थरार, उलटफेर आणि जबरदस्त कमबॅक! युवा पलटन, युनियन बँक, भारतीय नौदल, यु. पी. योद्धा उपांत्य फेरीत बंड्या मारूती अखिल भारतीय कबड्डी स्पर्धेत रोमांचक लढतींचा वर्षाव शेवटच्या क्षणापर्यंत रंगले सामने

 

थरार, उलटफेर आणि जबरदस्त कमबॅक! युवा पलटन, युनियन बँक, भारतीय नौदल, यु. पी. योद्धा उपांत्य फेरीत

बंड्या मारूती अखिल भारतीय कबड्डी स्पर्धेत रोमांचक लढतींचा वर्षाव

शेवटच्या क्षणापर्यंत रंगले सामने

 

मुंबई :- कबड्डीच्या मैदानावर अक्षरशः श्वास रोखून धरणारा थरार, शेवटच्या क्षणी पलटलेले सामने आणि खेळाडूंच्या जिगरबाज कामगिरीने प्रेक्षकांना अक्षरशः खिळवून ठेवत युवा पलटन (इंशोअरकोट प्रा. लि.), युनियन बँक, भारतीय नौदल आणि यु. पी. योद्धा यांनी बंड्या मारूती सेवा मंडळ आयोजित अखिल भारतीय पुरुष व्यावसायिक कबड्डी स्पर्धेच्या उपांत्य फेरीत दिमाखात प्रवेश केला.

 

नौदलाचा शेवटच्या क्षणी जबरदस्त पलटवार

भारतीय नौदलने दक्षिण मध्य रेल्वेवर ४४-४३ असा थरारक विजय मिळवत सर्वांना अचंबित केले. पूर्वार्धात १६-२३ अशी पिछाडी असताना नौदलाने शेवटच्या ३ मिनिटांत कमाल केली. भरत खत्री याने चढाईत १७ गुण घेत निर्णायक भूमिका बजावली, तर सुरजित याने ५ पकडी करत भक्कम साथ दिली. रोहित टोमर (५ गुण) व रिंकू (३ पकडी) यांनीही मोलाची भर घातली. रेल्वेकडून आयन लोचन (१३ गुण), हरदीप (५ पकडी) आणि नितेश (३ पकडी) यांनी झुंज दिली, पण शेवटी विजय निसटला.

 

युवा पलटनचा जबरदस्त कमबॅक; नीरजचा करिष्मा

युवा पलटनने जयपूर पिंक क्लबवर ४३-४१ अशी नाट्यमय मात केली. १८-२३ पिछाडीवरून खेळताना नीरज मिसाळ याने अखेरच्या टप्प्यात तुफानी खेळ करत १७ गुण मिळवले. वैभव रबाडे याने ९ पकडी करत बचाव मजबूत केला. निर्णायक क्षणी किशोर जाट याने घेतलेले २ गुण संघासाठी गेमचेंजर ठरले. जयपूरकडून देवांक दलाल (११ गुण), नितीन धनकर (७ पकडी) व अखिल नरवाल (५ पकडी) यांनी जोरदार प्रयत्न केले, पण विजय हुकला.

 

युनियन बँकेचा टॉप गिअर; ओ. एन. जी. सी.वर एकतर्फी मात

युनियन बँकेने २५-२९ पिछाडीवरून जोरदार कमबॅक करत ओ. एन. जी. सी.ला ५८-४२ असे पराभूत केले. उत्तरार्धात ३ लोण देत सामना एकतर्फी केला. सुशील याने २५ गुण, सोमवीर मेहरा याने १० गुण घेतले. बचावात अतुल जाधव व सचिन यांनी प्रत्येकी ६ पकडी करत विजय पक्का केला. ओ. एन. जी. सी.चा खेळ उत्तरार्धात पूर्णपणे ढेपाळला.

 

यु. पी. योद्धाचा दमदार विजय; पेट्रोलियमला धक्का

यु. पी. योद्धाने बलाढ्य भारत पेट्रोलियमवर ५४-३६ असा दणदणीत विजय मिळवला. गगन गौडा याने चढाईत २१ गुण, तर सचिन याने तब्बल ११ पकडी (४ अव्वल पकडी) करत प्रतिस्पर्ध्याला डोके वर काढू दिले नाही. पेट्रोलियमच्या विशाल टके व चेतन साहू यांचा प्रभाव दिसला नाही.

 

उपांत्य फेरीत रंगणार महासंग्राम

या शानदार विजयांसह युवा पलटन, युनियन बँक, भारतीय नौदल आणि यु. पी. योद्धा यांनी उपांत्य फेरीत स्थान निश्चित केले आहे. आता पुढील लढतीत कोण अंतिम फेरी गाठणार याकडे संपूर्ण कबड्डी विश्वाचे लक्ष लागले आहे. कौशल्य, जिद्द आणि शेवटच्या क्षणापर्यंत झुंज देण्याची वृत्ती या तिन्ही गोष्टींचा अप्रतिम संगम या स्पर्धेत पाहायला मिळत आहे. उपांत्य फेरीत आणखी थरारक सामने रंगणार हे निश्चित!