महाराष्ट्रात टेनिसचा जागतिक जल्लोष! राज्यभरात २० आंतरराष्ट्रीय आयटीएफ स्पर्धांची ऐतिहासिक घोषणा मुंबईतून सुरुवात, नागपूर आणि संभाजीनगरमध्येही होणार जागतिक दर्जाच्या टेनिस स्पर्धा महाराष्ट्रात टेनिसचा नवा अध्याय

 

महाराष्ट्रात टेनिसचा जागतिक जल्लोष! 

राज्यभरात २० आंतरराष्ट्रीय आयटीएफ स्पर्धांची ऐतिहासिक घोषणा

मुंबईतून सुरुवात, नागपूर आणि संभाजीनगरमध्येही होणार जागतिक दर्जाच्या टेनिस स्पर्धा

महाराष्ट्रात टेनिसचा नवा अध्याय

 

मुंबई : महाराष्ट्रातील टेनिसप्रेमींसाठी एक ऐतिहासिक आणि उत्साहवर्धक बातमी समोर आली आहे. महाराष्ट्र शासनाच्या क्रीडा व युवक सेवा संचालनालय, एटीपी आयोजन समिती आणि महाराष्ट्र राज्य लॉन टेनिस संघटना (एमएसएलटीए) यांच्या संयुक्त विद्यमाने राज्यभरात तब्बल २० आंतरराष्ट्रीय आयटीएफ टेनिस स्पर्धा आयोजित करण्याची घोषणा करण्यात आली आहे. गेल्या पाच वर्षांत एटीपी टूर २५०, डब्ल्यूटीए १२५ आणि पीएमआर चॅलेंजर यांसारख्या मोठ्या स्पर्धांचे यशस्वी आयोजन केल्यानंतर आता टेनिसचा विकास थेट जिल्हा स्तरापर्यंत नेण्याचा हा मोठा निर्णय मानला जात आहे.

 

जिल्हा स्तरावर जागतिक दर्जाच्या स्पर्धा

या उपक्रमाअंतर्गत आंतरराष्ट्रीय टेनिस महासंघ (ITF) मान्यताप्राप्त एकूण २० स्पर्धा राज्यातील विविध जिल्ह्यांमध्ये आयोजित केल्या जाणार आहेत. प्रत्येक स्पर्धेसाठी १५,००० आणि २५,००० अमेरिकन डॉलर्स इतकी बक्षीस रक्कम ठेवण्यात येणार आहे. या स्पर्धांमुळे तळागाळातील आणि जिल्हा स्तरावरील टेनिस खेळाडूंना मोठी संधी मिळणार असून भारतीय खेळाडूंना जागतिक क्रमवारीत गुण मिळवण्याचा आणि आंतरराष्ट्रीय स्तरावर चमकण्याचा मार्ग खुला होणार आहे.

 

पत्रकार परिषदेत मान्यवरांची उपस्थिती

या महत्त्वपूर्ण निर्णयाची घोषणा झालेल्या पत्रकार परिषदेला एमएसएलटीएचे अध्यक्ष प्रशांत सुतार, मानद सचिव सुंदर अय्यर, आयटीएफ स्पर्धा कार्यक्रमाचे अध्यक्ष आशिष शर्मा आणि एमएमआरडीएचे व्यवस्थापकीय संचालक व या उपक्रमाचे सचिव श्रावण हर्डीकर उपस्थित होते. सर्व मान्यवरांनी या उपक्रमाला महाराष्ट्रातील टेनिससाठी ऐतिहासिक पाऊल असे संबोधले.

 

ग्रामीण भागातील खेळाडूंना मोठी संधी

या निर्णयाबाबत बोलताना प्रशांत सुतार म्हणाले, “माझ्या अध्यक्षपदाच्या कार्यकाळातील हे पहिले महत्त्वाचे पाऊल आहे. टेनिस हा खेळ केवळ महानगरांपुरता मर्यादित न राहता ग्रामीण आणि जिल्हा स्तरावरील खेळाडूंपर्यंत पोहोचवणे हे आमचे ध्येय आहे. या स्पर्धांमुळे भारतीय खेळाडूंना परदेशात जाण्याचा खर्च न करता मायदेशातच आंतरराष्ट्रीय अनुभव मिळेल.”

 

शासनाचा विशेष निर्णय आणि आर्थिक पाठबळ

या उपक्रमासाठी महाराष्ट्र शासनाच्या नगरविकास विभागाने विशेष शासन निर्णय जाहीर केला आहे. ज्या शहरांमध्ये टेनिससाठी पुरेशा सुविधा आहेत किंवा जिथे नवीन सुविधा उभारण्याचे नियोजन आहे, अशा शहरांमध्ये स्पर्धा आयोजित केल्या जातील. स्पर्धांच्या बक्षीस रकमेसाठी महानगरपालिकांच्या वार्षिक अर्थसंकल्पातील ५ टक्के क्रीडा निधी वापरला जाणार असून स्थानिक उद्योग आणि संस्थांच्या सहकार्याने अतिरिक्त आर्थिक मदतही मिळवली जाईल.

 

जिल्हास्तरीय समित्यांमार्फत अंमलबजावणी

या उपक्रमाची प्रभावी अंमलबजावणी करण्यासाठी महानगरपालिका आयुक्त, जिल्हाधिकारी आणि पोलीस अधीक्षक यांच्या नेतृत्वाखाली जिल्हास्तरीय समित्या स्थापन केल्या जातील. सरकारने आशिष शर्मा यांची अध्यक्ष आणि श्रावण हर्डीकर यांची सचिव म्हणून नियुक्ती केली आहे. आशिष शर्मा म्हणाले, “तळागाळापासून टेनिसची मजबूत व्यवस्था उभी करण्यासाठी आम्ही एमएसएलटीएसोबत भागीदारी करत आहोत.”

 

ज्युनियर खेळाडूंनाही प्रेरणादायी संधी

या स्पर्धांच्या आधीच्या आठवड्यात अखिल भारतीय ज्युनियर टेनिस स्पर्धा आयोजित केल्या जातील, अशी माहिती श्रावण हर्डीकर यांनी दिली. यामुळे कनिष्ठ खेळाडूंना वरिष्ठ आंतरराष्ट्रीय खेळाडूंचा खेळ प्रत्यक्ष पाहण्याची आणि त्यातून प्रेरणा घेण्याची संधी मिळणार आहे.

 

स्पर्धांचे वेळापत्रक

मुंबई: १५ ते २२ मार्च

नागपूर: २२ ते २९ मार्च

संभाजीनगर: २९ मार्च ते ५ एप्रिल