बीपीसीएल, आयएसपीएलची दणदणीत घोडदौड आमदार चषकात उपांत्यपूर्व फेरी गाठली! पुरुष गटात सहा संघांची बाद फेरीत एंट्री महिला गटात राजमाता जिजाऊ, धर्मवीर, विवेकसह अव्वल संघांची झुंज रंगणार मॅटवर थरार, विक्रोळी दणाणली!

 

बीपीसीएल, आयएसपीएलची दणदणीत घोडदौड

आमदार चषकात उपांत्यपूर्व फेरी गाठली!

पुरुष गटात सहा संघांची बाद फेरीत एंट्री

महिला गटात राजमाता जिजाऊ, धर्मवीर, विवेकसह अव्वल संघांची झुंज रंगणार

मॅटवर थरार, विक्रोळी दणाणली!

मुंबई : विक्रोळीतील क्रीडानगरीत ‘कबड्डी कबड्डी’चा गजर आणि चढाई-पकडींचा थरार शिगेला पोहोचला असून आमदार चषक कबड्डी स्पर्धेच्या दुसऱ्या दिवशी व्यावसायिक संघांनी अक्षरशः दमदार खेळ सादर करत प्रेक्षकांना खिळवून ठेवले! हजारो कबड्डीप्रेमींच्या उपस्थितीत रंगलेल्या या संघर्षात भारत पेट्रोलियम (बीपीसीएल) आणि इन्शुअरकोट स्पोर्ट्स प्रा. लि. (आयएसपीएल) यांनी आपली ताकद दाखवत उपांत्यपूर्व फेरीत धडक मारली.

 

पुरुष गट : दिग्गज संघांची बाद फेरीत एंट्री

पुरुषांच्या व्यावसायिक गटात बीपीसीएल, आयएसपीएल, ठाणे महानगर पालिका, मीरा-भायंदर महानगर पालिका, मुंबई बंदर आणि संत सोपान काका बँक या संघांनी उपांत्यपूर्व फेरीत स्थान मिळवले. प्रत्येक सामन्यात चुरशीची लढत पाहायला मिळत असून स्पर्धेचा दर्जा अधिक उंचावला आहे.

 

बीपीसीएलची ताकद : मिलन दहिया-प्रसाद दिघोळेचा दमदार खेळ

प्रभादेवीत विजय मिळवलेल्या बीपीसीएलने दुसऱ्या दिवशीही विजयी घोडदौड कायम ठेवली. त्यांनी रिझर्व्ह बँकेवर ३६-१८ असा एकतर्फी विजय मिळवला. या सामन्यात मिलन दहिया आणि प्रसाद दिघोळे यांच्या आक्रमक खेळापुढे प्रतिस्पर्धी हतबल झाले. त्यानंतर ठाणे महानगरपालिकेविरुद्धचा सामना १४-१३ अशा एका गुणाने जिंकत बीपीसीएलने उपांत्यपूर्व फेरीत थेट प्रवेश केला. ठाणे महानगरपालिकेनेही रिझर्व्ह बँकेचा ४६-३४ असा पराभव करत अंतिम आठमध्ये स्थान मिळवले.

 

आयएसपीएलची सरशी : गटविजेतेपदासह पुढची मजल

आयएसपीएलने आपल्या दुसऱ्या सामन्यात संत सोपान काका बँकेला ३९-२४ असे नमवत ‘अ’ गटाचे विजेतेपद पटकावले. त्याचप्रमाणे मुंबई पोस्टलने सीजीएसटीविरुद्धचा अटीतटीचा सामना १६-१५ असा जिंकत ‘इ’ गटातून बाद फेरीत प्रवेश केला.

 

इतर सामन्यांतील थरार : चुरशीच्या लढतींचा सिलसिला

‘क’ गटात मीरा-भायंदर महानगर पालिकेने मिडलाइन रायगडवर ३७-३६ असा थरारक विजय मिळवला. ‘ड’ गटात युनियन बँकेने मुंबई बंदरवर १६-१४ असा विजय मिळवत पुढील फेरीत धडक मारली.

 

महिला गट : रणरागिणींचा दमदार जलवा

महिला गटातही जबरदस्त संघर्ष पाहायला मिळाला. राजमाता जिजाऊ संघाने दोन्ही सामने जिंकत आपली ताकद सिद्ध केली. त्यांनी श्रीराम संघाचा ३५-१० आणि स्नेहविकास मंडळाचा ४०-६ असा दारुण पराभव केला. या विजयात महेश्वरी वाघ आणि निमिता पडवळ यांनी आक्रमक खेळ केला.

 

धर्मवीर संघाची धडाकेबाज कामगिरी

धर्मवीर कबड्डी संघाने डॉ. शिरोडकर क्लबवर ४६-२४ असा सहज विजय मिळवला. या सामन्यात समृद्धी कोळेकर, हर्षदा सोनावणे, हर्षदा हंडोरे आणि ईश्वरी कोंढाळकर यांनी उत्कृष्ट चढाया आणि पकडी करत संघाला मोठा विजय मिळवून दिला.

 

इतर महिला संघांची आगेकूच : विवेक, शिवशक्ती चमकले

शिवशक्ती महिला संघाने स्वस्तिक आणि पतंगराव कदम संघांचा पराभव करत पुढील फेरीत स्थान मिळवले. तसेच विवेक स्पोर्ट्स क्लबने संजना पोळ आणि जीवा श्रीरंगन यांच्या शानदार खेळाच्या जोरावर दोन्ही सामने जिंकत उपांत्यपूर्व फेरी गाठली.

 

उपांत्यपूर्व फेरीत रंगणार खरी लढत!

स्पर्धेच्या दुसऱ्या दिवसापासूनच रंगलेल्या या दमदार संघर्षामुळे आता उपांत्यपूर्व फेरीत आणखी चुरस वाढणार आहे. विक्रोळीतील ही कबड्डीची मेजवानी दिवसेंदिवस रंगतदार होत असून पुढील सामने अधिक रोमांचक ठरणार, यात शंका नाही!