मावळी मंडळ कबड्डीत तिसऱ्या दिवशी थरार शिगेला! ओम् वर्तकनगर, श्रीराम, जय बजरंग, मिडलाईन चौथ्या फेरीत अश्वमेघची ५-५ चढायांमध्ये झुंजार कामगिरी महिला गटात ओम् वर्तकनगरची झंझावाती आगेकूच कबड्डीचा थरार शिगेला

मावळी मंडळ कबड्डीत तिसऱ्या दिवशी थरार शिगेला!

ओम् वर्तकनगर, श्रीराम, जय बजरंग, मिडलाईन चौथ्या फेरीत

अश्वमेघची ५-५ चढायांमध्ये झुंजार कामगिरी

महिला गटात ओम् वर्तकनगरची झंझावाती आगेकूच

कबड्डीचा थरार शिगेला

 

ठाणे : ठाणे चरई येथील भव्य मैदानावर सुरू असलेल्या श्री मावळी मंडळ आयोजित ७३व्या राज्यस्तरीय कबड्डी स्पर्धेत तिसऱ्या दिवशी सामन्यांनी उत्कंठेची पराकाष्ठा गाठली. प्रत्येक लढत शेवटच्या क्षणापर्यंत रंगत राहिली आणि खेळाडूंच्या जिद्दीने प्रेक्षकांना अक्षरशः मंत्रमुग्ध केले.

 

चौथ्या फेरीत दमदार प्रवेश : पुरुष व महिला गटातील आगेकूच

महिला गटात ओम् वर्तकनगर संघाने चौथी फेरी गाठत आपले वर्चस्व कायम ठेवले, तर पुरुष गटात शिवमुद्रा प्रतिष्ठान, श्रीराम विश्वस्त मंडळ, जय बजरंग-वाशिंद आणि मिडलाईन यांनी दमदार कामगिरी करत पुढील फेरीत प्रवेश केला.

 

अश्वमेघचा थरार : ५-५ चढायांतून नाट्यमय विजय

पुरुष गटातील अत्यंत रोमहर्षक सामन्यात अश्वमेघ संघाने बालगोपाळ मंडळावर ३३-३२ (७-६) असा ५-५ चढायांमध्ये विजय मिळवला. पूर्वार्धात १३-१५ पिछाडीवर असलेल्या अश्वमेघने पूर्ण वेळेत २६-२६ अशी बरोबरी साधली. निर्णायक क्षणी आदित्य पांडे यांनी ५-५ चढायांतील दुसऱ्या चढाईत ३ गडी बाद करत सामना जिंकून दिला. त्याला गणेश रणनवरे, हर्षल शिंदे व शुभम पांडे यांची साथ लाभली, तर बालगोपाळकडून पंकज फाटक, अमित शहा, दिपू तिवारी यांचा प्रयत्न थोडा कमी पडला.

 

शिवमुद्रा प्रतिष्ठानचा कमबॅक : दमदार पलटवार

शिवमुद्रा प्रतिष्ठान संघाने मध्यंतरातील १६-१७ पिछाडीवरून गुड मॉर्निंग स्पोर्टस् वर ३७-२७ अशी शानदार मात केली. विशाल लाड, राकेश घाडी व अनिकेत सोनुले यांच्या चढाई-पकडीच्या खेळामुळे हा विजय शक्य झाला, तर प्रतिस्पर्धी संघातील सुरज दळवी व आयुष पवार यांचा खेळ उत्तरार्धात ढेपळला.

 

श्रीराम विश्वस्तचा जबरदस्त पलटवार

श्रीराम विश्वस्त मंडळाने पहिल्या डावातील १६-२३ पिछाडीवरून श्री विठ्ठल मंडळावर ४१-३८ असा नाट्यमय विजय मिळवला. अक्षय मकवाना, चिन्मय गुरव, सिद्धेश पाणीचाळ यांनी सुरुवातीला आघाडी मिळवून दिली होती; मात्र उत्तरार्धात तुषार शिंदे, हर्ष काळे व आदित्य पात यांनी टॉप गिअर टाकत २ लोण देत ३ गुणांनी बाजी पलटवली.

 

जय बजरंगची सरशी : विराज-आशिषची जोडी चमकली

जय बजरंग-वाशिंद संघाने वीर परशुराम संघावर २८-२१ असा विजय मिळवला. विराज शिंदे व आशिष पाटील यांच्या उत्कृष्ट चढाई-पकडीच्या खेळामुळे संघाने चौथ्या फेरीत स्थान निश्चित केले.

 

महिला गटात ओम् वर्तकनगरचा धडाका

महिला गटात ओम् वर्तकनगर संघाने अमर हिंद मंडळावर ४२-२४ अशी एकतर्फी मात करत चौथी फेरी गाठली. पूर्वार्धात २४-०७ अशी आघाडी घेत दोन लोण दिल्यानंतर उत्तरार्धात आणखी एक लोण देत विजयावर शिक्कामोर्तब केले. वैष्णवी साळुंखे, पूजा जाधव व पूर्वा इंगवले यांच्या झंझावाती खेळामुळे हा विजय शक्य झाला, तर साईशा पेडणेकर अमर हिंदकडून चमकली.

 

अन्य सामने : जय भारत, स्वराज्य व मिडलाईनची घोडदौड

महिला गटातील दुसऱ्या फेरीत जय भारत स्पोर्टस् ने स्फूर्ती सेवा वर ३८-३४ अशी मात करत तिसरी फेरी गाठली. श्रेया गावंड, समृद्धी महागडे व परी घडशी यांच्या खेळाने विजय मिळवला, तर दीपाली बागडे, नूतन चव्हाण, शामली यांनी झुंज दिली.

स्वराज्य स्पोर्टस् ने रा. फ. नाईक संघावर ३३-१५ असा विजय मिळवला. यासिका पुजारी, मनीषा चौगुले व प्रतिक्षा तांडेल यांनी उत्कृष्ट कामगिरी केली, तर रेखा चिकणे एकाकी लढली.

मिडलाईन अकादमी ने संघर्ष संस्था वर ३१-१८ अशी सहज मात करत आपली घोडदौड कायम ठेवली. मोक्ष पुजारी, श्रावणी हांडे, सिद्धी बलकवडे यांनी शानदार खेळ केला, तर प्रतिक्षा मारका व भूमिका भारती यांनी प्रतिस्पर्धी संघाकडून प्रयत्न केले.