पुरुषोत्तम ढाल क्रिकेट स्पर्धा लवंदेच्या शतकाच्या जोरावर एमआयजी सीसी उपांत्य फेरीत

 

पुरुषोत्तम ढाल क्रिकेट स्पर्धा

लवंदेच्या शतकाच्या जोरावर एमआयजी सीसी उपांत्य फेरीत

मुंबई : सलामीवीर वरुण लवंदेच्या दिमाखदार शतकाच्या (101 धावा, 84 चेंडू, 12 चौकार, 4 षटकार) जोरावर एमआयजी क्रिकेट क्लबने मुंबई पोलीस जिमखान्यावर 7 विकेट राखून विजय मिळवत 108व्या स्पिनी-पुरुषोत्तम ढाल क्रिकेट स्पर्धेच्या उपांत्य फेरीत प्रवेश केला.

 

एमआयजी सीसी मैदान, वांद्रे येथे झालेल्या उपांत्यपूर्व फेरीत प्रथम फलंदाजी करताना मुंबई पोलीस जिमखाना संघाने 40.2 षटकांत सर्वबाद 174 धावा केल्या. सचिन रावने 46 धावांचे योगदान दिले. एमआयजी सीसीकडून डावखुरा फिरकीपटू श्रेयस गुरवने 29 धावांत 5 बळी घेत महत्त्वाची कामगिरी केली.

 

प्रत्युत्तरादाखल, एमआयजी सीसीने वरुण लवंदेच्या दमदार शतकाच्या जोरावर फक्त 28 षटकांत 3 विकेट गमावून विजय मिळवला. मागील सामन्यात शतक झळकावणाऱ्या ओम केशकामतने नाबाद 34 धावा करत विजयावर शिक्कामोर्तब केले.

 

अन्य लढत:

यजमान पी. जे. हिंदू जिमखान्याने एमसीए क्रिकेट अकॅडमीचा 9 विकेट राखून सहज पराभव करत उपांत्य फेरीत प्रवेश केला.

एमसीए क्रिकेट अकॅडमीचा डाव 27.3 षटकांत 125 धावांवर आटोपला. त्यांच्याकडून हर्षवर्धन बी. (46) आणि योगेश शिंदे (22) यांनी काहीसा प्रतिकार केला. हिंदू जिमखान्याकडून जितेंद्र पालीवाल (3/19), अथर्व भोसले (3/23), आणि राहुल सावंत (3/46) यांनी शानदार गोलंदाजी केली.

 

प्रत्युत्तरादाखल, हिंदू जिमखान्याने 21.5 षटकांत केवळ 1 विकेट गमावून लक्ष्य गाठले. एकनाथ केरकर (42), कौशिक चिकलीकर (39*), आणि सिद्धांत अदतराव (33*) यांच्या खेळीने संघाला सहज विजय मिळवून दिला.

 

संक्षिप्त धावफलक (उपांत्यपूर्व फेरी):

मुंबई पोलीस जिमखाना: 40.2 षटकांत सर्वबाद 174 (सचिन राव 46; श्रेयस गुरव 5/29)

एमआयजी सीसी: 28 षटकांत 3 बाद 178 (वरुण लवंदे 101 (84 चेंडू, 12 चौकार, 4 षटकार), ओम केशकामत 34*)

निकाल: एमआयजी सीसी 7 विकेट राखून विजयी.

 

एमसीए क्रिकेट अकॅडमी: 27.3 षटकांत सर्वबाद 125 (हर्षवर्धन बी. 46, योगेश शिंदे 22; जितेंद्र पालीवाल 3/19, अथर्व भोसले 3/23, राहुल सावंत 3/46)

पी. जे. हिंदू जिमखाना: 21.5 षटकांत 1 बाद 128 (एकनाथ केरकर 42, कौशिक चिकलीकर 39*, सिद्धांत अदतराव 33*)

निकाल: पी. जे. हिंदू जिमखाना 9 विकेट राखून विजयी.