एमसीए क्रिक-किट फेअर 2024 - क्रिकेट चाहत्यांसाठी पर्वणी

 

एमसीए क्रिक-किट फेअर 2024 - क्रिकेट चाहत्यांसाठी पर्वणी

 

मुंबई, 9 डिसेंबर: मुंबई क्रिकेट असोसिएशनतर्फे (एमसीए) 13 आणि 14 डिसेंबर 2024 रोजी वानखेडे स्टेडियमवर एमसीए इक्विपमेंट फेअर (क्रिक-किट फेअर) आयोजित करण्यात आले आहे. हा मेळावा सकाळी 10:30 ते संध्याकाळी 5:30 वाजेपर्यंत सुरू राहणार आहे.

 

या दोन दिवसीय फेअरमध्ये देशभरातील आघाडीच्या क्रिकेट उपकरण उत्पादकांचा सहभाग असणार असून, मुंबई आणि आसपासच्या जिल्ह्यांतील क्रिकेटपटूंना अद्ययावत आणि परवडणाऱ्या किमतीत उपकरण खरेदी करण्याची अनोखी संधी मिळणार आहे.

 

फेअरचे उद्घाटन 13 डिसेंबर रोजी सकाळी 10:30 वाजता भारताचे माजी क्रिकेटपटू पारस म्हांब्रे यांच्या हस्ते होणार आहे. या प्रसंगी ऑस्ट्रेलियन कॉन्सुल जनरल पॉल मर्फी सन्माननीय अतिथी म्हणून उपस्थित राहतील.

 

सर्व क्रिकेटप्रेमींसाठी खास संधी:

या फेअरमध्ये अत्याधुनिक क्रिकेट उपकरणे खरेदीसाठी विशेष सवलती उपलब्ध असतील. क्रिकेट चाहत्यांसाठी इंटरॅक्टिव्ह सेशन्स, मनोरंजक क्रिकेटिंग गेम्स आणि उपकरणांबद्दल तज्ञांकडून मार्गदर्शनाची संधी देखील मिळणार आहे.

 

एमसीए अध्यक्ष अजिंक्य नाईक यांचे प्रतिपादन:

"युवा क्रिकेटपटूंना योग्य उपकरण निवडणे हा त्यांच्या यशस्वी प्रवासातील एक महत्त्वाचा टप्पा आहे," असे एमसीए अध्यक्ष अजिंक्य नाईक यांनी सांगितले. एमसीए क्रिक-किट फेअर 2024 हे नवोदित क्रिकेटपटूंना किट निवडण्यासाठी माहितीपूर्ण आणि परवडणारे व्यासपीठ देत आहे.

 

सर्व खेळाडू, प्रशिक्षक, आणि क्रिकेटप्रेमींनी या फेअरमध्ये सहभागी होऊन क्रिकेट उत्सवाचा आनंद घ्यावा, असे आवाहन त्यांनी केले आहे.