महापौर चषक शालेय कॅरममध्ये केवल कुळकर्णी विजेता! १०-० पिछाडीवरून उमैर पठाणला ११-१० ने हरवत केवलचा थरारक विजय २०० शालेय कॅरमपटूंचा सहभाग

 

महापौर चषक शालेय कॅरममध्ये केवल कुळकर्णी विजेता!

१०-० पिछाडीवरून उमैर पठाणला ११-१० ने हरवत केवलचा थरारक विजय

२०० शालेय कॅरमपटूंचा सहभाग

 

मुंबई : आनंदराव अडसूळ चॅरिटेबल ट्रस्ट व आयडियल स्पोर्ट्स अकॅडमीतर्फे, एमएससी बँक पुरस्कृत मुंबई महापौर चषक शालेय कॅरम स्पर्धेत शेठ करमशी कानजी इंग्लिश स्कूलचा केवल कुळकर्णीने विजेतेपदावर नाव कोरले. अंतिम आठव्या फेरीत एका क्षणी तब्बल १०-० अशी पिछाडीवर असतानाही केवलने निर्णायक क्षणी खेळ उंचावत श्री नारायण गुरु हायस्कूलच्या उमैर पठाणवर ११-१० अशी रोमहर्षक मात केली. शेवटच्या क्षणापर्यंत रंगलेल्या या लढतीत केवलने संयम, अचूक स्ट्राईक आणि मानसिक ताकदीच्या जोरावर बाजी पलटवत विजेतेपदाला गवसणी घातली.

 

१०-० वरून ११-१०! केवलची अविश्वसनीय कमबॅक

अंतिम सामन्याच्या मध्यापर्यंत उमैर पठाणने १०-० अशी भक्कम आघाडी घेत सामन्यावर वर्चस्व निर्माण केले होते. मात्र, पराभव मान्य न करता केवल कुळकर्णीने निर्णायक टप्प्यात अचूक खेळाचे प्रदर्शन करीत गुणांची पिछाडी भरून काढली. प्रत्येक फटक्याबरोबर सामन्यातील रंगत वाढत गेली आणि अखेर केवलने ११-१० असा निसटता विजय मिळवत महापौर चषकावर कब्जा केला. उमैर पठाणला उपविजेतेपदावर समाधान मानावे लागले.

 

केवल-उमैरची अंतिम फेरीत धडक

दादर येथील सीबीईयू सभागृहात झालेल्या उपांत्य फेरीत केवल कुळकर्णीने शिवांश मोरेचा, तर उमैर पठाणने सोहम जाधवचा पराभव करून अंतिम फेरी गाठली. उपांत्य फेरीतील दमदार कामगिरीनंतर दोन्ही खेळाडूंमध्ये रंगलेल्या अंतिम सामन्याने स्पर्धेची सांगता थरारक पद्धतीने झाली.

 

३२ खेळाडू ठरले पुरस्कारविजेते

स्पर्धेतील उपांत्य उपविजेते शारदाश्रम विद्या मंदिरचा सोहम जाधव आणि आयईएस चंद्रकांत पाटकर स्कूल-डोंबिवलीचा शिवांश मोरे ठरले. उपांत्यपूर्व फेरीतील उपविजेत्यांमध्ये महात्मा गांधी विद्यामंदिरची तनया दळवी, पार्ले टिळक विद्यालयाचा जयेश कांबळे, होली फॅमिली हायस्कूलचा चैतन्य पोमेंडकर आणि महिला मंडळ शाळेचा विराज बर्वे यांचा समावेश असून, एकूण ३२ खेळाडू पुरस्कारविजेते ठरले.

 

विविध जिल्ह्यांतून २०० शालेय कॅरमपटू

मुंबई शहर व उपनगर, ठाणे, पालघर, रायगड, रत्नागिरी, पुणे, कोल्हापूर आदी विविध जिल्ह्यांतील तब्बल २०० शालेय कॅरमपटूंनी स्पर्धेत सहभाग घेतला. त्यामुळे महापौर चषकाने शालेय कॅरमला व्यापक व्यासपीठ मिळवून दिले.

 

चषकासह टी-शर्ट, स्ट्रायकर आणि भेटवस्तू

विजेत्या केवल कुळकर्णी तसेच उपविजेता उमैर पठाण आणि अन्य पुरस्कारविजेत्यांना आकर्षक चषक, टी-शर्ट, स्ट्रायकर व भेटवस्तू देऊन गौरविण्यात आले. माजी केंद्रीय अर्थ राज्यमंत्री आनंदराव अडसूळ, नगरसेवक महादेव शिवगण, डॉ. जितेंद्र लिंबकर, विष्णू तांडेल, प्रकाश वाघमारे, अशोक नवले, प्रमोद पार्टे, जनार्दन मोरे आणि शिवछत्रपती पुरस्कारप्राप्त लीलाधर चव्हाण आदी मान्यवरांच्या प्रमुख उपस्थितीत पारितोषिक वितरण सोहळा झाला.

 

५ विभागांत विनाशुल्क सरावाची पूर्वतयारी

मुंबई महापौर चषक शालेय कॅरम स्पर्धेच्या निमित्ताने राष्ट्रीय ख्यातीच्या तज्ज्ञ प्रशिक्षकांच्या मार्गदर्शनाखाली मुंबईतील विविध ५ विभागांत विनाशुल्क स्पर्धा सराव व पूर्वतयारी उपक्रम राबविण्यात आला. या उपक्रमामुळे शालेय खेळाडूंना स्पर्धेपूर्वी तांत्रिक मार्गदर्शन आणि सरावाची संधी मिळाली.

 

प्रमुख पंचांची अचूक कामगिरी

स्पर्धेच्या यशस्वी आयोजनात प्रमुख पंच संतोष जाधव, चंद्रकांत करंगुटकर आणि ओमकार चव्हाण यांनी महत्त्वाची भूमिका बजावली. त्यांच्या मार्गदर्शनाखाली स्पर्धेतील सामने शिस्तबद्ध आणि सुरळीत पार पडले.