कुमार-मुली (ज्युनिअर) मुंबई जिल्हा अजिंक्यपद व निवड चाचणी खो-खो स्पर्धा श्री समर्थ, शिवनेरी सेवा मंडळ, ॐ साईश्वर आणि सरस्वती स्पोर्ट्स क्लबचा विजयी धडाका

 

कुमार-मुली (ज्युनिअर) मुंबई जिल्हा अजिंक्यपद व निवड चाचणी खो-खो स्पर्धा

श्री समर्थ, शिवनेरी सेवा मंडळ, ॐ साईश्वर आणि सरस्वती स्पोर्ट्स क्लबचा विजयी धडाका

 

मुंबई : मुंबई खो-खो संघटनेच्या मान्यतेने ॐ समर्थ भा. व्या. मंदिर आयोजित कुमार-मुली (ज्युनिअर - १८ वर्षाखालील) मुंबई जिल्हा अजिंक्यपद व निवड चाचणी खो-खो स्पर्धा २०२६-२७ माटुंगा येथील ॐ समर्थ भारत व्यायाम मंदिरच्या क्रीडांगणात उत्साहपूर्ण वातावरणात सुरू असून, आजच्या सामन्यांनी प्रेक्षकांना अक्षरशः रोमांचित केले. वेगवान चढाया, भक्कम संरक्षण, अचूक रणनीती आणि अखेरच्या क्षणापर्यंत रंगलेली चुरस यामुळे मैदानावर थरारक वातावरण निर्माण झाले होते. श्री समर्थ व्यायाम मंदिर, शिवनेरी सेवा मंडळ, ॐ साईश्वर सेवा मंडळ आणि सरस्वती स्पोर्ट्स क्लब यांनी शानदार विजय नोंदवत स्पर्धेतील आपला दबदबा कायम राखला.

 

शिवनेरी सेवा मंडळाचा निसटता विजय; ॐ समर्थ भारत व्यायाम मंदिराची झुंज अपुरी

दिवसातील अत्यंत रोमांचक सामन्यात शिवनेरी सेवा मंडळ संघाने ॐ समर्थ भारत व्यायाम मंदिर संघाचा १०-५ (मध्यंतर १०-२) असा १ डाव ५ गुणांनी पराभव करत शानदार विजय मिळवला. शेवटच्या क्षणापर्यंत रंगलेल्या या सामन्याने प्रेक्षकांचा श्वास रोखून धरला होता. विजयी शिवनेरी सेवा मंडळाकडून सिद्धी शिंदे (४.४० मि. संरक्षण व २ गुण), आरुषी गुप्ता (४ मि. संरक्षण व २ गुण), गार्गी काडगे (३.२० मि. संरक्षण व १ गुण) आणि मुस्कान शेख (३.१० मि. संरक्षण व १ गुण) यांनी निर्णायक भूमिका बजावली. तर पराभूत ॐ समर्थ भारत व्यायाम मंदिराकडून अवनी पाटील (३.२० मि. संरक्षण व ३ गुण), जिज्ञासा गायकवाड (१.४० मि. संरक्षण व १ गुण) आणि अनन्या राजे (१.२० मि. संरक्षण) यांनी झुंजार खेळ केला, मात्र त्यांचे प्रयत्न अपुरे ठरले.

 

ॐ साईश्वर सेवा मंडळाची दमदार कामगिरी; विद्यार्थी क्रीडा केंद्रावर मात

आणखी एका चुरशीच्या सामन्यात ॐ साईश्वर सेवा मंडळ संघाने विद्यार्थी क्रीडा केंद्र संघाचा १७-१० (मध्यंतर ८-४) असा ७ गुणांनी पराभव करत प्रभावी विजय नोंदवला. विजयी संघाकडून निषाद ताम्हणकर (३.१० मि. संरक्षण), प्रशिक मोरे (२.५०, २.३० मि. संरक्षण व ६ गुण), आदिराज गुरव (१.३०, २.२० मि. संरक्षण व २ गुण), सार्थक माडवे (१.२० मि. संरक्षण व ३ गुण) आणि सुजल गुरव (१.२०, १ मि. संरक्षण) यांनी अप्रतिम खेळ करत संघाचा विजय निश्चित केला. तर विद्यार्थी क्रीडा केंद्राकडून ॐकार जाधव (२.३०, १.३० मि. संरक्षण व १ गुण) आणि दीक्षांत पवन (१.३०, २ मि. संरक्षण) यांनी चांगली झुंज दिली, मात्र संघाला विजय मिळवून देता आला नाही.

 

सरस्वती स्पोर्ट्स क्लबचा धडाकेबाज विजय; श्री समर्थ व्यायाम मंदिराची झुंज निष्फळ

दिवसातील सर्वाधिक थरारक सामन्यांपैकी एक ठरलेल्या लढतीत सरस्वती स्पोर्ट्स Club संघाने श्री समर्थ व्यायाम मंदिर संघाचा १३-१२ (मध्यंतर ४-५) असा अवघ्या १ गुणाने ५ मिनिटे राखून पराभव करत शानदार विजय नोंदवला. सुरुवातीपासूनच आक्रमक खेळ करत सरस्वती स्पोर्ट्स क्लबने सामन्यावर मजबूत पकड ठेवली. विजयी संघाकडून ओमकार खरंगटे (३.३०, ४.४०, ३.३० मि. संरक्षण व १ गुण), समर्थ उपशेठे (२.५०, २.५० मि. संरक्षण व २ गुण) आणि ॐ ननावरे (२.१०, १.४० मि. संरक्षण व ४ गुण) यांनी शानदार खेळ करत संघाला विजय मिळवून दिला. तर पराभूत श्री समर्थ व्यायाम मंदिराकडून साई गुरव (२, १.३०, १.४० मि. नाबाद संरक्षण), साईश शिंदे (२.२०, २ मि. संरक्षण व २ गुण), धीरज डांबले (२.१० मि. संरक्षण व ३ गुण), श्री सुर्वे (१.३०, ३.३० मि. संरक्षण) आणि विहंग पाटील (१.१० मि. नाबाद संरक्षण, १.२० मि. संरक्षण व २ गुण) यांनी कडवी झुंज दिली, मात्र विजय हुकला.