धी. युनायटेड स्पोर्ट्स क्लब आयोजित कै. जे. पी. कोळी निमंत्रित विभागीय पुरुष व महिला खो-खो स्पर्धा महिलांच्या उपांत्य फेरीत ज्ञानविकास वि. शिवभक्त आणि युनायटेड वि. रा. फ. नाईक तर पुरुषांमध्ये श्री समर्थ वि. ग्रिफिन आणि शिर्सेकर महात्मा गांधी वि. ज्ञानविकास आमनेसामने

 

धी. युनायटेड स्पोर्ट्स क्लब आयोजित कै. जे. पी. कोळी निमंत्रित विभागीय पुरुष व महिला खो-खो स्पर्धा

 

महिलांच्या उपांत्य फेरीत ज्ञानविकास वि. शिवभक्त आणि युनायटेड वि. रा. फ. नाईक तर पुरुषांमध्ये श्री समर्थ वि. ग्रिफिन आणि शिर्सेकर महात्मा गांधी वि. ज्ञानविकास आमनेसामने

 

ठाणे ४ डिसें : महाराष्ट्र खो-खो असोसिएशन व दि ॲमंच्यूअर खो-खो असोसिएशन ठाणे यांच्या मान्यतेने आणि धी. युनायटेड स्पोर्ट्स क्लब, ठाणे यांच्या भव्य आयोजनाखाली श्री दत्त जयंती उत्सव २०२५ निमित्त सुरू झालेल्या कै. जे. पी. कोळी निमंत्रित विभागीय पुरुष व महिला खो-खो स्पर्धेला आज रोमांचकारी फेरीचे स्वरूप लाभले. उपउपांत्य फेरीतील चुरशीच्या लढतींनी मैदानात उत्साहाचे वातावरण निर्माण केले.

 

महिलांच्या उपउपांत्य सामन्यात यजमान धी युनाटेड स्पो क्लबने शिर्सेकर महात्मा गांधी संघाचा अटीतटीच्या सामन्यात व जादा डावात १२-११ (मध्यंतर ४-४, ३-३ व ५-४) असा एक गुणाने पराभव करत विजयाचा जल्लोष केला. युनाटेडच्या स्नेहा आहेर (३, ३, १.२० मि. संरक्षण व  २ गुण), नम्रता पडये (२.२०, २.४० मि. संरक्षण)  कृतिका ठाणेकर (२.४०, ३.३०, ३ मि संरक्षण व २ गुण) अंजली कनोजा (५ गुण) यांनी धमाकेदार खेळ करत रात्रीच्या थंडीत बहारदार खेळ करत प्रेक्षकांना खिळवून ठेवले. तर पराभूत शिर्सेकर महात्मा गांधीच्या स्नेहा हळदवकर (३, ३.४०, ३ मि. संरक्षण व २ गुण)  मिताली बारसकर (१.४०, २ मि. संरक्षण व ४ गुण यांनी शेवटपर्यंत निकराची झुंज दिली मात्र शेवटी ते पराभूतच झाले.

 

          

पुरुषांच्या उपउपांत्य सामन्यात श्री समर्थ व्यायाम मंदिरने विहंग क्रिडा मंडळावर ११-१० (मध्यंतर ४-४) असा १ गुणाने पराभव केला. श्री समर्थच्या वेदांत देसाई (२, १.५० मि. संरक्षण व १ गुण), हितेश आंग्रे (१.५०, १५० मि. संरक्षण व २ गुण),  अनंत चव्हाण (२.१०, १.४० मि. संरक्षण) व विशाल खाके (१.३०, १.१० मि. संरक्षण व १ गुण) यांनी सुरवातीपासूनच सामन्यावर वर्चस्व राखत समाना खिशात घातला. तर पराभूत  विहंगच्या लक्ष्मण गवस (२.५० मि. संरक्षण व ३ गुण),  आकाश साळवे (२.५०, १.३० मि. संरक्षण व १ गुण), अनंत साटले (नाबाद २, १ मि. संरक्षण व १ गुण) यांनी दिलेली कडवी लढत प्रेक्षकांच्या डोळ्यांचे पारणे फेडणारी होती.

 

इतर सामन्यांचे संक्षिप्त निकाल

पुरुष विभाग

१.      ग्रिफिन जिमखाना, कोपरखैरणे यांनी आनंद भारती समाज, ठाणे वर १६-९ असा १ डाव राखून ७ गुणांनी विजय मिळवला.

 

२.     श्री सह्याद्री संघ, मुंबई उपनगर यांनी राज क्रीडा मंडळ, बदलापूर वर १८-११ असा ७ गुणांनी विजय मिळवला.

 

३.     श्री समर्थ व्यायाम मंदिर, मुंबई यांनी प्रबोधन क्रीडा भवन, मुंबई उपनगर वर १५-१२ असा ३ गुणांनी विजय मिळवला.

 

४.     विहंग क्रीडा मंडळ, ठाणे यांनी एनबिसिएस, घणसोली वर १३-१० असा १ डाव राखून ३ गुणांनी विजय मिळवला.

 

महिला विभाग

१.      शिर्सेकर महात्मा गांधी अॅकॅडमी, बांद्रा यांनी अमरहिंद मंडळ, दादर वर ९-५ असा १ डाव राखून ४ गुणांनी विजय मिळवला.

 

२.     घी युनायटेड स्पो. क्लब, ठाणे यांनी शिवनेरी सेवा मंडळ, मुंबई वर ५-२ असा १ डाव राखून ३ गुणांनी विजय मिळवला.

 

३.     रा. फ. नाईक महिला संघ यांनी न्यू बॉम्बे सेंटर स्पो. क्लब वर १०-६ असा १ डाव राखून ४ गुणांनी विजय मिळवला.

 

४.     सरस्वती कन्या संघ, माहीम यांनी आनंद भारती समाज, ठाणे वर १४-६ असा ८ गुणांनी विजय मिळवला.

 

५.     रा. फ. नाईक महिला संघ, कोपरखैरणे यांनी सरस्वती कन्या संघ, माहीम यांचा १३-५ असा १ डाव राखून ८ गुणांनी पराभव केला.

 

उपांत्य लढतीत थरार शिगेला

आता उद्याच्या उपांत्य सामन्यांमध्ये महिलांमध्ये ज्ञानविकास वि. शिवभक्त व युनायटेड वि. रा. फ. नाईक आणि पुरुषांमध्ये श्री समर्थ वि. ग्रिफिन व शिर्सेकर महात्मा गांधी वि. ज्ञानविकास या लढती रंगणार आहे. रणकंदनाचा आवाज, वेगवान चकवे आणि आक्रमक झेप यांचा थरार अनुभवण्यासाठी क्रीडाप्रेमींनी मैदान गाठण्याचे आवाहन आयोजकांनी केले आहे.