कॅरम पंचांसाठी सुवर्णसंधी! राज्यस्तरीय पंच शिबिराचे दादरमध्ये आयोजन महाराष्ट्र कॅरम असोसिएशनचा उपक्रम आंतरराष्ट्रीय पंचांकडून थेट मार्गदर्शन पंच घडवण्याचा ध्यास चौथ्या वर्षीही भव्य उपक्रम

 

कॅरम पंचांसाठी सुवर्णसंधी!

राज्यस्तरीय पंच शिबिराचे दादरमध्ये आयोजन
महाराष्ट्र कॅरम असोसिएशनचा उपक्रम

आंतरराष्ट्रीय पंचांकडून थेट मार्गदर्शन

पंच घडवण्याचा ध्यास

चौथ्या वर्षीही भव्य उपक्रम

 

मुंबई : कॅरम खेळातील अचूक निर्णय आणि नियमांची सखोल जाण वाढवण्यासाठी महाराष्ट्र कॅरम असोसिएशनतर्फे एक दिवसीय राज्यस्तरीय पंच शिबिराचे आयोजन करण्यात आले आहे. रविवार, दिनांक २६ एप्रिल २०२६ रोजी सकाळी ९ ते सायंकाळी ५ या वेळेत दादर येथील एल. जे. ट्रेनिंग सेंटर (वातानुकूलित) येथे हे शिबिर पार पडणार आहे. पंच घडवण्याच्या उद्देशाने सलग चौथ्या वर्षी हा उपक्रम राबवला जात आहे.

 

आंतरराष्ट्रीय पंचांचे मार्गदर्शन; अनुभवाची शिदोरी

या शिबिराचे वैशिष्ट्य म्हणजे कॅरम क्षेत्रातील अनुभवी आणि आंतरराष्ट्रीय दर्जाचे पंच थेट मार्गदर्शन करणार आहेत. अजित सावंत, केतन चिखले, परविंदर सिंग आणि आशिष बागकर हे मान्यवर शिबिरार्थींना नियम, तांत्रिक बाबी आणि निर्णयक्षमता याबाबत सखोल प्रशिक्षण देणार आहेत. त्यामुळे सहभागी पंचांना प्रत्यक्ष अनुभवातून शिकण्याची मोठी संधी मिळणार आहे.

 

मर्यादित प्रवेश; ‘फर्स्ट कम फर्स्ट सर्व’ तत्त्व

या शिबिरासाठी केवळ ४० पंचांना प्रवेश दिला जाणार असून, प्रथम नोंदणी करणाऱ्यांना प्राधान्य दिले जाईल. त्यामुळे इच्छुकांनी लवकरात लवकर आपली नोंदणी करून या सुवर्णसंधीचा लाभ घ्यावा, असे आवाहन करण्यात आले आहे.

 

विनाशुल्क प्रशिक्षण; गुणवत्तापूर्ण पंच घडवण्याचा प्रयत्न

हे संपूर्ण शिबिर विनाशुल्क आयोजित करण्यात आले असून राज्यातील पंचांची गुणवत्ता उंचावण्याचा आणि नव्या पंचांना संधी देण्याचा हा प्रयत्न आहे. कॅरम खेळाचा दर्जा उंचावण्यासाठी अशा उपक्रमांचे महत्त्व अनन्यसाधारण आहे.

 

संघटने कडून आवाहन

महाराष्ट्र कॅरम असोसिएशनचे मानद सचिव अरुण केदार यांनी या शिबिराची माहिती देत सर्व पात्र पंचांनी या उपक्रमात सहभागी व्हावे, असे आवाहन केले आहे.

 

कॅरम क्षेत्रात करिअर घडवू इच्छिणाऱ्या पंचांसाठी हे शिबिर म्हणजे सुवर्णसंधीच ठरणार असून, अनुभवी मार्गदर्शनामुळे नव्या पंचांना नवे क्षितिज गाठण्याची संधी मिळणार आहे!