ऋतुराज, आशीष आणि झेनुलचे चुरशीच्या लढतीत शानदार विजय सीसीआय स्नूकर क्लासिक २०२६ स्पर्धेत पात्रता फेरीत रंगले रोमांचक सामने विल्सन जोन्स बिलियर्ड्स हॉलमध्ये थरारक लढतींनी रंगत

 

ऋतुराज, आशीष आणि झेनुलचे चुरशीच्या लढतीत शानदार विजय

सीसीआय स्नूकर क्लासिक २०२६ स्पर्धेत पात्रता फेरीत रंगले रोमांचक सामने

विल्सन जोन्स बिलियर्ड्स हॉलमध्ये थरारक लढतींनी रंगत

 

मुंबई: क्रिकेट क्लब ऑफ इंडिया (सीसीआय) येथे सुरू असलेल्या सीसीआय स्नूकर क्लासिक २०२६ स्पर्धेतील पात्रता फेरीत सोमवारी रंगलेल्या सामन्यांत ऋतुराज कर्नाड, आशीष गोरे आणि झेनुल अर्सिवाला यांनी चुरशीच्या लढतीत दमदार विजय मिळवत पुढील फेरीत धडक मारली. विल्सन जोन्स बिलियर्ड्स हॉलमध्ये झालेल्या या सामन्यांत खेळाडूंनी अचूक शॉट्स, संयम आणि कौशल्याचा सुरेख मिलाफ दाखवत प्रेक्षकांना रोमांचक अनुभव दिला.

 

ऋतुराज कर्नाडचा नौजद मुन्शीवर ३-२ असा नाट्यमय विजय

अत्यंत चुरशीच्या झालेल्या सामन्यात ऋतुराज कर्नाडने नौजद मुन्शीचा ३-२ (५२-७१, ६७-३१, ६६-२८, ४४-५९, ५५-१७) असा पराभव केला. पहिला फ्रेम मुन्शीने जिंकत आघाडी घेतली; मात्र ऋतुराजने पुढील दोन फ्रेम जिंकत शानदार पुनरागमन केले. चौथा फ्रेम मुन्शीने जिंकून सामना बरोबरीत आणला, परंतु निर्णायक फ्रेममध्ये ऋतुराजने शांतपणे आणि अचूक खेळ करत विजयावर शिक्कामोर्तब केले.

 

आशीष गोरेची प्रदीप जाधववर मात

दुसऱ्या एका रंगतदार सामन्यात आशीष गोरेने प्रदीप जाधववर ३-२ (५७-५२, १३-५३, ६१-४४, १५-५८, ४८-४४) असा थरारक विजय मिळवला. सामन्यात दोन्ही खेळाडूंनी आलटून-पालटून फ्रेम जिंकत प्रेक्षकांची उत्कंठा वाढवली. अखेरच्या निर्णायक फ्रेममध्ये आशीषने अचूक शॉट्सच्या जोरावर सामना आपल्या नावावर केला.

 

झेनुल अर्सिवालाचे दमदार पुनरागमन

झेनुल अर्सिवालाने पहिला फ्रेम गमावल्यानंतरही शानदार पुनरागमन करत प्रसाद वानखेडकरला ३-१ (२२-६४, ५४-३६, ५२-११, ६१-११) असे पराभूत केले. पहिल्या फ्रेमनंतर झेनुलने पुढील तीनही फ्रेमवर पूर्ण वर्चस्व गाजवत प्रभावी विजय मिळवला.

 

इमदाद खान आणि एजाज मर्चंट पुढील फेरीत

इतर सामन्यांत इमदाद खानने मिथुन मर्चंटवर ३-० (५७-१३, ५०-४०, ५३-९) असा सहज विजय मिळवत आपले वर्चस्व सिद्ध केले. तर एजाज मर्चंटने मनन शाहचा ३-१ (५२-३९, ६६-१, ३२-७४, ७२-३४) असा पराभव करून पुढील फेरीत प्रवेश केला.

 

सीसीआयमध्ये सुरू असलेल्या सीसीआय स्नूकर क्लासिक २०२६ स्पर्धेत पात्रता फेरीतील सामने दिवसेंदिवस अधिक रंगतदार होत असून खेळाडूंच्या कौशल्यपूर्ण खेळामुळे स्पर्धेची उत्सुकता अधिक वाढली आहे. आगामी फेरीतही अशाच रोमांचक लढतींची अपेक्षा व्यक्त केली जात आहे.