अमृत महोत्सवी मोहिते ट्रॉफी शालेय विनाशुल्क कॅरम स्पर्धेला सोमवार पासून प्रारंभ! ३२ उदयोन्मुख कॅरमपटूंमध्ये रंगणार विजेतेपदाची चुरस आर्यन राऊत, प्रसन्न गोळे, तनया दळवींसह दिग्गज शालेय खेळाडू सज्ज कॅरमच्या पटावर उद्याचे चॅम्पियन घडविण्याचा संकल्प!

 

अमृत महोत्सवी मोहिते ट्रॉफी शालेय विनाशुल्क कॅरम स्पर्धेला सोमवार पासून प्रारंभ!

३२ उदयोन्मुख कॅरमपटूंमध्ये रंगणार विजेतेपदाची चुरस

आर्यन राऊत, प्रसन्न गोळे, तनया दळवींसह दिग्गज शालेय खेळाडू सज्ज

कॅरमच्या पटावर उद्याचे चॅम्पियन घडविण्याचा संकल्प!

 

मुंबई : मुंबईतील कॅरमप्रेमींसाठी आणि शालेय खेळाडूंसाठी मोठी पर्वणी ठरणारी अमृत महोत्सवी गोविंदराव मोहिते ट्रॉफी १६ वर्षांखालील शालेय विनाशुल्क कॅरम स्पर्धा आजपासून रंगणार असून राज्यातील विविध जिल्ह्यांतील ३२ गुणवान खेळाडू विजेतेपदासाठी आपली बोटांची जादू दाखविण्यास सज्ज झाले आहेत. चॅम्पियन कॅरम बोर्डवर खेळल्या जाणाऱ्या या स्पर्धेत कौशल्य, अचूकता आणि आत्मविश्वासाचा थरार अनुभवायला मिळणार आहे.

 

उद्घाटन लढत : नील म्हात्रे विरुद्ध निखील भोसले

परेल येथील आरएमएमएस सभागृहात स्पर्धेची उद्घाटनीय लढत पाटकर विद्यालय-डोंबिवलीचा नील म्हात्रे आणि मायकल हायस्कूल-कुर्ल्याचा निखील भोसले यांच्यात रंगणार आहे. या स्पर्धेच्या उद्घाटनप्रसंगी गोविंदराव मोहिते, निवृत्ती देसाई, अण्णा शिर्सेकर, बजरंग चव्हाण, सुनील बोरकर, शिवाजी काळे आणि विलास डांगे यांची प्रमुख उपस्थिती लाभणार आहे.

 

गोविंदराव मोहिते यांच्या वाढदिवसानिमित्त अनोखा उपक्रम

आयडियल स्पोर्ट्स अकॅडमीचे कार्याध्यक्ष गोविंदराव मोहिते यांच्या वाढदिवसाचे औचित्य साधून आयडियल स्पोर्ट्स अकॅडमी-ग्रुप आणि राष्ट्रीय मिल मजदूर संघ यांच्या संयुक्त विद्यमाने ही विनाशुल्क स्पर्धा आयोजित करण्यात आली आहे. शालेय खेळाडूंना आगामी डीएसओ कॅरम स्पर्धांसाठी दर्जेदार सराव आणि स्पर्धात्मक अनुभव मिळावा हा या उपक्रमामागील प्रमुख उद्देश आहे.

 

विजेतेपदासाठी बलाढ्य दावेदार सज्ज

स्पर्धेत न्यू इंग्लिश स्कूल-जैतापूरचा आर्यन राऊत, पोद्दार हायस्कूल-मालाडचा प्रसन्न गोळे, पुष्कर गोळे, कळसुलकर इंग्लिश स्कूल-सावंतवाडीचा भरत सावंत, ठाकूर रामनारायण पब्लिक स्कूल-दहिसरचा तीर्थ ठाकर, पाटकर विद्यालय-डोंबिवलीची देविका जोशी, महात्मा गांधी विद्यामंदिर-वांद्रेची तनया दळवी आणि कनोसा हायस्कूल-कांदिवलीची वेदिका पोमेंडकर हे अव्वल शालेय कॅरमपटू विजेतेपदासाठी प्रबळ दावेदार मानले जात आहेत. या सर्व खेळाडूंकडून सर्वांगसुंदर आणि दर्जेदार खेळाची अपेक्षा व्यक्त केली जात आहे.

 

आकर्षक पुरस्कारांची मेजवानी

स्पर्धेतील पहिल्या ८ विजेत्या-उपविजेत्या खेळाडूंना आकर्षक पुरस्कारांसह स्ट्रायकर देऊन गौरविण्यात येणार आहे. त्यामुळे प्रत्येक खेळाडू सर्वोत्तम कामगिरी करण्यासाठी सज्ज असून स्पर्धेतील प्रत्येक फेरी रोमांचक ठरणार आहे.