७१ वी राष्ट्रीय कबड्डी स्पर्धा महाराष्ट्राच्या महिलांचे स्वप्न भंगले, हरियाणाकडून पराभव!

 

७१ वी राष्ट्रीय कबड्डी स्पर्धा 

महाराष्ट्राच्या महिलांचे स्वप्न भंगले, हरियाणाकडून पराभव!

 

मुंबई : सातत्यपूर्ण कामगिरी करीत आगेकूच करणाऱ्या महाराष्ट्राच्या महिला संघाला ७१व्या राष्ट्रीय कबड्डी स्पर्धेत उपउपांत्यपूर्व फेरीतच हरियाणाकडून ४०-२६ असा पराभव स्विकारावा लागला. हरियाणाच्या नियोजनबद्ध खेळासमोर महाराष्ट्राला हार मानावी लागली.

 

हरियाणाने आखले हुशार डावपेच!

हरियाणाने फ गटात जाणूनबुजून गोव्याकडून पराभव पत्करला, जेणेकरून त्यांना रेल्वे संघासोबत लढावे लागू नये. याच रणनीतीचा फायदा घेत त्यांनी महाराष्ट्रावर सुरुवातीपासून वर्चस्व राखत २३-११ अशी भक्कम आघाडी घेतली. उत्तरार्धात देखील हरियाणाने हा जोश कायम ठेवत विजयावर शिक्कामोर्तब केले.

 

महाराष्ट्राचा संघर्ष अपुरा पडला!

महाराष्ट्राच्या आम्रपाली गलांडे आणि मंदिरा कोमकर यांचा खेळ अपेक्षेइतका प्रभावी ठरला नाही. उत्तरार्धात संधी मिळालेल्या तसलीम बुरोंडकर आणि माधुरी गवंडी यांनी काही प्रमाणात चमक दाखवली, मात्र तोपर्यंत सामना हातातून निसटला होता.

 

महाराष्ट्राचा प्रवास थांबला!

गतवर्षी उपांत्य फेरी गाठणाऱ्या महाराष्ट्राच्या महिला संघाला यंदा उपउपांत्यपूर्व फेरीतच गारद व्हावे लागले. हरियाणाच्या कुशल रणनीती आणि भेदक खेळासमोर महाराष्ट्राने अखेर लोटांगण घातले!