शिवकन्या कबड्डी मंडळाने पटकाविला देवाडीकर चषक! राजर्षी शाहू महाराज मंडळाचे आव्हान सहज परतवले शेरीन फतेजा, योगिनी म्हात्रेच्या जोशपूर्ण खेळाने शिवकन्याचा दिमाखदार विजय

 

शिवकन्या कबड्डी मंडळाने पटकाविला देवाडीकर चषक!

राजर्षी शाहू महाराज मंडळाचे आव्हान सहज परतवले 

शेरीन फतेजा, योगिनी म्हात्रेच्या जोशपूर्ण खेळाने शिवकन्याचा दिमाखदार विजय

 

ठाणे : आक्रमक चढाया, भक्कम पकडी आणि उत्तरार्धात रंगलेला जोशपूर्ण खेळ याच्या जोरावर शिवकन्या कबड्डी मंडळाने ठाणे जिल्हा कबड्डी असोसिएशन व क्रीडा भारती, डोंबिवली यांच्या सहकार्याने आयोजित जिल्हा अजिंक्यपद निवड चाचणी कबड्डी स्पर्धेच्या कुमारी गटाचे विजेतेपद पटकाविले. डोंबिवली (पूर्व) येथील सौ. राजश्री काळे काकू क्रीडानगरी, उषानगर पंचायत, भावडी येथे झालेल्या अंतिम सामन्यात शिवकन्याने राजर्षी शाहू महाराज मंडळाचे आव्हान सहज परतवून लावत श्रमजीवी स्व. रमेश देवाडीकर चषकावर आपले नाव कोरले.

 

उत्तरार्धात शिवकन्याचा धडाका

अंतिम सामन्यात शिवकन्याच्या शेरीन फतेजा आणि योगिनी म्हात्रे यांनी उत्तरार्धात केलेल्या जोशपूर्ण खेळामुळे सामन्याचे पारडे शिवकन्याच्या बाजूने झुकले. राजर्षी शाहू महाराज मंडळाकडून ज्ञानेश्वरी रनटंकी आणि अनुष्का चव्हाण यांनी पूर्वार्धात आक्रमक खेळ करत चांगले आव्हान उभे केले; मात्र उत्तरार्धात त्यांचा वेग कायम राहिला नाही. त्याचा फायदा घेत शिवकन्याने विजेतेपदावर शिक्कामोर्तब केले.

 

उपांत्य फेरीतही शिवकन्याची सरशी

अंतिम फेरीपूर्वी झालेल्या उपांत्य सामन्यात शिवकन्या मंडळाने नव तरुण मंडळावर, तर राजर्षी शाहू महाराज मंडळाने रा. फ. नाईक संघावर मात करून अंतिम फेरी गाठली होती.

 

कुमार गटात उपउपांत्यपूर्व फेरीत रंगत

दरम्यान, काल्हेर, भिवंडी येथे विजय क्लब मंडळाच्या सहकार्याने मंडळाच्या मैदानावर सुरू असलेल्या कुमार गटाच्या बाद फेरीत श्री मावळी मंडळ, श्री विठ्ठल मंडळ, बॉस्को स्पोर्टस्, जय बजरंग आणि नव तरुण मंडळ यांनी उपउपांत्यपूर्व फेरीत प्रवेश केला.

 

श्री मावळीचा स्वामी विवेकानंदवर पाडाव

श्री मावळी मंडळाने स्वामी विवेकानंद संघाचा पाडाव करत आगेकूच केली. श्री मावळीकडून स्वरूप साळुंखे, स्वरूप कदम आणि आदित्य ठोंबरे यांनी उत्कृष्ट खेळ केला. पराभूत स्वामी विवेकानंद संघाकडून यश पाटील आणि पियुष म्हात्रे यांनी चांगली झुंज दिली.

 

वेदान्त खाडेचा अष्टपैलू खेळ

श्री विठ्ठल मंडळाने जॉयकुमार स्पोर्टस् वर विजय मिळविला. या विजयात वेदान्त खाडे याच्या चतुरस्त्र खेळाचा मोठा वाटा राहिला. जॉयकुमारकडून क्रिष यादव याने चमकदार खेळ करत प्रतिकार केला.

 

बॉस्को स्पोर्टस्‌ची आगेकूच

बॉस्को स्पोर्टस्‌ने जय हनुमान मंडळाचा प्रतिकार मोडून काढत पुढील फेरीत प्रवेश केला. बॉस्कोकडून श्रावण तांबे आणि मयुरेश वाघ, तर जय हनुमानकडून साहिल चव्हाण आणि तुषार मानकर यांनी प्रभावी खेळ केला.

 

निखिल गायकरच्या अष्टपैलू खेळाने जय बजरंग विजयी

जय बजरंग, वाशिंदने निखिल गायकरच्या अष्टपैलू खेळाच्या जोरावर जय हनुमान संघावर सहज मात केली. जय हनुमानकडून श्लोक उतेकर याने एकाकी झुंज देत संघाचा प्रतिकार कायम ठेवण्याचा प्रयत्न केला.

 

नव तरुणचा थरारक ३३-३२ विजय

दिवसातील अखेरच्या सामन्यात नव तरुण मंडळाने वेताळ मंडळावर ३३-३२ अशी निसटती मात करत आगेकूच केली. पहिल्या डावात पिछाडीवर असलेल्या वेताळ मंडळाने दुसऱ्या डावात जोरदार पुनरागमन करत सामना चुरशीचा केला. अखेर नव तरुणने अवघ्या १ गुणाच्या फरकाने विजय मिळविला. नव तरुणकडून दुर्गेश जाधव आणि माणिक गराडे, तर वेताळकडून भुगेंद्र जोशी आणि अमोल शिंदे यांनी उत्तम खेळ केला.

 

कुमार गटातही रंगणार चुरस

कुमार गटातील संघांनी बाद फेरीत दाखविलेल्या झुंजीमुळे पुढील सामने अधिक रंगतदार होण्याची चिन्हे आहेत. एकीकडे श्री मावळी, श्री विठ्ठल, बॉस्को स्पोर्टस्, जय बजरंग आणि नव तरुण यांनी पुढील फेरी गाठली असून, दुसरीकडे कुमारी गटात शिवकन्या मंडळाने देवाडीकर चषकावर नाव कोरून आपली ताकद सिद्ध केली आहे.

 

छायाचित्र : कुमारी गटाचा विजेता शिवकन्या क्रीडा मंडळाचा संघ.