5वी अर्जुन मढवी स्मृती महिला चषक स्पर्धा माही, आयुषीच्या अर्धशतकांमुळे पय्याडेचा दमदार विजय

 

5वी अर्जुन मढवी स्मृती महिला चषक स्पर्धा

माही, आयुषीच्या अर्धशतकांमुळे पय्याडेचा दमदार विजय

 

ठाणे: कर्णधार माही ठक्करच्या अष्टपैलू खेळासह आयुषी सिंगच्या धडाकेबाज अर्धशतकाच्या जोरावर पय्याडे स्पोर्ट्स क्लबने फोर्ट यंगस्टर क्रिकेट क्लबचा सात विकेट्सनी पराभव करत डॉ. राजेश मढवी स्पोर्ट्स असोसिएशन आणि दैवेज्ञ क्रिकेट क्लब आयोजित पाचव्या अर्जुन मढवी स्मृती महिलांच्या एकदिवसीय क्रिकेट स्पर्धेच्या उपांत्य फेरीत आपले स्थान पक्के केले. फोर्ट यंगस्टरने दिलेले २३० धावांचे आव्हान पय्याडेने २६.३ षटकांत ३ बाद २३५ धावा करत सहज पूर्ण केले. सलग दुसऱ्या सामन्यात माही ठक्कर सामन्यातील सर्वोत्तम खेळाडू ठरली.

 

फोर्ट यंगस्टर क्रिकेट क्लबने प्रथम फलंदाजी करताना मानसी पाटीलच्या अर्धशतकाच्या जोरावर ३४.३ षटकांत २३० धावा केल्या. मानसीने ५७ धावा केल्या, तर हिया पंडित आणि सन्मया उपाध्याय यांनी प्रत्येकी ३६ धावांचे योगदान दिले. भूमिका रायने २२ धावा केल्या. पय्याडेच्या गोलंदाजांपैकी माही ठक्करने ४२ धावांत ४ बळी घेतले. जिया मांडरवडकर आणि श्रद्धा सिंग यांनी प्रत्येकी २ फलंदाज बाद केले.

 

लक्ष्याचा पाठलाग करताना आयुषी सिंग आणि माही ठक्करच्या आक्रमक खेळीमुळे पय्याडेचा विजय सोपा झाला. आयुषीने ५० चेंडूत नऊ चौकार आणि दोन षटकारांसह नाबाद ७७ धावा केल्या. माहीने ४४ चेंडूत १२ चौकार आणि ३ षटकारांच्या मदतीने नाबाद ७६ धावा करत संघाला विजयी केले. ललिता यादवने २८ आणि भावना सानपने २५ धावा केल्या. फोर्ट यंगस्टरकडून वेदिका मगरने २ बळी घेतले, तर मानसी पाटीलने १ गडी बाद केला.

 

संक्षिप्त धावफलक:

फोर्ट यंगस्टर क्रिकेट क्लब: ३४.३ षटकांत सर्वबाद २३०

मानसी पाटील ५७, हिया पंडित ३६, सन्मया उपाध्याय ३६, भूमिका राय २२; माही ठक्कर ६-४२-४, जिया मांडरवडकर ८-५०-२, श्रद्धा सिंग ५-३८-२

 

पय्याडे स्पोर्ट्स क्लब: २६.३ षटकांत ३ बाद २३५

आयुषी सिंग नाबाद ७७, माही ठक्कर नाबाद ७६, ललिता यादव २८, भावना सानप २५; वेदिका मगर ५-३०-२, मानसी पाटील ६-५८-१

सामन्यातील सर्वोत्तम खेळाडू: माही ठक्कर (पय्याडे स्पोर्ट्स क्लब).