श्री मावळी मंडळ विभागीय खो-खो स्पर्धेत थरार, ताकद आणि तंत्राचा संगम! महिला गटात रा. फ. नाईक महिला खो-खो संघाचा एक गुणाने ऐतिहासिक विजय, पुरुष गटात शिर्सेकर्स महात्मा गांधी स्पोर्ट्स अकॅडेमीचे निर्विवाद वर्चस्व खो-खोच्या मैदानावर उसळला जिगरबाज संघर्ष

 

श्री मावळी मंडळ विभागीय खो-खो स्पर्धेत थरार, ताकद आणि तंत्राचा संगम!

महिला गटात रा. फ. नाईक महिला खो-खो संघाचा एक गुणाने ऐतिहासिक विजय, पुरुष गटात शिर्सेकर्स महात्मा गांधी स्पोर्ट्स अकॅडेमीचे निर्विवाद वर्चस्व

खो-खोच्या मैदानावर उसळला जिगरबाज संघर्ष

 

ठाणे : ठाण्याच्या क्रीडाप्रेमींना थराराचा उत्कट अनुभव देणाऱ्या श्री मावळी मंडळ, ठाणे आयोजित द्वितीय विभागीय खो-खो स्पर्धा दिनांक १७ व १८ जानेवारी रोजी संस्थेच्या क्रीडांगणावर प्रचंड उत्साहात पार पडल्या. वेग, चपळता, रणनीती आणि अखेरच्या क्षणापर्यंत श्वास रोखून धरणारा खेळ यामुळे या स्पर्धांनी खो-खो रसिकांचे लक्ष वेधून घेतले.

 

अंतिम निकालांचा थरार : महिला व पुरुष गटातील विजेते

या स्पर्धेत महिला गटात रा. फ. नाईक महिला खो-खो संघ (ठाणे) तर पुरुष गटात शिर्सेकर्स महात्मा गांधी स्पोर्ट्स अकॅडेमी (मुंबई उपनगर) यांनी विजेतेपद पटकावले. महिला गटात ज्ञानविकास स्पोर्ट्स फॉउंडेशन (ठाणे) तर पुरुष गटात विहंग क्रीडा केंद्र (ठाणे) यांनी उपविजेतेपद मिळवले.

 

महिला अंतिम सामना : एक गुण आणि तीन सेकंदांनी ठरले नशीब

महिला गटातील अंतिम सामना अक्षरशः नखशिखांत थराराने भरलेला ठरला. रा. फ. नाईक महिला खो-खो संघाने ज्ञानविकास स्पोर्ट्स फॉउंडेशन संघावर १०–०९ असा एक गुण व ३ सेकंद राखून विजय मिळवला. नाणेफेक जिंकून रा. फ. नाईक संघाने संरक्षण स्वीकारले. मध्यंतरापर्यंत सामना ५–५ असा बरोबरीत होता. विजयी रा. फ. नाईक कडून वैष्णवी जाधव (२, २ मि. संरक्षण व ३ गुण), प्रणिती जगदाळे (१.१०, १.४० मि. संरक्षण व १ गुण), पूजा फरगडे (३.१० मि. संरक्षण व १ गुण), साक्षी तोरणे (२, १ मि. संरक्षण) व गीतांजली नरसाळे (४ मि. संरक्षण) यांनी निर्णायक कामगिरी केली. पराभूत ज्ञानविकास संघाकडून धनश्री कंक (२.३०, २.१० मि. संरक्षण व ३ गुण), तेजस्वी पोखरकर (२.१०, २.२० मि. संरक्षण व २ गुण), रोशनी जुनघरे (२.१०, १.३० मि. संरक्षण) व प्राची वांगडे (१.३० मि. संरक्षण व १ गुण) यांनी कडवी लढत जिवंत ठेवली.

 

पुरुष अंतिम सामना : शिर्सेकर्स अकॅडेमीची आक्रमक घौडदौड

पुरुष गटातील अंतिम सामन्यात शिर्सेकर्स महात्मा गांधी स्पोर्ट्स अकॅडेमीने विहंग क्रीडा केंद्रावर १६–११ असा पाच गुणांनी दणदणीत विजय मिळवला. विहंग संघाने नाणेफेक जिंकून संरक्षण निवडले; मात्र मध्यंतरापर्यंत शिर्सेकर्स संघाने ९–४ अशी पाच गुणांची आघाडी घेतली. विजयी शिर्सेकर्स महात्मा गांधी कडून धीरज भावे (२.१०, १.४० मि. संरक्षण व १ गुण), अनिकेत पोटे (१.३०, १.२० मि. संरक्षण व ३ गुण), प्रतीक देवरे (१.३० मि. संरक्षण व २ गुण), रामचंद्र झोरे (२ मि. संरक्षण व १ गुण) व निहार दुबळे (३ गुण) यांनी निर्णायक भूमिका बजावली. पराभूत विहंग कडून आकाश तोगरे (१.१०, २.२० मि. संरक्षण व १ गुण), आदित्य कांबळे (१.४० मि. संरक्षण व १ गुण), सागर मोहंडकर (१.१० मि. संरक्षण) व वैभव मोरे (१.३० मि. संरक्षण व २ गुण) यांनी झुंज दिली.

 

समारोप सोहळा : मान्यवरांच्या उपस्थितीत पारितोषिक वितरण

स्पर्धेचा समारोप व पारितोषिक वितरण समारंभ मा. श्री. सुधीर कोकाटे (नगरसेवक – शिवसेना) व मा. श्री. सुहास जोशी (ज्येष्ठ पत्रकार) यांच्या शुभहस्ते पार पडला. यावेळी संस्थेचे अध्यक्ष श्री. सुधाकर मोरे, उपाध्यक्ष श्री. मनीष मुंदडा, चिटणीस श्री. रमण गोरे, सहाय्यक चिटणीस श्री. चिंतामणी पाटील, विश्वस्त श्री. कृष्णा डोंगरे व श्री. केशव मुकणे उपस्थित होते.

 

पारितोषिक विजेते – महिला गट

विजेता : रा. फ. नाईक महिला खो-खो संघ (ठाणे), उपविजेता : ज्ञानविकास स्पोर्ट्स फॉउंडेशन (ठाणे), तृतीय : शिर्सेकर्स महात्मा गांधी स्पोर्ट्स अकॅडेमी (मुंबई उपनगर), चतुर्थ : शिवभक्त स्पोर्ट्स क्लब (ठाणे)

उदयोन्मुख खेळाडू : गुड्डी राठोड (शिवभक्त स्पोर्ट्स क्लब, ठाणे)

उत्कृष्ट संरक्षक : गीतांजली नरसाळे (रा. फ. नाईक संघ)

उत्कृष्ट आक्रमक : धनश्री कंक, श्वेता जाधव (ज्ञानविकास)

अष्टपैलू खेळाडू : वैष्णवी जाधव (रा. फ. नाईक संघ)

 

पारितोषिक विजेते – पुरुष गट

विजेता : शिर्सेकर्स महात्मा गांधी स्पोर्ट्स अकॅडेमी (मुंबई उपनगर), उपविजेता : विहंग क्रीडा केंद्र (ठाणे), तृतीय : श्री सह्याद्री संघ (मुंबई उपनगर), चतुर्थ : श्री मावळी मंडळ (ठाणे)

उदयोन्मुख खेळाडू : शुभम ढगळे (युवक क्रीडा केंद्र, ठाणे)

उत्कृष्ट संरक्षक : लक्ष्मण गवस (विहंग क्रीडा केंद्र)

उत्कृष्ट आक्रमक : निहार दुबळे (शिर्सेकर्स अकॅडेमी)

अष्टपैलू खेळाडू : धीरज भावे (शिर्सेकर्स अकॅडेमी)

 

थरार, शिस्तबद्ध खेळ आणि खेळाडूंच्या जिगरबाज कामगिरीमुळे श्री मावळी मंडळाची ही विभागीय खो-खो स्पर्धा ठाण्याच्या क्रीडा इतिहासात सुवर्णाक्षरांनी नोंदली गेली.