बाल गोपाळ-आयडियल कॅरम सेंटरला काळाचौकीत उत्स्फूर्त प्रतिसाद! स्व. दशरथ चव्हाण स्मृती कॅरम सेंटरचा शुभारंभ; शालेय मुलामुलींना तज्ज्ञांचे मोफत मार्गदर्शन कॅरमच्या पटावर नव्या पिढीचा उत्साह उसळला!

 

बाल गोपाळ-आयडियल कॅरम सेंटरला काळाचौकीत उत्स्फूर्त प्रतिसाद!

स्व. दशरथ चव्हाण स्मृती कॅरम सेंटरचा शुभारंभ; शालेय मुलामुलींना तज्ज्ञांचे मोफत मार्गदर्शन

कॅरमच्या पटावर नव्या पिढीचा उत्साह उसळला!

 

मुंबई : मुंबईतील काळेवाडी-काळाचौकी परिसरात कॅरम खेळाला नवी उभारी देणाऱ्या स्व. दशरथ चव्हाण स्मृती बाल गोपाळ-आयडियल कॅरम सेंटरच्या शुभारंभाला शालेय मुलामुलींचा उत्स्फूर्त प्रतिसाद लाभला. बाल गोपाळ मित्र मंडळ आणि आयडियल स्पोर्ट्स अकॅडमी-ग्रुप यांच्या संयुक्त विद्यमाने सुरू झालेल्या या उपक्रमामुळे परिसरातील नवोदित कॅरमपटूंना दर्जेदार प्रशिक्षणाचे नवे व्यासपीठ उपलब्ध झाले आहे.

 

मान्यवरांच्या उपस्थितीत कॅरम सेंटरचा प्रारंभ

कॅरम सेंटरचे उद्घाटन शिवछत्रपती पुरस्कार प्राप्त लीलाधर चव्हाण, कॅरम मार्गदर्शक सचिन शिंदे आणि क्रीडाप्रेमी सुनिल नागवेकर यांच्या प्रमुख उपस्थितीत उत्साहात पार पडले. कॅरमप्रेमी आणि शालेय खेळाडूंनी या उपक्रमाचे स्वागत करत कॅरम खेळाविषयीची आपली आवड व्यक्त केली.

 

नवोदितांना घडविण्याचा सातत्यपूर्ण प्रयत्न

आयडियल शालेय क्रीडा चळवळीअंतर्गत कॅरम खेळाचा प्रसार आणि नवोदित कॅरमपटूंचा सहभाग वाढविण्यासाठी आयडियल स्पोर्ट्स अकॅडमी-ग्रुप गेल्या दशकभरापासून विविध विनाशुल्क कॅरम उपक्रम राबवत आहे. तज्ज्ञांच्या मार्गदर्शनाखाली अनेक शालेय खेळाडूंना कॅरम खेळाचे प्राथमिक आणि प्रगत प्रशिक्षण देण्यात येत आहे.

 

गुणवत्तापूर्ण प्रशिक्षणाचा संकल्प

शालेय डीएसओ कॅरम स्पर्धांमध्ये अनेक खेळाडूंना चॅम्पियन कॅरम बोर्डवर खेळण्याचा पुरेसा सराव नसल्यामुळे अपेक्षित कामगिरी करण्यात अडचणी येतात. ही उणीव भरून काढण्यासाठी आणि खेळाडूंना दर्जेदार सुविधा उपलब्ध करून देण्यासाठी हे कॅरम सेंटर सुरू करण्यात आले आहे. पुण्यात स्थायिक होण्यापूर्वी नामवंत राष्ट्रीय कॅरमपटू सुहास कांबळी यांनी दिलेल्या मार्गदर्शनाचा वारसा या उपक्रमातून पुढे नेण्याचा आयडियल ग्रुपचा मानस आहे.

 

कॅरमचे बारकावे शिकविण्यावर भर

कॅरम सेंटरच्या उद्घाटनप्रसंगी सचिन शिंदे यांनी शालेय मुलामुलींना प्राथमिक सराव कसा करावा, स्ट्रायकरवर नियंत्रण, बोटांची योग्य पकड, तसेच कॅरम खेळताना बसण्याची योग्य पद्धत याविषयी सविस्तर मार्गदर्शन केले. तर लीलाधर चव्हाण यांनी कॅरम खेळातील प्रमुख नियम, शिस्त आणि स्पर्धात्मक खेळाचे महत्त्व याविषयी माहिती दिली.

 

कॅरमच्या नव्या पर्वाची दमदार सुरुवात

काळाचौकी परिसरातील शालेय मुलामुलींना कॅरम खेळासाठी दर्जेदार प्रशिक्षण, मार्गदर्शन आणि सरावाची सुविधा उपलब्ध करून देणारे बाल गोपाळ-आयडियल कॅरम सेंटर भविष्यात अनेक गुणवान कॅरमपटू घडविण्याचे केंद्र ठरणार आहे. कॅरमच्या पटावर नवे तारे घडविण्याच्या दिशेने उचललेले हे पाऊल क्रीडा क्षेत्रासाठी निश्चितच प्रेरणादायी ठरणार आहे.