खेलो इंडिया युथ गेम्स, बिहार २०२५ विजेतेपदाच्या हॅटट्रिकसाठी महाराष्ट्र सज्ज! महाराष्ट्र-हरयाणामध्ये रंगणार वर्चस्वाची थरारक लढत!

 

खेलो इंडिया युथ गेम्स, बिहार २०२५
विजेतेपदाच्या हॅटट्रिकसाठी महाराष्ट्र सज्ज!
महाराष्ट्र-हरयाणामध्ये रंगणार वर्चस्वाची थरारक लढत!

 

पाटना : खेलो इंडिया युथ गेम्स २०२५ च्या सातव्या पर्वात गतविजेता महाराष्ट्र संघ हॅटट्रिकच्या निर्धाराने मैदानात उतरला आहे. स्पर्धेच्या पहिल्याच दिवशी तिरंदाजीच्या रँकिंग राउंडमध्ये महाराष्ट्राच्या मुलींनी शानदार कामगिरी करत आपला दांडगा आत्मविश्वास दाखवला आणि विजेतेपदाच्या शर्यतीत धमाकेदार एंट्री घेतली!

 

महाराष्ट्र संघाचा भव्य आकडा:

एकूण प्रतिनिधी: ५६५ (४३७ खेळाडू + १२८ प्रशिक्षक/व्यवस्थापक)

महिला खेळाडू: २३८ | पुरुष खेळाडू: १७७

सर्वाधिक मोठा जलतरण संघ: ४४ खेळाडू

२७ पैकी २६ क्रीडाप्रकारांत सहभाग!

 

उत्कृष्ट प्रारंभ – तिरंदाजी कम्पाऊंड प्रकार:

बुलढाण्याच्या तेजल साळवे हिने ६९७ गुणांसह पहिले स्थान पटकावले. तिच्या पाठोपाठ वैदेही जाधव (६९२ गुण) दुसरी आणि प्रितिका (६९० गुण) तिसऱ्या स्थानी!
मुलांच्या रिकर्व प्रकारात ज्ञानेश चेराळे याने ६५१ गुणांची कमाई करत तिसरे स्थान पटकावले.

 

महाराष्ट्राचा विक्रमी इतिहास:

२०१८: उपविजेते

२०१९ (पुणे), २०२० (आसाम), २०२२ (म.प्र.) आणि २०२३ (तामिळनाडू): विजेते

२०२३ मध्ये: १५८ पदके (५७ सुवर्ण, ४८ रौप्य, ५३ कांस्य)

 

वर्चस्वाची झुंज:

आतापर्यंतच्या सहा स्पर्धांपैकी महाराष्ट्रने ४ वेळा, तर हरयाणाने २ वेळा विजेतेपद पटकावले आहे. यंदाही महाराष्ट्र-हरयाणा ही जोडी पदकांसाठी टोकाची झुंज देणार यात शंका नाही.

 

पदकाच्या शर्यतीतील महत्त्वाचे क्रीडाप्रकार:

• जलतरण, जिम्नॅस्टिक्स, ॲथलेटिक्स – महाराष्ट्राची जोरदार पकड
• कुस्ती, मुष्टियुद्ध – हरयाणाची पारंपरिक ताकद

 

दिग्गज खेळाडूंची उपस्थिती:

पार्थ माने, शांभवी क्षीरसागर, प्रितिका प्रदीप, वैष्णवी पवार हे राष्ट्रीय स्तरावरील पदकविजेते खेळाडू यंदाच्या युथ गेम्समध्ये सुवर्णासाठी सज्ज आहेत.

 

शुभेच्छांचा वर्षाव:

महाराष्ट्र क्रीडामंत्री दत्तात्रय भरणे, अप्पर मुख्य सचिव अनिल डिग्गीकर आणि क्रीडा आयुक्त हिरालाल सोनवणे यांनी दृकश्राव्य माध्यमांतून खेळाडूंना शुभेच्छा दिल्या.

 

हॅटट्रिक विजेतेपदाच्या दिशेने मराठमोळा निर्धार!

सातव्या पर्वात महाराष्ट्र पुन्हा एकदा आपले वर्चस्व सिध्द करण्यासाठी सज्ज आहे. पहिल्या दिवसापासून मिळालेली विजयी सुरुवात आणि संघाची एकजूट पाहता महाराष्ट्राचा विजय यंदाही निश्चित वाटतो.

 

छायाचित्र: तिरंदाजीच्या कम्पाऊंड प्रकारात वेध घेताना तेजल साळवे.