प्रथमच खेळणाऱ्या राज चारीची झुंज व्यर्थ नीलेश संगरचा थरारक विजय सीसीआय स्नूकर क्लासिक २०२६ स्पर्धेत चुरशीच्या लढती आशीष गोरे, सुकील व्यंकटरमणी, राहुल नारंग यांची विजयी आगेकूच

 

प्रथमच खेळणाऱ्या राज चारीची झुंज व्यर्थ

नीलेश संगरचा थरारक विजय

सीसीआय स्नूकर क्लासिक २०२६ स्पर्धेत चुरशीच्या लढती आशीष गोरे, सुकील व्यंकटरमणी, राहुल नारंग यांची विजयी आगेकूच

मुंबई : मुंबईतील प्रतिष्ठित क्रिकेट क्लब ऑफ इंडिया (सीसीआय) च्या विल्सन जोन्स बिलियर्ड्स हॉलमध्ये सुरू असलेल्या सीसीआय स्नूकर क्लासिक २०२६ स्पर्धेत बुधवारी रंगलेल्या सामन्यांनी प्रेक्षकांना अक्षरशः खिळवून ठेवले. प्रथमच या स्पर्धेत उतरलेल्या राज चारीने दमदार झुंज दिली; मात्र निर्णायक क्षणी नीलेश संगरने अचूक खेळ करत ३-२ असा विजय मिळवत पुढील फेरीत प्रवेश केला.

 

राज चारीचे दमदार पुनरागमन, पण नीलेश संगरची निर्णायक सरशी

अत्यंत चुरशीच्या झालेल्या सामन्यात नीलेश संगरने राज चारीचा ३-२ (५९-४४, ४४-३८, २४-५१, १९-५४, ६८-१७) असा पराभव केला. पहिल्या दोन फ्रेममध्ये नीलेशने आघाडी घेतली; मात्र राज चारीने पुढील दोन फ्रेम जिंकत शानदार पुनरागमन केले आणि सामना निर्णायक टप्प्यावर नेला. अखेरच्या फ्रेममध्ये मात्र नीलेश संगरने उत्कृष्ट खेळ करत विजयावर शिक्कामोर्तब केले.

 

सुकील व्यंकटरमणीचा अजित घरतवर सहज विजय

अन्य लढतीत सुकील व्यंकटरमणीने स्थिर आणि अचूक खेळ करत अजित घरतचा ३-० (५६-३६, ६५-५१, ५७-५५) असा पराभव केला. सामन्याच्या तिन्ही फ्रेममध्ये व्यंकटरमणीने संयम राखत प्रतिस्पर्ध्याला संधी न देता विजय निश्चित केला.

 

वीर सिंग नागी, विवेक नारायण यांची प्रभावी कामगिरी

इतर सामन्यांत वीर सिंग नागीने शुभोजित रॉयवर ३-१ (३६-७५, ५५-३३, ६१-४७, ६०-५५) अशी मात केली. विवेक नारायणनेही चुरशीच्या लढतीत प्रणव देसाईवर ३-२ (५९-१०, २९-६३, ५७-४८, ४८-६८, ८१-५२) असा विजय मिळवत पुढील फेरीत धडक मारली.

 

आशीष गोरे, कल्पेश मेवाडा यांची एकतर्फी सरशी

या फेरीत आशीष गोरेने मोहसिन शेखवर ३-० (४५-३४, ६१-५३, ६६-२३) असा सहज विजय मिळवला. त्याचप्रमाणे कल्पेश मेवाडाने सागर देसाईचा ३-० (५४-५०, ८४-५३, ७४-३६) असा पराभव करत आपले वर्चस्व सिद्ध केले.

 

अशोक रामटेके आणि राहुल नारंग यांची विजयी आगेकूच

इतर सामन्यांमध्ये अशोक रामटेकेने निखिलेश पिल्लईवर ३-१ (५९-१८, २०-६०, ५४-४९, ७९-७२) अशी मात केली. तर राहुल नारंगने अनंत मेहतावर ३-१ (५०-४०, ४१-४४, ६२-११, ६०-३०) असा विजय मिळवत पुढील फेरीत स्थान निश्चित केले.

 

सीसीआयमध्ये सुरू असलेल्या सीसीआय स्नूकर क्लासिक २०२६ स्पर्धेत दररोज रंगणाऱ्या अशा चुरशीच्या लढतींमुळे स्पर्धेची रंगत अधिकच वाढत असून पुढील फेरीत आणखी थरारक सामने पाहायला मिळण्याची अपेक्षा आहे.