5वी अर्जुन मढवी स्मृती महिला चषक स्पर्धा ग्लोरियसचा दणदणीत विजय

 

5वी अर्जुन मढवी स्मृती महिला चषक स्पर्धा

ग्लोरियसचा दणदणीत विजय

 

ठाणे: ग्लोरियस क्रिकेट क्लबने दहिसर स्पोर्ट्स क्लबचा १३९ धावांनी दणदणीत पराभव करत डॉ. राजेश मढवी स्पोर्ट्स असोसिएशन आणि दैवज्ञ क्रिकेट क्लब आयोजित पाचव्या अर्जुन मढवी स्मृती एकदिवसीय महिला क्रिकेट स्पर्धेत आगेकूच केली. प्रथम फलंदाजी करताना ग्लोरियसने २१५ धावांचे भक्कम आव्हान उभे केले. प्रतिस्पर्ध्यांनी हा पाठलाग करताना २६.४ षटकांत केवळ ७६ धावांत संपूर्ण संघ गमावला.

 

ग्लोरियसकडून साध्वी संजय आणि श्रद्धा शेट्टी यांनी अर्धशतकी खेळी करत मोठ्या धावसंख्येचा पाया रचला. साध्वीने ७६ चेंडूत ७९ धावांची आक्रमक खेळी करत १२ चौकार ठोकले, तर श्रद्धाने ४७ चेंडूत ५० धावा करत आठ चौकारांची आतषबाजी केली. दहिसर स्पोर्ट्स क्लबकडून मुस्कान कनोजियाने ८ षटकांत ६४ धावा देत ३ बळी घेतले, तर शरण्या फडतेने २ बळी मिळवले.

 

ग्लोरियसने उभ्या केलेल्या आव्हानाचा पाठलाग करताना दहिसरच्या फलंदाजांना गोलंदाजांनी चांगलेच जखडून ठेवले. वैष्णवी वर्मा आणि अक्षरा पिल्लई यांनी प्रत्येकी ३ फलंदाज बाद करत प्रतिस्पर्ध्यांना पूर्णत: अडचणीत टाकले. पराभूत संघाकडून समिया हुसैनने सर्वाधिक १६ आणि तन्वी गावडेने १४ धावा केल्या.

 

संक्षिप्त धावफलक:

ग्लोरियस क्रिकेट क्लब: ३६.३ षटकांत सर्वबाद २१५

(साध्वी संजय ७९, श्रद्धा शेट्टी ५०; मुस्कान कनोजिया ८-६४-३, शरण्या फडते ८-३५-२, प्रिया मिसाळ ७.३-३९-१, समिया हुसैन ६-२२-१, रुक्षा पटेल ३-१७-१, पर्णीका सैल १-७-१)

 

दहिसर स्पोर्ट्स क्लब: २६.४ षटकांत सर्वबाद ७६

(समिया हुसैन १६, तन्वी गावडे १४; वैष्णवी वर्मा ६-२४-३, अक्षरा पिल्लई ४-१६-३, तृष्णा नारकर ४-८-१, समृद्धी घारे ७-१७-१)

 

सामन्यातील सर्वोत्कृष्ट खेळाडू: साध्वी संजय (ग्लोरियस क्रिकेट क्लब).