पंकज अडवाणीचा केतन चावलावर झंझावाती विजय! एनएससीआय बॉल्कलाइन अखिल भारतीय स्नूकर स्पर्धेत जबरदस्त कामगिरी

 

पंकज अडवाणीचा केतन चावलावर झंझावाती विजय!
एनएससीआय बॉल्कलाइन अखिल भारतीय स्नूकर स्पर्धेत जबरदस्त कामगिरी

 

मुंबई : भारताचा सन्माननीय क्यू मास्टर पंकज अडवाणी याने पुन्हा एकदा आपल्या खेळातली बादशाही सिद्ध करत एनएससीआय बॉल्कलाइन अखिल भारतीय स्नूकर स्पर्धेच्या उपांत्यपूर्व फेरीत केतन चावलाला ७-१ असा दणदणीत पराभव दिला. बेस्ट ऑफ १३ फ्रेम्सच्या या नॉकआऊट सामन्यात अडवाणीने शेवटच्या चार फ्रेम्समध्ये अनुक्रमे ६३, ८२, ५७ आणि ६० गुणांचे ब्रेक्स साकारून आपल्या अनुभवाचा दबदबा दाखवून दिला.

 

३२ लाख रुपयांच्या एकूण बक्षिस रकमेची ही प्रतिष्ठेची स्पर्धा सध्या मुंबईच्या एनएससीआय डोम येथे रंगतदार वातावरणात सुरू आहे. अडवाणीच्या संयमित आणि तितक्याच आक्रमक खेळीसमोर केतन चावला पूर्णपणे निरुत्तर झाला.

 

अडवाणीचा एकतर्फी विजय (७-१) : ७२-२३, ८९-३९, ५६-६९ (५१) – एकमेव फ्रेम केतनच्या नावावर, ८४-२६, ९३ (६३)-३०, ९१ (८२)-०, ८८ (५७)-१३, ८६ (६०)-३१

 

इतर थरारक सामने :

हिमांशू जैन ने दिग्विजय काडियनचा ७-२ असा पराभव करत उपांत्य फेरी गाठली.

 

इशप्रीत सिंग चढ्ढानेही अनुभवी सौरव कोठारीला ७-२ असा हरवून आपले वर्चस्व सिद्ध केले.

कमल चावलाने मोहम्मद हुसेन खानला ६-३ ने हरवत शानदार ब्रेक्ससह (११९ गुणांचा ब्रेक) फॉर्म दाखवला.

आदित्य मेहताने ई. पांडूरंगाचा ६-१ असा फडशा उडवत पुढील फेरी गाठली.

विशेष म्हणजे, केतन चावलाने याआधी पारस गुप्ताविरुद्ध ६-५ असा थरारक सामना जिंकूनच उपांत्यपूर्व फेरी गाठली होती, मात्र अडवाणीसमोर त्याची एकही चाल लागू शकली नाही.

 

संपूर्ण स्पर्धेवर पंकज अडवाणीचा अनुभव व आत्मविश्वास गडदपणे अधोरेखित झाला आहे. आता सर्वांच्या नजरा उपांत्य व अंतिम फेऱ्यांतील भिडतीकडे लागल्या आहेत.