रायपूरमध्ये साक्षीची ‘सुवर्ण गर्जना’! खेलो इंडिया ट्रायबल स्पर्धा वेटलिफ्टिंगमध्ये साक्षी बुरकुलेची दमदार कामगिरी

रायपूरमध्ये साक्षीची ‘सुवर्ण गर्जना’!

खेलो इंडिया ट्रायबल स्पर्धा

वेटलिफ्टिंगमध्ये साक्षी बुरकुलेची दमदार कामगिरी

 

रायपूर : ताकद, जिद्द आणि आत्मविश्वासाचा संगम दाखवत महाराष्ट्राच्या मातीतील खेळाडूंनी पुन्हा एकदा देशभरात ठसा उमटवला! १ ली खेलो इंडिया ट्रायबल स्पर्धा २०२६ मध्ये यवतमाळच्या साक्षी बुरकुलेने वेटलिफ्टिंगमध्ये सुवर्ण पदक पटकावत महाराष्ट्राचा झेंडा उंचावला. पदार्पणातच केलेल्या या सुवर्ण कामगिरीमुळे साक्षीने स्पर्धेत सर्वांचे लक्ष वेधून घेतले.

 

८६ किलो गटात साक्षीचा दबदबा

वेटलिफ्टिंगच्या ८६ किलो गटात साक्षी बुरकुलेने एकूण १५० किलो वजन उचलत सुवर्ण पदकावर नाव कोरले. स्पर्धेच्या प्रत्येक टप्प्यात स्थिर आणि आत्मविश्वासपूर्ण कामगिरी करत तिने प्रतिस्पर्ध्यांवर वर्चस्व गाजवले.

 

स्नॅच आणि क्लीन अ‍ॅण्ड जर्कमध्ये अचूक प्रदर्शन

साक्षी बुरकुलेने स्नॅच प्रकारातील तिसऱ्या प्रयत्नात ६८ किलो, तर क्लीन अ‍ॅण्ड जर्क प्रकारात ८२ किलो वजन उचलत एकूण १५० किलोची कामगिरी नोंदवली आणि सुवर्ण पदक निश्चित केले. तिच्या या अचूक आणि सातत्यपूर्ण प्रदर्शनाने विजयावर शिक्कामोर्तब झाले.

 

रौप्य व कांस्य विजेते

या गटात छत्तीसगडच्या रूषिका कश्यपने १२१ किलो वजन उचलत रौप्य पदक, तर आसामच्या बितूपूर्णाने ११८ किलो वजनासह कांस्य पदक पटकावले. मात्र संपूर्ण स्पर्धेत साक्षी बुरकुलेची कामगिरी सरस ठरली.

 

पदार्पणात सुवर्णाचा करिश्मा

पहिल्याच मोठ्या राष्ट्रीय स्तरावरील स्पर्धेत साक्षी बुरकुलेने सुवर्ण पदक जिंकत ‘पदार्पणातच सुवर्ण’ हा पराक्रम साधला. तिच्या या यशामुळे महाराष्ट्राच्या क्रीडाक्षेत्रात नव्या आशा निर्माण झाल्या आहेत.