रूपेश साळुंखेने पकडीत प्रभावी कामगिरी केली. मुंबई पोलिसांकडून विजय घाडगेने चढायांमधून प्रतिकार करण्याचा प्रयत्न केला; मात्र बीपीटीच्या एकत्रित खेळापुढे त्यांचे आव्हान टिकले नाही.

 

पश्चिम रेल्वेची नेस्टजेनवर २० गुणांनी मात

पश्चिम रेल्वेने नेस्टजेन ॲकॅडमीचा ५३-३३ असा २० गुणांनी पराभव करत स्पर्धेतील आपली आगेकूच कायम ठेवली. पश्चिम रेल्वेकडून प्रणय राणेने चढाईत, तर आकाश शर्माने पकडीत दमदार खेळ केला. नेस्टजेन ॲकॅडमीकडून निखिल पुजारीने चढाईत, तर सुशांत वाघमोरेने पकडीत योगदान दिले. मात्र, पश्चिम रेल्वेने गुणांची आघाडी कायम राखत विजयावर शिक्कामोर्तब केले.

 

मध्य रेल्वेची रिझर्व्ह बँकेवर १४ गुणांनी सरशी

व्यावसायिक गटातील दुसऱ्या महत्त्वाच्या सामन्यात मध्य रेल्वेने रिझर्व्ह बँक ऑफ इंडियाचा ३४-२० असा १४ गुणांनी पराभव केला. मध्य रेल्वेकडून समीर भोगलेने चढाईत, तर राहुल परबने पकडीत चमक दाखवली. रिझर्व्ह बँकेकडून सुमित मिसाळने चढाईत, तर शंकर साळुंखेने पकडीत प्रतिकार केला; मात्र मध्य रेल्वेने सामन्यावरील पकड कायम ठेवत विजय मिळवला.

 

अमर क्रीडा मंडळाची श्रीरामवर २० गुणांनी मात

कुमार गटात अमर क्रीडा मंडळाने श्रीराम क्रीडा मंडळाचा ५३-३३ असा २० गुणांनी पराभव केला. अमरकडून साहिल बंगरने चढाईत, तर सागर राजपूतने पकडीत प्रभावी कामगिरी केली. श्रीरामकडून अमित सिंगने चढाईत, तर हर्ष काळेने पकडीत प्रतिस्पर्ध्यांना रोखण्याचा प्रयत्न केला. मात्र, अमरच्या आक्रमक खेळापुढे श्रीरामला पराभव स्वीकारावा लागला.

 

विजय क्लबची नवोदितवर नऊ गुणांनी मात

कुमार गटातील दुसऱ्या सामन्यात विजय क्लबने नवोदित क्रीडा मंडळाचा ३७-२८ असा नऊ गुणांनी पराभव केला. विजय क्लबकडून श्रेयान पुजारीने चढाईत, तर विजेंद्र यादवने पकडीत महत्त्वपूर्ण योगदान दिले. नवोदितकडून तनीक्ष चव्हाणने चढाईत, तर विघ्नेश गुरवने पकडीत चांगला खेळ केला. दोन्ही संघांत चुरस पाहायला मिळाली; अखेर विजय क्लबने सरशी साधली.

 

विवेक महिला संघाचा ३५ गुणांनी दणदणीत विजय

महिला गटात विवेक महिला संघाने जिजामाता महिला संघाचा ४२-७ असा तब्बल ३५ गुणांनी पराभव केला. विवेककडून हरजीत संधूने चढाईत, तर स्विटीने पकडीत प्रभावी खेळ केला. जिजामाताकडून वेदिका सावंतने चढाईत, तर कृतिका चव्हाणने पकडीत प्रतिकार करण्याचा प्रयत्न केला. मात्र, विवेकच्या एकतर्फी वर्चस्वापुढे जिजामाता संघाला मोठ्या पराभवाला सामोरे जावे लागले.

 

डॉ. शिरोडकर संघाची स्वामी समर्थवर २० गुणांनी मात

महिला गटातील दुसऱ्या सामन्यात डॉ. शिरोडकर संघाने स्वामी समर्थ महिला संघाचा ४५-२५ असा २० गुणांनी पराभव केला. डॉ. शिरोडकर संघाकडून साक्षी सावंतने चढाईत, तर श्रावणी घाडीगावकरने पकडीत प्रभावी कामगिरी केली. स्वामी समर्थकडून साक्षी जंगमने चढाईत, तर सई शिंदेने पकडीत योगदान दिले. शिरोडकर संघाने चढाई आणि पकड या दोन्ही आघाड्यांवर सरस खेळ करत विजय मिळवला.

 

संक्षिप्त धावफलक

व्यावसायिक गट

• रिजनल स्पोर्ट्स बोर्ड (४२) विजयी विरुद्ध माटुंगा वर्कशॉप (१०)
• बीपीटी (४५) विजयी विरुद्ध मुंबई पोलीस (२०)
• पश्चिम रेल्वे (५३) विजयी विरुद्ध नेस्टजेन ॲकॅडमी (३३)
• मध्य रेल्वे (३४) विजयी विरुद्ध रिझर्व्ह बँक ऑफ इंडिया (२०)

 

कुमार गट

• अमर क्रीडा मंडळ (५३) विजयी विरुद्ध श्रीराम क्रीडा विश्वस्त (३३)
• विजय क्लब (३७) विजयी विरुद्ध नवोदित क्रीडा मंडळ (२८)

 

महिला गट

• विवेक महिला संघ (४२) विजयी विरुद्ध जिजामाता महिला संघ (७)
• डॉ. शिरोडकर संघ (४५) विजयी विरुद्ध स्वामी समर्थ महिला संघ (२५)