महाराष्ट्र ओपन कॅरम चॅलेंजर्स स्पर्धेसाठी १० लाखांची बक्षिसे जाहिर

 

महाराष्ट्र ओपन कॅरम चॅलेंजर्स स्पर्धेसाठी १० लाखांची बक्षिसे जाहिर

 

मुंबई, महाराष्ट्र कॅरम असोसिएशनच्या वतीने दुसऱ्या महाराष्ट्र ओपन कॅरम चॅलेंजर्स ट्रॉफी २०२४-२०२५ स्पर्धेचे आयोजन १६ ते १८ डिसेंबर २०२४ दरम्यान महाराष्ट्र राज्य भारत स्काऊट हॉल, शिवाजी पार्क, दादर येथे करण्यात आले आहे. या स्पर्धेत पुरुष एकेरी आणि महिला एकेरी अशा दोन गटांमध्ये प्रतिस्पर्धा होणार आहे.

स्पर्धेतील पुरुष गटातील पहिल्या ३२ आणि महिला गटातील पहिल्या १६ विजेत्यांना एकत्रितपणे १० लाख रुपयांची रोख पारितोषिके दिली जातील. पुरुष गटातील विजेत्याला १ लाख ५० हजार रुपये, उपविजेत्याला १ लाख रुपये आणि तिसऱ्या क्रमांकाच्या खेळाडूला ७५ हजार रुपये व ट्रॉफी प्रदान करण्यात येईल. महिला गटातील विजेतीला १ लाख रुपये, उपविजेतीला ५० हजार रुपये आणि तिसऱ्या क्रमांकाच्या खेळाडूला ३० हजार रुपये व ट्रॉफी दिली जाईल.

याव्यतिरिक्त, स्पर्धेत पहिल्या फेरीपासून खेळाडूंनी केलेल्या व्हाईट स्लॅम आणि ब्लॅक स्लॅमसाठी विशेष रोख पारितोषिकाची घोषणा करण्यात आली आहे.

स्पर्धेतील सर्व खेळाडूंना महाराष्ट्र कॅरम असोसिएशनच्या वतीने गणवेश प्रदान करण्यात येईल, तसेच बाहेरगावहून आलेल्या खेळाडूंच्या निवास, चहापान आणि दुपारच्या जेवणाची व्यवस्था केली जाणार आहे.

स्पर्धेची संपूर्ण माहिती प्रवेश अर्जासोबत असलेल्या माहितीपत्रकात दिली आहे. प्रवेश अर्ज महाराष्ट्र कॅरम असोसिएशनच्या www.maharashtracarromassociation.com या संकेतस्थळावर उपलब्ध आहे. इच्छुक खेळाडूंनी आपली नावे २० नोव्हेंबर २०२४ पर्यंत नोंदवावीत. स्पर्धेतील सामन्यांचे थेट प्रक्षेपण महाराष्ट्र कॅरम असोसिएशनच्या संकेतस्थळावरून करण्यात येईल.