नवरत्न मंडळ व एस. आय. ई. एस. यांचा दणदणीत विजय ‘टागोर नगर चषक’वर नाव कोरले! रोहन शेडगे व आस्था सिंग ठरले स्पर्धेतील सर्वोत्तम थरारक अंतिम सामन्यांनी रंगली विक्रोळीची कबड्डी!

 

नवरत्न मंडळ व एस. आय. ई. एस. यांचा दणदणीत विजय

‘टागोर नगर चषक’वर नाव कोरले!

रोहन शेडगे व आस्था सिंग ठरले स्पर्धेतील सर्वोत्तम

थरारक अंतिम सामन्यांनी रंगली विक्रोळीची कबड्डी!

 

मुंबई : विक्रोळीतील टागोर नगर मित्र मंडळाच्या कबड्डी स्पर्धेत अंतिम सामन्यांचा थरार शिगेला पोहोचला आणि विजेतेपदासाठी झालेल्या झुंजींमध्ये नवरत्न मंडळ (विक्रोळी) आणि एस. आय. ई. एस. (कुर्ला) यांनी दमदार कामगिरी करत ‘टागोर नगर चषक’ पटकावला! पुरुष गटात नवरत्न मंडळ, तर महिला गटात एस. आय. ई. एस. यांनी प्रतिस्पर्ध्यांना नामोहरम करत विजेतेपदावर शिक्कामोर्तब केले.

 

नवरत्न मंडळाचा थरारक विजय

पुरुषांच्या अंतिम सामन्यात नवरत्न मंडळाने चेंबूर क्रीडा केंद्राचा २७-२१ असा पराभव करत रोख रु. १५०००/- व चषक जिंकला. पहिल्या डावात १३-१० अशी आघाडी घेतलेल्या नवरत्नने दुसऱ्या डावात संयमी आणि नियोजनबद्ध खेळ करत ७ गुणांच्या फरकाने विजय निश्चित केला. रोहन शेडगे, गौरव पाटील आणि ओमकार तांबे यांच्या चतुरस्त्र खेळामुळे हा विजय शक्य झाला. चेंबूरकडून चिराग पाटील, ओमान तोमर, कुणाल पवार यांनी प्रयत्नांची पराकाष्ठा केली, पण ते अपुरे ठरले.

 

एस. आय. ई. एस.चा एकतर्फी जलवा

महिलांच्या अंतिम सामन्यात एस. आय. ई. एस. संघाने स्नेहविकास मंडळावर ३७-१४ अशी एकतर्फी मात करत रोख रु. ८०००/- व चषकावर कब्जा केला. आस्था सिंग हिच्या तुफानी चढाया आणि आर्या देवकर, तनुश्री शिंदे यांच्या भक्कम पकडीमुळे एस. आय. ई. एस. ने पहिल्याच डावात २ लोण देत २३-०२ अशी मोठी आघाडी घेत विजयाचा पाया रचला. उत्तरार्धात सावध खेळ करत त्यांनी सहज विजय मिळवला. स्नेहविकासकडून समृद्धी शेळटकर आणि रिया तावडे यांनी झुंजार लढत दिली.

 

उपांत्य फेरीतील रोमांचक लढती

या अगोदर झालेल्या पुरुषांच्या उपांत्य सामन्यात नवरत्न मंडळाने गुरुदत्त मंडळाचा २३-२२ असा निसटता विजय मिळवला, तर चेंबूर क्रीडा केंद्राने ओवळी मंडळावर ३२-२२ अशी मात करत अंतिम फेरीत प्रवेश केला. या सामन्यांमध्ये प्रत्येक क्षण रोमांचक ठरला.

 

वैयक्तिक पुरस्कारांत चमकदार कामगिरी

स्पर्धेतील सर्वोत्तम खेळाडू म्हणून पुरुषांत रोहन शेडगे, तर महिलांत आस्था सिंग यांची निवड करण्यात आली. दोघांनाही प्रत्येकी रोख रु. १०००/- देऊन गौरविण्यात आले. सर्वोत्तम पंच म्हणून विशाल कांबळे यांचा देखील रोख रु. १०००/- व स्मृतीचिन्ह देऊन सन्मान करण्यात आला.

 

पुरुष गटात उत्कृष्ट चढाईपटू म्हणून कुणाल पवार, तर उत्कृष्ट पकडपटू म्हणून ओमकार तांबे यांची निवड झाली. महिलांत उत्कृष्ट चढाईपटू रिया तावडे, तर उत्कृष्ट पकडपटू तनुश्री शिंदे ठरल्या. सर्व मानकरी खेळाडूंना रोख पारितोषिक देऊन गौरविण्यात आले.

 

रोमांच, कौशल्य आणि जिद्दीचा संगम ठरलेल्या या स्पर्धेत खेळाडूंनी आपल्या कामगिरीने प्रेक्षकांची मने जिंकली. विक्रोळीतील कबड्डीचा हा जल्लोष पुढील वर्षीही याच उत्साहात रंगेल, अशीच अपेक्षा!