जान्हवी मोरे स्मृती चषक कॅरम स्पर्धेत स्वरा कदम, ओमकार वडर ठरले विजेते राज्यस्तरीय स्पर्धेत शंभर पेक्षा अधिक खेळाडूंची दमदार लढत अचूक खेळाने विजेतेपदावर मोहोर

 

जान्हवी मोरे स्मृती चषक कॅरम स्पर्धेत स्वरा कदम, ओमकार वडर ठरले विजेते

राज्यस्तरीय स्पर्धेत शंभर पेक्षा अधिक खेळाडूंची दमदार लढत

अचूक खेळाने  विजेतेपदावर मोहोर

 

ठाणे : डोंबिवलीत कॅरमच्या पटावर थरार, अचूकता आणि कौशल्याचा अद्भुत संगम पाहायला मिळाला आणि त्यात कोल्हापूरचा ओमकार वडर व रत्नागिरीची स्वरा कदम यांनी विजेतेपद पटकावत स्पर्धेवर आपली छाप उमटवली! राष्ट्रीय कॅरमपटू स्व. जान्हवी सुनिल मोरे स्मृतिप्रीत्यर्थ आयोजित या राज्यस्तरीय स्पर्धेत नवोदित खेळाडूंनी जबरदस्त खेळ सादर करत कॅरमप्रेमींना अक्षरशः मंत्रमुग्ध केले.

 

भव्य सहभाग; राज्यभरातून खेळाडूंची उपस्थिती

डोंबिवली (पूर्व) येथील दत्तनगर उत्कर्ष मंडळ आयोजित स्पर्धा शास्त्री हॉलमध्ये रंगली. या स्पर्धेत ठाणे, मुंबई, मुंबई उपनगर, पालघर, रायगड, रत्नागिरी, सिंधुदुर्ग, पुणे आणि कोल्हापूर येथून १०० पेक्षा अधिक खेळाडूंनी सहभाग घेतला. प्रत्येक सामन्यात अचूक स्ट्राईक, संयम आणि रणनीतीचा सुरेख मिलाफ पाहायला मिळाला.

 

मुलांच्या गटात ओमकार वडरचा एकतर्फी विजय

मुलांच्या अंतिम सामन्यात कोल्हापूरच्या सुसंस्कार हायस्कूलचा ओमकार वडर याने ठाण्याच्या आय.ई.एस. चंद्रकांत पाटकर विद्यालयाच्या प्रसाद मानेचा सरळ २ सेटमध्ये पराभव करत विजेतेपद पटकावले. तिसऱ्या स्थानासाठी झालेल्या सामन्यात पुण्याच्या आर्यन वर्ल्ड स्कूलचा आयुष गरुड याने ठाण्याच्या नील म्हात्रेवर मात करत तिसरे स्थान मिळवले.

 

मुलींच्या गटात स्वरा कदमची सरशी

मुलींच्या अंतिम सामन्यात रत्नागिरीच्या आर.बी. शिर्के हायस्कूलची स्वरा कदम हिने मुंबई उपनगरच्या कानोसा कॉन्व्हेंट हायस्कूलच्या वेदिका पोमेंडकरचा २ सेटमध्ये पराभव करत विजेतेपदावर शिक्कामोर्तब केले. तिसऱ्या स्थानाच्या लढतीत मुंबई उपनगरच्या महात्मा गांधी विद्यामंदिराची तनया दळवी हिने सिंधुदुर्गच्या सावंतवाडीतील मुक्ताई अकॅडमीच्या साक्षी रामदूरकरचा पराभव केला.

 

पारितोषिकांचा वर्षाव; विजेत्यांचा सन्मान

स्पर्धेत दोन्ही गटांतील पहिल्या ८ क्रमांकांतील खेळाडूंना रोख रक्कम, चषक आणि पदकांनी गौरविण्यात आले. एकूण ₹१८,००० इतकी पारितोषिके वितरित करण्यात आली. विजेते ओमकार वडर आणि स्वरा कदम यांना प्रत्येकी ₹३,००० आणि चषक देऊन सन्मानित करण्यात आले.

 

मान्यवरांची उपस्थिती आणि सहकार्य

स्पर्धेच्या यशस्वी आयोजनासाठी खासदार डॉ. श्रीकांत शिंदे आणि आमदार राजेश मोरे यांचे मोलाचे सहकार्य लाभले. आमदार राजेश मोरे यांच्या हस्ते स्पर्धेचे उद्घाटन करण्यात आले. तसेच माजी विश्वविजेते कॅरमपटू योगेश परदेशी आणि आंतरराष्ट्रीय कॅरमपटू संजय मांडे यांच्या हस्ते पारितोषिक वितरण सोहळा पार पडला.

 

युवा कॅरमपटूंसाठी प्रेरणादायी मंच

या स्पर्धेमुळे नवोदित खेळाडूंना आपली क्षमता सिद्ध करण्याची मोठी संधी मिळाली असून, भविष्यातील राष्ट्रीय आणि आंतरराष्ट्रीय कॅरमपटू घडवण्याचा मार्ग अधिक भक्कम झाला आहे. डोंबिवलीत रंगलेला हा कॅरमचा जल्लोष क्रीडाप्रेमींसाठी अविस्मरणीय ठरला.