सीसीआय बिलियर्ड्स क्लासिक स्पर्धा
ध्वज हरियाचा दणदणीत विजय, अरुण अग्रवालवर ४-० ने मात
मुंबई : धडाकेबाज फॉर्ममधील ध्वज हरियाने सीसीआय बिलियर्ड्स
क्लासिक २०२५ स्पर्धेत आपल्या तुफानी खेळीची चुणूक दाखवत अरुण अग्रवालवर थेट ४-०
अशी सहज आणि दणदणीत विजय नोंदवला. मुंबईतील प्रतिष्ठित सीसीआयच्या विल्सन जोन्स
बिलियर्ड्स हॉलमध्ये ही चुरशीची लढत रंगली.
हरियाने पहिल्याच फ्रेमपासून सामना आपल्या नियंत्रणात
घेतला. १५० चा अफलातून ब्रेक साकारत त्याने १५०-अप फॉरमॅटमध्ये पहिली फ्रेम खिशात
टाकली. पुढच्या फ्रेम्समध्येही त्याचा जलवा कायम राहिला — दुसऱ्या फ्रेममध्ये ६६
आणि ८५,
तिसऱ्यामध्ये १३८, आणि अखेरच्या चौथ्या फ्रेममध्ये ६४ गुणांच्या आकर्षक
ब्रेकसह त्याने सामना आटोपता घेतला. अग्रवालला एकही संधी न देता हरियाने आपली पकड
भक्कम ठेवली.
दरम्यान, बाजूच्या टेबलवर आशियाई विजेता ध्रुव सितवालानेही आपल्या
दर्जदार खेळीने चाहत्यांची मने जिंकली. त्याने नलिन पटेलला ४-० ने पराभूत करत
सामना झकास जिंकला. सितवालाने अनुक्रमे ७४, ८७ आणि निर्णायक चौथ्या फ्रेममध्ये ११० गुणांचा जबरदस्त
ब्रेक साकारला.
तिसऱ्या सामन्यात सिद्धार्थ पारिखनेही आपल्या कौशल्याची
चुणूक दाखवत रोविन डिसूझाला एकही फ्रेम न देता ४-० ने हरवले. पारिखने ९८,
७४, ९७ आणि १४९ अशा सातत्यपूर्ण ब्रेकसह सहज विजय मिळवला.
स्पर्धेतील हे सामने पाहणाऱ्यांसाठी चकित करणारे आणि
रोमांचकारी ठरले असून पुढील लढतीसाठी रंगत वाढली आहे. स्पर्धेचा थरार दिवसेंदिवस
वाढताना दिसत असून सर्वांचे लक्ष आता पुढील सामन्यांकडे लागले आहे.
Post a Comment
0 Comments