एलआयसी-अडसूळ ट्रॉफी कॅरम स्पर्धेत अपना, म्युनिसिपल बँकेची विजयी सलामी! एनकेजीएसबी व ग्रेटर बॉम्बे बँकेचीही दमदार सुरुवात साखळी सामन्यांत थरारक लढती कॅरमच्या पटावर बँक संघांचा विजयी धडाका!

 

एलआयसी-अडसूळ ट्रॉफी कॅरम स्पर्धेत अपना, म्युनिसिपल बँकेची विजयी सलामी!

एनकेजीएसबी व ग्रेटर बॉम्बे बँकेचीही दमदार सुरुवात

साखळी सामन्यांत थरारक लढती

कॅरमच्या पटावर बँक संघांचा विजयी धडाका!

मुंबई : मुंबईतील दादर-पश्चिम येथील सिबिईयु सभागृहात रंगलेल्या एलआयसी-आनंदराव अडसूळ ट्रस्ट ट्रॉफी आंतर सहकारी बँक सांघिक कॅरम स्पर्धेत पहिल्याच दिवशी बँक संघांनी आपल्या दमदार खेळाने क्रीडारसिकांची मने जिंकली. अपना बँक, म्युनिसिपल बँक, एनकेजीएसबी बँक आणि ग्रेटर बॉम्बे बँक यांनी सलामीच्या साखळी सामन्यांत विजय मिळवत विजेतेपदाच्या दिशेने भक्कम पाऊल टाकले.

 

अपना बँकेचा एकतर्फी विजय : प्रियेश, गितेश, महादेव यांची चमक

साखळी ‘अ’ गटातील सामन्यात प्रियेश पाठक, गितेश कोरगावकर आणि महादेव जवीर यांच्या विजयी खेळाच्या जोरावर अपना बँकेने एमएससी बँकेवर ३-० असा एकतर्फी विजय मिळवला. तिघांनीही प्रतिस्पर्ध्यांना कोणतीही संधी न देता सहज विजय मिळवून संघाला दणदणीत सुरुवात करून दिली.

 

ग्रेटर बॉम्बे बँकेची थरारक बाजी : शैलेश, अनिलची कमाल

साखळी ‘ब’ गटातील कोकण बँक विरुद्ध ग्रेटर बॉम्बे बँक सामना अत्यंत अटीतटीचा ठरला. सोहेल मुकादम याने सचिन मेस्त्री याचा २२-०, २०-० असा पराभव करून कोकण बँकेला आघाडी मिळवून दिली. मात्र त्यानंतर शैलेश कर्पे याने गसुद्दीन नाईक याला ०-१७, १६-०, ११-१ असे हरवले, तर अनिल निकाळे याने मुबीन शेख याच्यावर १६-०, १२-९ अशी मात करत ग्रेटर बॉम्बे बँकेला २-१ असा चुरशीचा विजय मिळवून दिला.

 

म्युनिसिपल बँकेचा दबदबा : राहुल, दानिश, राजेश यांची सरशी

इतर सामन्यात राहुल पडेलकर, दानिश काझी आणि राजेश जाधव यांच्या प्रभावी खेळामुळे म्युनिसिपल बँकेने कुर्ला बँकेला ३-० असे सहज पराभूत केले. तिन्ही खेळाडूंनी उत्कृष्ट अचूकता आणि सातत्य दाखवत संघाला विजयी सुरुवात मिळवून दिली.

 

एनकेजीएसबी बँकेचा विजय : प्रथमेश, ऋषिकेश, गणेश यांची कामगिरी

तसेच प्रथमेश पवार, ऋषिकेश परब आणि गणेश शानभाग यांच्या शानदार कामगिरीमुळे एनकेजीएसबी बँकेने जनकल्याण बँकेवर ३-० असा विजय मिळवला. तिन्ही खेळाडूंनी आपल्या अचूक फटक्यांनी प्रतिस्पर्ध्यांना पूर्णपणे नामोहरम केले.

 

उद्घाटन सोहळा : मान्यवरांच्या उपस्थितीत भव्य प्रारंभ

स्पर्धेचे उद्घाटन माजी केंद्रीय अर्थ राज्यमंत्री आनंदराव अडसूळ, कार्याध्यक्ष सुनील साळवी, जनरल सेक्रेटरी नरेंद्र सावंत, खजिनदार प्रमोद पार्टे, सहखजिनदार जनार्दन मोरे, उपाध्यक्ष प्रकाश वाघमारे, प्रवीण शिंदे आणि शिवछत्रपती पुरस्कार प्राप्त लीलाधर चव्हाण यांच्या प्रमुख उपस्थितीत संपन्न झाले.

 

३ मेपर्यंत रंगणार कॅरमचा थरार!

आनंदराव अडसूळ चॅरिटेबल ट्रस्ट, को-ऑपरेटीव्ह बँक एम्प्लॉईज युनियन-मुंबई आणि आयडियल स्पोर्ट्स अकॅडमी तर्फे महाराष्ट्र दिन व कामगार दिनानिमित्त आयोजित हा उपक्रम ३ मेपर्यंत सुरू राहणार आहे. पुढील सामन्यांत अजून अधिक चुरस आणि थरार पाहायला मिळणार असून कॅरमप्रेमींसाठी ही स्पर्धा खऱ्या अर्थाने क्रीडामहोत्सव ठरत आहे.