खेलो इंडिया युवा स्पर्धेत महाराष्ट्राचा 'नेमबाज' पराक्रम! पार्थ-शांभवी जोडीचे सुवर्ण थेट निशाण्यावर!

खेलो इंडिया युवा स्पर्धेत महाराष्ट्राचा 'नेमबाज' पराक्रम! पार्थ-शांभवी जोडीचे सुवर्ण थेट निशाण्यावर!

 

बिहार : महाराष्ट्राच्या नेमबाज जोडीने ७व्या खेलो इंडिया युवा क्रीडा स्पर्धेत आपल्या अचूक लक्ष्याने सुवर्णाची चमक उधळली! पार्थ माने व शांभवी क्षीरसागर या जोडीने १० मीटर एअर रायफल मिश्र सांघिक प्रकारात जबरदस्त कामगिरी करत सुवर्ण पदकावर आपली मोहोर उमटवली.

 

कर्णी सिंग शुटिंग रेंजवर महाराष्ट्राचा ‘सुवर्ण’ ठसा!

नवी दिल्लीतील कर्णी सिंग शुटिंग रेंजवर पार पडलेल्या या स्पर्धेतील पात्रता फेरीपासूनच पार्थ व शांभवीने आपले वर्चस्व सिद्ध केले. ६३४.९ गुणांसह अव्वल स्थान पटकावून त्यांनी थेट अंतिम फेरीत धडक दिली. कर्नाटक, उत्तर प्रदेश व बिहारसारख्या बलाढ्य संघांना मागे टाकत महाराष्ट्राने मानांकन यादीत अग्रस्थान पटकावले.

 

सामन्यांवर पकड ठेवत मिळवले सुवर्ण

सुवर्णपदकासाठी अंतिम लढतीत महाराष्ट्र व कर्नाटक यांच्यात अटीतटीचा सामना झाला. मात्र, अनुभवी पार्थच्या संथ पण अचूक खेळाच्या साथीने शांभवीने उत्कृष्ट संयम दाखवित सामना हातात घेतला. या महाराष्ट्रीय जोडीने एकूण १६ गुणांची कमाई करत सुवर्णपदक आपल्या नावावर केले. कर्नाटकच्या प्रणव नरेन व हद्या कांदुर जोडीला १२ गुणांवर समाधान मानावे लागले. तर कांस्यपदकासाठी बिहारने उत्तर प्रदेशचा १६-१४ असा पराभव करत तिसरे स्थान पटकावले.

 

पार्थ माने – सुवर्णांची सलग मालिका!

रायगडचा पार्थ माने हा स्पर्धेतील चमकता तारा ठरत आहे. उत्तराखंडमध्ये नुकत्याच पार पडलेल्या राष्ट्रीय स्पर्धेतही त्याने सुवर्ण पदक पटकावले होते. खेळासोबतच शिक्षणातही पार्थने यश मिळवले असून नुकतीच बारावी उत्तीर्ण केल्यावरही तो युवा व वरिष्ठ गटात सुवर्ण जिंकणारा एकमेव राष्ट्रीय नेमबाज ठरला आहे. पनवेल येथील सुमा शिरूर यांच्या लक्ष्य ॲकॅडमीमध्ये तो नियमित सराव करतो आहे.

 

शांभवी क्षीरसागर – आत्मविश्वासाने झळकलेले नाव!

वैयक्तिक प्रकारातही आधीच सुवर्ण जिंकणाऱ्या शांभवीने मिश्र सांघिक प्रकारात देखील नेमबाजीत आपली अचूकता सिद्ध केली. संयम, फोकस आणि आत्मविश्वास यांच्या जोरावर तिने महाराष्ट्राच्या पदक खात्यात आणखी एक सुवर्ण नोंदवले.

 

नेमबाजीत महाराष्ट्राचा रोखमोक प्रहार!

या विजयानंतर महाराष्ट्राचे पदक खाते भक्कम झाले असून नेमबाजीतही महाराष्ट्र आता देशपातळीवर आघाडीवर झळकू लागला आहे. पार्थ आणि शांभवीसारख्या तरुण खेळाडूंनी भविष्यातील आंतरराष्ट्रीय यशाचे संकेतही दिले आहेत.

 

"नेम अचूक – लक्ष्य सुवर्ण!"

या जोडीच्या यशाबद्दल संपूर्ण महाराष्ट्राला अभिमान वाटावा, असे हे खेळगौरवाचे सुवर्णपर्व ठरले आहे!