डाटामॅटिक्स आणि सेंट्रल बँकेची दणदणीत घोडदौड! इन्श्युरन्स शील्ड टी-२० स्पर्धेत प्रतिस्पर्ध्यांचा धुव्वा उपांत्यपूर्व फेरीत रंगत वाढली

 

डाटामॅटिक्स आणि सेंट्रल बँकेची दणदणीत घोडदौड!

इन्श्युरन्स शील्ड टी-२० स्पर्धेत प्रतिस्पर्ध्यांचा धुव्वा

उपांत्यपूर्व फेरीत रंगत वाढली

 

मुंबई: चौकार-षटकारांची आतषबाजी, अचूक गोलंदाजीचा कहर आणि दमदार संघभावना इन्श्युरन्स शील्ड टी-२० क्रिकेट स्पर्धेत काल विजयाचा जल्लोष अनुभवायला मिळाला! डाटामॅटिक्स आणि सेंट्रल बँक या दोन्ही संघांनी प्रतिस्पर्ध्यांवर वर्चस्व गाजवत स्पर्धेत आपली दावेदारी भक्कम केली.

 

डाटामॅटिक्सचा ९ विकेट्सनी धडाकेबाज विजय

पहिल्या सामन्यात डाटामॅटिक्स संघाने बँक ऑफ महाराष्ट्रचा तब्बल ९ विकेट्स राखून पराभव करत एकतर्फी लढत रंगवली. प्रथम फलंदाजी करताना बँक ऑफ महाराष्ट्रचा डाव केवळ ९२ धावांवर आटोपला.

गोलंदाजीत कल्पेश सावंत आणि रोहिदास कोयंडे यांनी अफलातून कामगिरी करत प्रतिस्पर्ध्यांच्या फलंदाजांना कोंडीत पकडले. कल्पेश सावंत – १४ धावांत ४ बळी तर रोहिदास कोयंडे – १३ धावांत ३ बळी

९२ धावांचे लक्ष्य डाटामॅटिक्सने अवघ्या ९.३ षटकांत पूर्ण करत विजयावर शिक्कामोर्तब केले. भुवन पाटील – ३० चेंडूंत ५० धावा व उपेंद्र यादव – २५ चेंडूंत ३६ धावा

या दोघांच्या आक्रमक फलंदाजीमुळे सामना एकतर्फी ठरला.

 

सेंट्रल बँकेची एलिट गटात विजयी कामगिरी

एलिट गटातील दुसऱ्या सामन्यात सेंट्रल बँक संघाने यजमान ओरिएंटल इन्श्युरन्सवर २५ धावांनी विजय मिळवला. प्रथम फलंदाजी करताना सेंट्रल बँकेने १५८ धावा उभारल्या. प्रथम परमार – ५८ धावा (तडाखेबंद खेळी) व गौतम साठे – २३ चेंडूंत ३६ धावा या दोघांच्या दमदार भागीदारीने डावाला भक्कम पाया भरणी करून दिली.

 

ओरिएंटलचा प्रतिकार अपुरा

१५८ धावांचे आव्हान स्वीकारताना ओरिएंटल इन्श्युरन्सने ६० धावांची सलामी दिली. मात्र मधल्या फळीतील फलंदाजांना सातत्य राखता आले नाही. समीप मिसाळ – ३१ चेंडूंत नाबाद ४१ धावा व शंतनु तांडाले – ४० धावा या दोघांनी झुंजार प्रयत्न केले; परंतु धावगती मंदावल्याने संघाला विजयासाठी २५ धावा कमी पडल्या. गोलंदाजीत राजेश बोरकरने २ बळी घेत निर्णायक भूमिका बजावली.

 

६ मार्चला उपांत्यपूर्व फेरी

स्पर्धेची रंगत आता अधिक वाढणार असून उपांत्यपूर्व फेरीचे सामने ६ मार्च रोजी खेळवण्यात येणार आहेत. डाटामॅटिक्स आणि सेंट्रल बँकेच्या विजयी लाटेमुळे पुढील सामने अधिकच रोमांचक होणार, यात शंका नाही! इन्श्युरन्स शील्ड टी-२० स्पर्धा आता उत्कंठेच्या शिखरावर पोहोचली असून क्रिकेटप्रेमींसाठी पुढील सामने म्हणजे एक पर्वणीच ठरणार आहे!