ज्येष्ठ शिक्षिका सुरेखा कडवे स्मृती शालेय बुद्धिबळ
स्पर्धा ७ मार्चला परळमध्ये!
आयडियल स्पोर्ट्स अकॅडमीचा अनोखा उपक्रम;
१३ वर्षाखालील मुलामुलींसाठी ६ गटांत रंगणार जलद बुद्धिबळ
महोत्सव
मुंबई – बुद्धिबळाच्या पटावर बुध्दीचा संग्राम रंगणार,
मातृशक्तीचा सन्मान होणार आणि शालेय बुद्धिबळपटूंना आपल्या
कौशल्याची चमक दाखवण्याची सुवर्णसंधी मिळणार! आयडियल स्पोर्ट्स अकॅडमी-ग्रुपतर्फे
आयोजित ज्येष्ठ
शिक्षिका स्व. सुरेखा कडवे स्मृती शालेय बुद्धिबळ स्पर्धा
येत्या ७ मार्च रोजी सकाळी ९ वाजता परळ येथील आरएमएमएस वातानुकुलीन सभागृहात उत्साहात पार
पडणार आहे. १३ वर्षाखालील मुलामुलींसाठी आयोजित ही स्पर्धा बुद्धिबळप्रेमींसाठी
पर्वणी ठरणार आहे.
६ वयोगट, १२० पुरस्कार आणि मातृसन्मानाची अनोखी परंपरा
ही जलद बुद्धिबळ स्पर्धा मुला-मुलींसाठी स्वतंत्र ६ वयोगटांमध्ये
होणार असून एकूण १२० आकर्षक पुरस्कार देण्यात येणार आहेत. विशेष म्हणजे जागतिक महिला दिनाचे
औचित्य साधून प्रत्येक गटातील प्रथम क्रमांक पटकावणाऱ्या स्पर्धकांच्या मातांना ‘स्व.
सुरेखा कडवे स्मृती सन्मानचिन्ह’ देऊन गौरविण्यात येणार आहे.
आयडियल संस्थेच्या सल्लागार स्व. सुरेखा कडवे यांच्या
स्मृतीला अभिवादन करण्यासाठी आणि मातृशक्तीचा सन्मान करण्यासाठी हा अभिनव उपक्रम
राबविण्यात येत असल्याची माहिती कार्याध्यक्ष गोविंदराव मोहिते यांनी दिली.
स्विस लीग पद्धतीत ४ फेऱ्यांचा बुद्धिबळ संग्राम
राष्ट्रीय मिल मजदूर संघ आणि मुंबई शहर जिल्हा बुद्धिबळ
संघटनेच्या सहकार्याने आयोजित या स्पर्धेत ७, १० आणि १३ वर्षाखालील मुलामुलींच्या स्वतंत्र ६ गटांमध्ये
सामने रंगतील. स्पर्धा स्विस लीग पद्धतीने किमान ४ फेऱ्यांमध्ये
होणार असून प्रत्येक फेरीसाठी १५ मिनिटे + ३ सेकंद इन्क्रिमेंट अशी वेळमर्यादा असेल.
संयोजकांतर्फे सर्व स्पर्धकांना बुद्धिबळ पट व घड्याळाची सुविधा उपलब्ध करून देण्यात येणार आहे,
त्यामुळे खेळाडूंना केवळ आपल्या खेळावर लक्ष केंद्रित करता
येणार आहे.
प्रवेशासाठी संपर्काची अंतिम तारीख १ मार्च
स्पर्धेत सहभागी होऊ इच्छिणाऱ्या खेळाडूंनी प्रवेश अर्ज व
अधिक माहितीसाठी शिवछत्रपती पुरस्कार प्राप्त लीलाधर चव्हाण किंवा मुंबई शहर जिल्हा बुद्धिबळ संघटनेचे सेक्रेटरी
राजाबाबू गजेंगी (९३२४७ १९२९९)
यांच्याशी १ मार्चपर्यंत व्हॉटसअॅपवर संपर्क साधावा,
असे आवाहन आयोजकांनी केले आहे.
बुद्धिबळाच्या पटावरून घडणार नवे तारे
शालेय स्तरावर बुद्धिबळाची गोडी वाढविणे,
नवोदितांना प्रोत्साहन देणे आणि बुद्धिमत्तेचा सन्मान करणे
हा या स्पर्धेचा मुख्य हेतू आहे. परळमध्ये रंगणारा हा बुद्धिबळ महोत्सव नक्कीच
भविष्यातील राष्ट्रीय व आंतरराष्ट्रीय बुद्धिबळपटू घडविण्याच्या दिशेने
महत्त्वपूर्ण पाऊल ठरणार आहे.
Post a Comment
0 Comments