अनुभवी क्युइस्ट नलिन पटेल आणि राजा सुब्रमण्यमचा दणदणीत विजय सीसीआय स्नूकर क्लासिक २०२६ स्पर्धेत पहिल्या फेरीत एकतर्फी कामगिरी सायरस आगा, आदित्य अग्रवाल, पुनीत ठक्कर यांचीही विजयी आगेकूच

 

अनुभवी क्युइस्ट नलिन पटेल आणि राजा सुब्रमण्यमचा दणदणीत विजय

सीसीआय स्नूकर क्लासिक २०२६ स्पर्धेत पहिल्या फेरीत एकतर्फी कामगिरी

सायरस आगा, आदित्य अग्रवाल, पुनीत ठक्कर यांचीही विजयी आगेकूच

 

मुंबई : मुंबईतील प्रतिष्ठित क्रिकेट क्लब ऑफ इंडिया (सीसीआय)च्या विल्सन जोन्स बिलियर्ड्स हॉलमध्ये सुरू असलेल्या सीसीआय स्नूकर क्लासिक २०२६ स्पर्धेत अनुभवी क्युइस्ट नलिन पटेल आणि राजा सुब्रमण्यम यांनी शानदार कामगिरी करत पहिल्या फेरीत सहज विजय मिळवले. मंगळवारी रंगलेल्या सामन्यांमध्ये अनेक खेळाडूंनी अचूक शॉट्स, संयम आणि उत्कृष्ट कौशल्याचे प्रदर्शन करत स्पर्धेची रंगत वाढवली.

 

नलिन पटेलचा हरिशंकर आय.वर ३-० असा एकतर्फी विजय

बिलियर्ड्समधील अनुभवी खेळाडू नलिन पटेल यांनी आपल्या अनुभवाचा पुरेपूर उपयोग करत हरिशंकर आय. यांचा ३-० (७२-४३, ७५-५०, ५७-३१) असा सहज पराभव केला. सामन्याच्या सुरुवातीपासूनच पटेल यांनी आक्रमक आणि अचूक खेळ दाखवत प्रतिस्पर्ध्याला कोणतीही संधी दिली नाही आणि सलग तीन फ्रेम जिंकत दमदार विजय नोंदवला.

 

राजा सुब्रमण्यमची प्रभावी कामगिरी

दरम्यान, बिलियर्ड्समधील आणखी एक अनुभवी खेळाडू राजा सुब्रमण्यम यांनीही उत्कृष्ट खेळ सादर करत आयुस शाहवर ३-० (६८-३९, ४४-३२, ५८-३१) असा सहज विजय मिळवला. संपूर्ण सामन्यात सुब्रमण्यम यांनी टेबलवर नियंत्रण ठेवत अचूक शॉट्सच्या जोरावर सामना आपल्या ताब्यात ठेवला.

 

आदित्य अग्रवालचा इमदाद खानवर विजय

अन्य लढतीत आदित्य अग्रवालने प्रभावी खेळ करत इमदाद खानचा ३-१ (५८-३, ५८-१७, ४३-५०, ७१(५४)-५) असा पराभव केला. पहिल्या दोन फ्रेम जिंकून आदित्यने भक्कम आघाडी घेतली. तिसऱ्या फ्रेममध्ये इमदाद खानने प्रतिकार केला, मात्र चौथ्या फ्रेममध्ये ७१ (५४) चा उत्कृष्ट ब्रेक करत आदित्यने सामना आपल्या नावावर केला.

 

सायरस आगाची चुरशीच्या सामन्यात बाजी

दिवसातील सर्वाधिक रंगतदार सामना सायरस आगा आणि आयुष पाटील यांच्यात झाला. अत्यंत चुरशीच्या झालेल्या या सामन्यात सायरसने शेवटच्या दोन फ्रेम जिंकत ३-२ (२५-५१, ६६-४३, २१-७६, ६१-१५, ५१-४२) अशी बाजी मारली. निर्णायक क्षणी शांतपणे खेळ करत सायरसने शानदार पुनरागमन केले.

 

इतर सामन्यांतही खेळाडूंची प्रभावी कामगिरी

पहिल्या फेरीतील इतर सामन्यांमध्ये पुनीत ठक्करने अमित पुजारीचा ३-० (५२-१, ७५-९, ६५-३९) असा सहज पराभव केला. करण चुघने अनुज अग्रवालवर ३-१ (५८-३६, ७३-३०, ४७-६१, ५३-४५) अशी मात केली. ताथ्या सचदेवने श्याम दमेजावर ३-० (५३-२८, ८०-१०, ८३-५०) असा विजय मिळवला, तर प्रणव तोडीने गौरव शाहवर ३-० (६१-१९, ५६-१२, ४९-१६) अशी सरशी केली. आझम खानने यश रुंगटाला ३-१ (७७-७, ६२-३१, २२-६४, ५१-१४) असे हरवले, तर केरसी आगाने मो. फैज शेखवर ३-० (५९-२३, ५४-१२, ५२-४३) असा विजय मिळवला. सीसीआय स्नूकर क्लासिक २०२६ स्पर्धेत पहिल्या फेरीतील सामने अत्यंत रंगतदार ठरत असून खेळाडूंच्या कौशल्यपूर्ण खेळामुळे स्पर्धेची उत्कंठा दिवसेंदिवस वाढत आहे.