जागतिक योगासनात भारताचा धमाका!
पहिल्या जागतिक योगासन चॅम्पियनशिपचा
अहमदाबादमध्ये दिमाखदार समारोप
७६ देशांमध्ये भारताचा दबदबा
मुंबईच्या दोन खेळाडूंनी जिंकली ४ सुवर्णपदके
योगासनाच्या इतिहासात सुवर्णाक्षरांनी नोंदला
गेलेला क्षण
अहमदाबाद : योगाला जागतिक क्रीडा मंचावर भक्कम स्थान मिळवून
देणाऱ्या पहिल्याच जागतिक योगासन चॅम्पियनशिपमध्ये भारताने अक्षरशः वर्चस्व
गाजवत जगाला आपली ताकद दाखवून दिली. ४ ते ८ जून २०२६ या कालावधीत अहमदाबाद येथील ईकेए एरिना, कांकरिया तलाव येथे रंगलेल्या या ऐतिहासिक स्पर्धेत ७६
देशांतील ४०० हून अधिक खेळाडूंनी सहभाग घेतला. योगाच्या जागतिकीकरणाचा नवा अध्याय
लिहिणाऱ्या या स्पर्धेत भारताने पदकांची अक्षरशः लयलूट करत प्रतिस्पर्ध्यांचा
धुव्वा उडवला.
पंतप्रधान मोदींच्या हस्ते जागतिक पर्वाचा
शुभारंभ
४ जून रोजी पंतप्रधान नरेंद्र मोदी यांनी आभासी माध्यमातून स्पर्धेचे उद्घाटन करत
योग हे भारताचे अमूल्य सांस्कृतिक वारसास्थान असल्याचे अधोरेखित केले. योग आता
केवळ आरोग्यसाधना न राहता जागतिक क्रीडा प्रकार म्हणून उदयास येत असल्याचे त्यांनी
नमूद केले. योगासनाला भविष्यात ऑलिम्पिकमध्ये स्थान मिळवून देण्यासाठी भारत
कटिबद्ध असल्याचेही त्यांनी स्पष्ट केले.
कौशल्य, संतुलन आणि लवचिकतेचा अद्भुत संगम
या स्पर्धेत पारंपरिक योगासन, कलात्मक योगासन, लयबद्ध योगासन, जोडी योगासन यासह सात अधिकृत प्रकारांमध्ये
खेळाडूंनी आपल्या अद्वितीय कौशल्याची झलक दाखवली. प्रत्येक सादरीकरणात
शरीरसामर्थ्य, संतुलन, एकाग्रता आणि कलात्मकता यांचा सुरेख मेळ पाहायला मिळाला. जागतिक स्तरावरील या
स्पर्धेला प्रेक्षकांनीही उत्स्फूर्त प्रतिसाद देत योगासनाला खेळ म्हणून भरभरून
दाद दिली.
पदकतालिकेत भारताची एकहाती सत्ता
पदकतालिकेत भारताने प्रतिस्पर्ध्यांना फार मागे टाकत १०२ सुवर्ण, ९ रौप्य आणि ३ कांस्य अशा तब्बल ११४ पदकांची
कमाई केली. भारताच्या या दणदणीत कामगिरीसमोर इतर देशांची आव्हाने
निष्प्रभ ठरली. जपान ११ पदकांसह दुसऱ्या, तर अर्जेंटिना ५ पदकांसह तिसऱ्या स्थानावर राहिला.
मुंबईच्या दोन खेळाडूंची सुवर्ण झेप
या जागतिक स्पर्धेत महाराष्ट्राच्या खेळाडूंनी विशेष छाप
पाडली. पालघरच्या विधिश जयेश राऊत याने लेग बॅलन्स आणि ट्रॅडिशनल ग्रुप इव्हेंट या दोन
प्रकारांत सुवर्णपदकांची कमाई करत महाराष्ट्राचा झेंडा उंचावला. त्याच्या या
यशामागे प्रशिक्षक फैयाझ जमादार यांचे मोलाचे मार्गदर्शन लाभले.
मुंबई विभागातील दित्या बालगी हिनेही चमकदार कामगिरी करत ट्विस्टिंग बॉडी इंडिव्हिज्युअल इव्हेंट आणि ट्रॅडिशनल ग्रुप
इव्हेंट या दोन प्रकारांत सुवर्णपदके जिंकली. प्रशिक्षक रुपेश मयेकर यांच्या
मार्गदर्शनाखाली दित्याने जागतिक स्तरावर भारताचे नाव उज्ज्वल केले. अशा प्रकारे
मुंबईच्या या दोन खेळाडूंनी मिळून तब्बल ४ सुवर्णपदकांची कमाई करत भारतीय संघाच्या यशात मोलाचा वाटा उचलला.
मुंबई विभागाच्या तांत्रिक अधिकाऱ्यांची
उल्लेखनीय जबाबदारी
या ऐतिहासिक स्पर्धेत टेक्निकल ऑफिशियल म्हणून रुचिता ठाकूर
(पालघर), प्राजक्ता खवळे (मुंबई शहर) आणि फैयाझ जमादार (मुंबई उपनगर) यांनी अत्यंत
निष्पक्ष आणि प्रभावीपणे काम पाहिले. त्यांच्या अचूक निर्णयक्षमतेमुळे आणि
व्यावसायिक कार्यपद्धतीमुळे स्पर्धेची पारदर्शकता आणि विश्वासार्हता अधिक बळकट
झाली.
मुंबई विमानतळावर आंतरराष्ट्रीय पाहुण्यांचे
भव्य स्वागत
स्पर्धेच्या आयोजनात मुंबई विभागाने आणखी एक महत्त्वपूर्ण
जबाबदारी यशस्वीपणे पार पाडली. विविध देशांतील खेळाडू मुंबई विमानतळावर दाखल होताच
त्यांचे स्वागत, निवास, वाहतूक आणि अन्य आवश्यक सुविधांची उत्कृष्ट व्यवस्था करण्यात आली. निकिता सिंघल, गणेश टिकम, लतिका जैस्वाल, अमिता यादव, प्रविण गुप्ता आणि संजय कांटे या स्वयंसेवकांनी अतिशय समर्पितपणे सेवा बजावत
भारतीय आदरातिथ्याची जागतिक स्तरावर छाप पाडली.
मान्यवरांच्या उपस्थितीत गौरवाचा सोहळा
समारोप समारंभाला डॉ. संजय मालपाणी, सतीश मोहगावकर, महाराष्ट्र ऑलिम्पिक असोसिएशनचे सचिव व मुंबई
शहर अध्यक्ष संजय शेटे, डॉ. घनश्याम ढोकरट आणि महेश कुंभार यांच्यासह अनेक मान्यवर उपस्थित होते. त्यांनी
विजेत्या खेळाडूंचे अभिनंदन करत योगासनाच्या उज्ज्वल भवितव्याबाबत विश्वास व्यक्त
केला.
ऑलिम्पिक स्वप्नाच्या दिशेने ऐतिहासिक झेप
या चॅम्पियनशिपचे प्रमुख उद्दिष्ट योगासनाला आंतरराष्ट्रीय
क्रीडा महासंघाची मान्यता मिळवून भविष्यात ऑलिम्पिक स्पर्धांमध्ये स्थान मिळवून
देणे हे आहे. तब्बल ७६ देशांचा सहभाग, जागतिक दर्जाचे आयोजन आणि विक्रमी प्रतिसाद
यामुळे हे स्वप्न आता अधिक वास्तववादी वाटू लागले आहे. अहमदाबादमध्ये संपन्न
झालेली ही पहिली जागतिक योगासन चॅम्पियनशिप भारतीय योगपरंपरेच्या जागतिक विजयाची
नांदी ठरली आहे.
Post a Comment
0 Comments