चर्चगेट विरुद्ध ठाणे एलआयसी कल्पेश गोविंद कोळी स्मृती चषकाची रंगणार महासंग्राममय अंतिम लढत जय म्हात्रेची सलग दुसरी हॅटट्रिक नीव जेठवानीच्या तडाखेबाज १४३ धावांनी ठाणे केंद्राची दमदार आगेकूच

 

चर्चगेट विरुद्ध ठाणे

एलआयसी कल्पेश गोविंद कोळी स्मृती चषकाची रंगणार महासंग्राममय अंतिम लढत

जय म्हात्रेची सलग दुसरी हॅटट्रिक

नीव जेठवानीच्या तडाखेबाज १४३ धावांनी ठाणे केंद्राची दमदार आगेकूच

 

मुंबई : ३४ व्या एलआयसी कल्पेश गोविंद कोळी स्मृती क्रिकेट स्पर्धेच्या उपांत्य फेरीत ठाणे केंद्र आणि चर्चगेट केंद्र यांनी पहिल्या डावातील महत्त्वपूर्ण आघाडीच्या जोरावर अंतिम फेरीत धडक मारली. आता येत्या शुक्रवार आणि शनिवार, म्हणजेच २२ आणि २३ मे रोजी रुईया कॉलेजसमोरील वीर मेजर रमेश दडकर मैदानावर या दोन बलाढ्य संघांमध्ये जेतेपदासाठी थरारक अंतिम सामना रंगणार आहे. उपांत्य फेरीत एका बाजूला नीव जेठवानी याच्या झंझावाती शतकाने ठाणे केंद्राला भक्कम आधार दिला, तर दुसऱ्या बाजूला जय म्हात्रे याने सलग दुसऱ्या दिवशी हॅटट्रिकसह घातक गोलंदाजी करत चर्चगेट केंद्राला अंतिम फेरीत पोहोचवले.

 

नीव जेठवानीचा धडाका; ठाणे केंद्राची विक्रमी धावांची उभारणी

माटुंगा जिमखाना मैदानावर झालेल्या उपांत्य सामन्यात ठाणे केंद्राने दुसऱ्या दिवशी ९१/२ वरून पुढे खेळताना एमसीए अकादमी केंद्राच्या गोलंदाजांवर जोरदार हल्ला चढवला. नीव जेठवानी याने १३७ चेंडूत १९ चौकार आणि ४ षटकारांसह शानदार १४३ धावांची खेळी करत मैदान गाजवले. त्याला यष्टिरक्षक-फलंदाज तन्मय मालुसरे याने १० चौकार आणि ३ षटकारांसह ९७ धावांची दमदार साथ दिली.

 

सर्वेश, आर्यन आणि निरवचे उपयुक्त योगदान

ठाणे केंद्राच्या फलंदाजीला सर्वेश भोईर याची नाबाद ७२ धावांची खेळी, आर्यन कुमार याचे नाबाद ५०, निरव भोरकर ४१, पार्थ राणे ३३ आणि अथर्व गावडे ३२ धावांचे योगदान लाभले. ठाणे केंद्राने ८ बाद ५०९ धावांवर डाव घोषित करत एमसीए अकादमीवर प्रचंड दबाव निर्माण केला. एमसीए अकादमीकडून अर्जुन दादरकर आणि राजवीर लाड यांनी प्रत्येकी २ विकेट्स घेतल्या. या शानदार कामगिरीबद्दल नीव जेठवानी याला सामनावीर पुरस्काराने गौरविण्यात आले.

 

जय म्हात्रेचा पुन्हा कहर; चर्चगेट केंद्र अंतिम फेरीत

डीपीसीसी, माटुंगा येथे झालेल्या दुसऱ्या उपांत्य सामन्यात चर्चगेट केंद्राचा डावखुरा फिरकीपटू जय म्हात्रे याने पुन्हा एकदा आपली जादू दाखवली. पहिल्या डावात हॅटट्रिकसह ६ बळी घेणाऱ्या जयने दुसऱ्या डावातही हॅटट्रिकसह ५/४१ अशी घातक गोलंदाजी करत विरार केंद्राला ५० षटकांत ८ बाद १८५ धावांवर रोखले. सामन्यात एकूण ११ बळी घेत जय म्हात्रेने चर्चगेट केंद्राच्या विजयात सिंहाचा वाटा उचलला आणि सामनावीर पुरस्कार पटकावला.

 

आरुष कोल्हे आणि शार्दूल फागरेची दमदार फलंदाजी

चर्चगेट केंद्राने पहिल्या डावात आरुष कोल्हे याच्या ५८, शार्दूल फागरे याच्या ४९ आणि श्लोक बोंगू याच्या ४४ धावांच्या खेळीच्या जोरावर ७४.२ षटकांत सर्वबाद २३१ धावा उभारल्या. त्यामुळे त्यांना १३० धावांची महत्त्वपूर्ण आघाडी मिळाली आणि त्याच आघाडीच्या बळावर चर्चगेट केंद्राने अंतिम फेरीत धडक मारली. विरार केंद्राकडून प्रेरित राऊत याने ४/२७ अशी प्रभावी गोलंदाजी केली, तर हार्दिक गजमल, गोलू पाल आणि प्रवीर सिंग यांनी प्रत्येकी २ विकेट्स घेतल्या.

 

अंतिम लढतीकडे क्रिकेटप्रेमींचे लक्ष

उपांत्य फेरीतील दमदार कामगिरीनंतर आता चर्चगेट केंद्र आणि ठाणे केंद्र यांच्यातील अंतिम सामना रंगतदार होणार असल्याची चर्चा क्रिकेट वर्तुळात रंगू लागली आहे. एका बाजूला जय म्हात्रेसारखा फिरकीचा तुरुपाचा पत्ता असलेले चर्चगेट केंद्र, तर दुसऱ्या बाजूला नीव जेठवानी आणि तन्मय मालुसरे यांच्या जोरदार फलंदाजीवर स्वार असलेले ठाणे केंद्र अशा दोन मजबूत संघांमध्ये जेतेपदासाठी चुरशीची लढत पाहायला मिळणार आहे.