Type Here to Get Search Results !

विक्रोळीच्या मैदानात कबड्डीचा महासंग्राम! २० नोव्हेंबरपासून ४४ वी मुंबई उपनगर जिल्हा अजिंक्यपद निवड चाचणी स्पर्धा पुरुष प्रथमश्रेणी, द्वितीयश्रेणी, महिला आणि व्यावसायिक गटांत रंगणार थरार ३० नोव्हेंबरपर्यंत रंगणार कबड्डीचा उत्सव



 

विक्रोळीच्या मैदानात कबड्डीचा महासंग्राम!

२० नोव्हेंबरपासून ४४ वी मुंबई उपनगर जिल्हा अजिंक्यपद निवड चाचणी स्पर्धा

पुरुष प्रथमश्रेणी, द्वितीयश्रेणी, महिला आणि व्यावसायिक गटांत रंगणार थरार

३० नोव्हेंबरपर्यंत रंगणार कबड्डीचा उत्सव

 

मुंबई : मुंबई उपनगरातील कबड्डीपटूंच्या कौशल्याला हक्काचे व्यासपीठ मिळवून देणाऱ्या जिल्हास्तरीय कबड्डीचा महासंग्राम विक्रोळीत रंगणार आहे. ४४ व्या जिल्हा अजिंक्यपद निवड चाचणी कबड्डी स्पर्धेचे आयोजन २० नोव्हेंबरपासून करण्यात आले असून, विविध गटांतील नामांकित संघांच्या सहभागामुळे मैदानावर चढाई-पकडीचा थरार, गुणांसाठीची झुंज आणि विजयासाठीची रणनीती पाहायला मिळणार आहे.

 

चार गटांत रंगणार स्पर्धेचा थरार

शिवसेना उद्धव बाळासाहेब ठाकरे शाखा क्रमांक १२३ आणि सुधीर मोरे मित्र मंडळाच्या संयुक्त विद्यमाने, मुंबई उपनगर कबड्डी असोसिएशनच्या सहकार्याने ही स्पर्धा आयोजित करण्यात आली आहे. स्पर्धेत प्रथमश्रेणी पुरुष, द्वितीयश्रेणी पुरुष, महिला आणि पुरुष व्यावसायिक अशा चार गटांतील सामने खेळविण्यात येणार आहेत. मुंबई उपनगरातील नामांकित संघ मैदानात उतरणार असल्याने प्रत्येक गटात विजेतेपदासाठी चुरस अपेक्षित आहे.

 

उद्धव ठाकरे, आदित्य ठाकरे यांच्यासह मान्यवरांची उपस्थिती

स्पर्धेच्या उद्घाटनप्रसंगी शिवसेना पक्षप्रमुख उद्धवसाहेब ठाकरे, शिवसेना नेते, युवासेना प्रमुख तथा आमदार आदित्यसाहेब ठाकरे, मुंबई उपनगर कबड्डी असोसिएशनचे अध्यक्ष अमोल कीर्तीकर आणि कार्याध्यक्ष सुधाकर घाग यांच्यासह विविध मान्यवर उपस्थित राहणार आहेत. मान्यवरांच्या उपस्थितीमुळे स्पर्धेला विशेष प्रतिष्ठा लाभणार आहे.

 

सुनील मोरे यांच्या पुढाकारातून आयोजन

स्पर्धेचे आयोजक युवा नगरसेवक सुनील मोरे असून, शाखा क्रमांक १२३ चे पदाधिकारी, कार्यकर्ते आणि सुधीर मोरे मित्र मंडळाचे सदस्य स्पर्धेच्या यशस्वी आयोजनासाठी मेहनत घेत आहेत. कबड्डी खेळाला प्रोत्साहन देणे, स्थानिक खेळाडूंना स्पर्धात्मक व्यासपीठ उपलब्ध करून देणे आणि नवोदित खेळाडूंना जिल्हास्तरावर आपली गुणवत्ता सिद्ध करण्याची संधी मिळवून देणे, हा या स्पर्धेच्या आयोजनामागील प्रमुख उद्देश आहे.

 

पार्कसाईटच्या महापालिका मैदानावर ११ दिवसांचा कबड्डी महोत्सव

२० ते ३० नोव्हेंबर २०२६ या कालावधीत विक्रोळी पश्चिम येथील महापालिका मैदान, कैलास कॉम्प्लेक्स रोड, पार्कसाईट येथे स्पर्धेचे सामने रंगणार आहेत. कबड्डीच्या प्रेमापोटी मैदानावर येणाऱ्या प्रेक्षकांचा उत्साह आणि खेळाडूंची जिद्द यामुळे विक्रोळी परिसरात क्रीडामय वातावरण निर्माण होणार आहे.

 

मुंबई उपनगरातील कबड्डीप्रेमी आणि क्रीडाप्रेमींनी मोठ्या संख्येने उपस्थित राहून खेळाडूंना प्रोत्साहन द्यावे, असे आवाहन आयोजकांच्या वतीने करण्यात आले आहे.


Post a Comment

0 Comments