समाजसेविका स्व. मंगलाताई अडसूळ स्मृती चषक बुद्धिबळ स्पर्धा शनिवारी ८, ११ आणि १४ वर्षाखालील मुलामुलींसाठी ६ गटांत रंगणार बुद्धीचा थरार १२० पुरस्कारांची मेजवानी

 

समाजसेविका स्व. मंगलाताई अडसूळ स्मृती चषक बुद्धिबळ स्पर्धा शनिवारी

८, ११ आणि १४ वर्षाखालील मुलामुलींसाठी ६ गटांत रंगणार बुद्धीचा थरार

१२० पुरस्कारांची मेजवानी

 

मुंबई – बुद्धिबळाच्या पटावर चालणार मेंदूंची झुंज, मातृशक्तीचा सन्मान आणि नवोदित खेळाडूंसाठी सुवर्णसंधी! जागतिक महिला दिनाचे औचित्य साधत आनंदराव अडसूळ चॅरिटेबल ट्रस्ट आणि आयडियल स्पोर्ट्स अकॅडमी-ग्रुप यांच्या संयुक्त विद्यमाने ज्येष्ठ समाजसेविका स्व. मंगलाताई अडसूळ स्मृती चषक जलद बुद्धिबळ स्पर्धा येत्या ७ मार्च रोजी दुपारी २ वाजता आरएमएमएस वातानुकुलीन सभागृहात उत्साहात पार पडणार आहे. ८, ११ आणि १४ वर्षाखालील मुलामुलींसाठी स्वतंत्र ६ गटांत होणारी ही स्पर्धा बुद्धिबळप्रेमींसाठी खास आकर्षण ठरणार आहे.

 

६ वयोगट, १२० बक्षिसे आणि मातृसन्मान

या प्रतिष्ठेच्या स्पर्धेत ८, ११ आणि १४ वर्षाखालील मुलामुलींचे स्वतंत्र ६ गट असणार आहेत. प्रत्येक गटात २० बक्षिसे देण्यात येणार असून एकूण १२० पुरस्कारांची आकर्षक मेजवानी असणार आहे. विशेष म्हणजे प्रत्येक गटातील प्रथम क्रमांक पटकावणाऱ्या स्पर्धकांच्या मातांचा विशेष सन्मान करण्यात येणार असून, महिला दिनानिमित्त मातृशक्तीला आदरांजली अर्पण केली जाणार आहे.

 

स्विस लीग पद्धतीत ४ फेऱ्यांची रंगतदार लढत

को-ऑपरेटीव्ह बँक एम्प्लॉईज युनियन, मुंबई आणि मुंबई शहर जिल्हा बुद्धिबळ संघटना यांच्या सहकार्याने ही स्पर्धा आयोजित करण्यात आली आहे. सामने स्विस लीग पद्धतीने किमान ४ फेऱ्यांमध्ये पार पडणार असून प्रत्येक फेरीसाठी १५ मिनिटे + ३ सेकंद इन्क्रिमेंट अशी वेळमर्यादा असेल. संयोजकांकडून सर्व स्पर्धकांना बुद्धिबळ पट आणि घड्याळाची सुविधा उपलब्ध करून देण्यात येणार असल्यामुळे खेळाडूंना केवळ आपल्या डावपेचांवर लक्ष केंद्रित करता येणार आहे.

 

प्रवेशासाठी ३ मार्च अंतिम मुदत

स्पर्धेत सहभागी होऊ इच्छिणाऱ्या खेळाडूंनी प्रवेश अर्ज व अधिक माहितीसाठी संयोजक प्रमोद पार्टे किंवा मुंबई शहर जिल्हा बुद्धिबळ संघटनेचे सेक्रेटरी राजाबाबू गजेंगी (९३२४७ १९२९९) यांच्याशी ३ मार्चपर्यंत व्हॉटसअॅपवर संपर्क साधावा, असे आवाहन आयोजकांनी केले आहे.

 

बुद्धी, वेग आणि संयमाची खरी कसोटी

ही स्पर्धा केवळ विजेते ठरविणारी नाही, तर शालेय स्तरावर बुद्धिबळाची आवड वाढविणारी आणि नव्या प्रतिभेला व्यासपीठ देणारी ठरणार आहे. स्व. मंगलाताई अडसूळ यांच्या स्मृतीला अभिवादन करत बुद्धीचा हा उत्सव साजरा होणार असून, भविष्यातील बुद्धिबळपटूंना प्रेरणा देणारा हा उपक्रम ठरणार आहे. ७ मार्चला आरएमएमएस सभागृहात बुद्धिबळाच्या पटावर चालणार आहे खऱ्या अर्थाने विचारांचा जल्लोष!