पार्ले स्पोर्ट्स, वाघजाई, एसएसजी, ब्रम्हाची उपांत्यपूर्व फेरीत धडक राजाभाऊ देसाई स्मृती चषक कबड्डीत साखळी फेरीत थरारक चढाओढ

 

पार्ले स्पोर्ट्स, वाघजाई, एसएसजी, ब्रम्हाची उपांत्यपूर्व फेरीत धडक

राजाभाऊ देसाई स्मृती चषक कबड्डीत साखळी फेरीत थरारक चढाओढ

 

मुंबई, (क्री. प्र.) – प्रभादेवीच्या चवन्नी गल्लीतील बळीराम सावंत क्रीडानगरीत सुरू असलेल्या स्वामी समर्थ क्रीडा मंडळाच्या राजाभाऊ देसाई स्मृती चषक कबड्डी स्पर्धेच्या तिसऱ्या दिवशी मैदानावर चढाई-पकडींचा जबरदस्त थरार रंगला. साखळी फेरीतील निर्णायक लढतींमध्ये पार्ले स्पोर्ट्स अ‍ॅकॅडमी, गोल्फादेवी सेवा मंडळ, एसएसजी फाऊंडेशन, ब्रम्हा स्पोर्ट्स क्लब, वाघजाई क्रीडा मंडळ आणि स्वस्तिक क्रीडा मंडळ यांनी दमदार खेळ करत उपांत्यपूर्व फेरीत आपले स्थान पक्के केले. प्रत्येक सामन्यात आक्रमक चढाया, झुंजार पकडी आणि अखेरच्या क्षणापर्यंत रंगलेली झुंज यामुळे प्रेक्षकांना कबड्डीचा रोमांचकारी आनंद मिळाला.

 

ब्रम्हा स्पोर्ट्सचा धडाकेबाज खेळ, गटविजेतेपदावर शिक्कामोर्तब

बाद फेरी गाठण्यासाठी झालेल्या महत्त्वाच्या सामन्यांमध्ये ब्रम्हा स्पोर्ट्स क्लबने अक्षरशः धडाकेबाज कामगिरी करत सिद्धीप्रभा फाऊंडेशनचा ४८-१३ असा एकतर्फी पराभव केला आणि गटविजेतेपद पटकावत थेट उपांत्यपूर्व फेरीत प्रवेश केला. त्यानंतरच्या सामन्यातही ब्रम्हाने जोरदार खेळ करत अंकूर स्पोर्ट्स क्लबचा ५२-३२ असा फडशा पाडला. या विजयात प्रफुल झवरे आणि आकाश शिंदे यांच्या सुसाट चढायांनी संघाला मोठी आघाडी मिळवून दिली. मध्यंतरालाच ३१-१८ अशी आघाडी घेत ब्रम्हाने सामना जवळजवळ खिशात टाकला होता. अंकूरकडून सुशांत साईलने काहीशी झुंजार लढत दिली, मात्र ती अपुरी ठरली.

 

शार्दुल पाटीलची २३ गुणांची कमाल

दुसऱ्या महत्त्वाच्या सामन्यात गुड मॉर्निंग स्पोर्ट्स क्लबने लायन्स स्पोर्ट्स क्लबचा ४५-३२ असा पराभव करत शानदार विजय मिळवला. या विजयाचा शिल्पकार ठरला तो शार्दुल पाटील, ज्याने आक्रमक चढायांच्या जोरावर तब्बल २३ गुणांची कमाई करत सामन्याचे पारडे आपल्या संघाकडे झुकवले. लायन्सकडून राज आचार्यने चांगली झुंज दिली, परंतु गुड मॉर्निंगच्या आक्रमणापुढे ती निष्फळ ठरली.

 

स्वस्तिकचा जयभारतवर विजय, उपांत्यपूर्व फेरीत प्रवेश

स्वस्तिक क्रीडा मंडळ आणि जयभारत यांच्यातील लढतही तितकीच रंगतदार ठरली. स्वस्तिककडून अक्रम शेख, आकाश रुदाले, अशोक विटकर आणि प्रफुल चव्हाण यांनी चढाई-पकडींचा भन्नाट खेळ सादर करत जयभारतला संधीच दिली नाही. अखेर स्वस्तिकने ३७-२३ असा विजय मिळवत उपांत्यपूर्व फेरीत धडक मारली. आता पुढील फेरीत त्यांना पार्ले स्पोर्ट्स अ‍ॅकॅडमीशी सामना करावा लागणार आहे.

 

गोल्फादेवीचा सहज विजय, नवोदित संघाचा पराभव

गोल्फादेवी सेवा मंडळनेही दमदार खेळ करत नवोदित संघाचा पराभव करून उपांत्यपूर्व फेरीत स्थान निश्चित केले. धनंजय सरोज, सिद्धेश पिंगळे आणि सनी कोळी यांच्या आक्रमक खेळामुळे गोल्फादेवीने हा सामना सहज जिंकला. नवोदित संघाकडून संतोष ठाकूरने १२ गुणांची कमाई करत एकाकी झुंज दिली, मात्र त्याचा प्रयत्न संघाला विजय मिळवून देण्यासाठी अपुरा ठरला.

 

उपांत्यपूर्व फेरीतील रंगतदार लढती सज्ज

आता स्पर्धेत उपांत्यपूर्व फेरीच्या रंगतदार लढती रंगणार आहेत. त्यामध्ये पार्ले स्पोर्ट्स अ‍ॅकॅडमी विरुद्ध स्वस्तिक क्रीडा मंडळ आणि गोल्फादेवी सेवा मंडळ विरुद्ध वाघजाई क्रीडा मंडळ अशा प्रमुख लढती होतील. तसेच अंकूर स्पोर्ट्स क्लब आणि गुड मॉर्निंग स्पोर्ट्स क्लब यांच्यातील विजेता संघ एसएसजी फाऊंडेशनशी टक्कर देईल. चौथ्या उपांत्यपूर्व सामन्यात विजय क्लब आणि इच्छाशक्ती यांच्यातील विजयी संघाला ब्रम्हा स्पोर्ट्स क्लबच्या आव्हानाला सामोरे जावे लागणार आहे. त्यामुळे पुढील फेरीत कबड्डीप्रेमींना आणखी रोमांचक आणि थरारक सामने पाहायला मिळणार आहेत.